Navigaziun principala

Cuntegn da la pagina

Communicaziun da la Regenza dals 4 da favrer 2021

  • Erste Mitteilung
  • Neuen Beitrag einfügen
En il rom dal svilup regiunal ha la Regenza deliberà ina contribuziun chantunala per la senda da viandar a lunga distanza "Parc-Ela-Trek". Plinavant ha ella garantì in sustegn finanzial a la Gandahus-Vereinigung per sanar ina da las stallas eventualmain las pli veglias dal Grischun. Ultra da quai ha ella concedì las permissiuns per derschentar ils lais d'accumulaziun da Breil e da Pigniu.

Contribuziun chantunala per la senda da viandar a lunga distanza "Parc-Ela-Trek"

Per il project "Parc-Ela-Trek" ha la Regenza deliberà ina contribuziun chantunala da maximalmain var 619 000 francs. Quai sut la premissa ch'er la Confederaziun concedia ina contribuziun da maximalmain var 774 000 francs al project cuminaivel per il svilup regiunal (PSR). In PSR cumpiglia mesiras che vegnan realisadas da differents acturs e ch'èn accordadas ina cun l'autra. La finamira centrala da questa collavuraziun regiunala è la creaziun d'ina valur agiuntada en l'agricultura. Grazia a la collavuraziun en il PSR duai il potenzial en la regiun vegnir exaurì e purtar meglras entradas en l'agricultura. 

A partir da l'onn 2022 duai la senda da viandar a lunga distanza "Parc-Ela-Trek" manar sin il stgalim alpin en 18 etappas d'in di enturn il parc. Per che viandantas e viandants na stoppian betg ir giu en la val a pernottar, dovri ulteriurs alloschis simpels. Cun novas purschidas agroturisticas a Stugl, a Jenisberg e tar la chamona dal Set sco er cun extender la purschida existenta sin l'alp d'Err gida il project a valurisar l'agricultura regiunala ed il turissem da stad. In'ulteriura contribuziun presta l'alimentaziun en las chamonas cun products regiunals, l'intermediaziun da la cultura d'alp e la commerzialisaziun cuminaivla dal "Parc-Ela-Trek". Ils custs totals da quest project importan circa 2,4 milliuns francs.

 

Foto Parc Ela Trek
©Lorenz A. Fischer

Per il project "Parc-Ela-Trek" ha la Regenza deliberà ina contribuziun chantunala da maximalmain var 619 000 francs.

Per il project "Parc-Ela-Trek" ha la Regenza deliberà ina contribuziun chantunala da maximalmain var 619 000 francs.

Sustegn finanzial per renovar il "Lärchabodastall" a Val S. Pieder

La Regenza ha deliberà ina contribuziun chantunala da var 45 550 francs a la Gandahus-Vereinigung Val S. Pieder per renovar il "Lärchabodastall" a Val S. Pieder. En connex cun questa contribuziun chantunala vegn il "Lärchabodastall" mess da qua envi sut protecziun da monuments chantunala.

Il "Lärchabodastall" a Val S. Pieder è datà sin l'onn 1781/82. In pèr travs èn però bler pli veglias e dateschan dals onns 1329 e 1423 e tutgan uschia probablamain tar ils rests ils pli vegls anc mantegnids d'ina stalla en il chantun Grischun. L'onn 2006 ha il Servetsch archeologic dal Grischun gia determinà in'emprima giada la vegliadetgna cun l'uschenumnada dendrocronologia. Per garantir il mantegniment da l'edifizi a lunga vista sto el vegnir restaurà. La Gandahus-Vereinigung Val S Pieder ha l'intenziun da sanar il "Lärchabodastall" e d'al render accessibel a la publicitad interessada.

 

Foto Lärchabodastall Vals

La Regenza ha deliberà ina contribuziun chantunala da var 45 550 francs a la Gandahus-Vereinigung Val S. Pieder per renovar il "Lärchabodastall" a Val S. Pieder.

Approvaziun da las derschentadas dals lais d'accumulaziun da Breil e da Pigniu

La Regenza ha concedì a las Ovras electricas Frisal SA (OEF) sut cundiziuns la permissiun per derschentar il lai d'accumulaziun da Breil. Dapi l'ultima derschentada l'onn 1992 èn s'accumulads en il lai var 80 000 meters cubic sediments che restrenschan adina pli fitg il manaschi da l'ovra. Cun la derschentada duain vegnir allontanads var 27 000 meters cubic sediments or dal lai d'accumulaziun.

Plinavant ha la Regenza concedì a las Ovras electricas Glion SA (OEG) la permissiun per derschentar il lai d'accumulaziun da Pigniu. Dapi ch'il lai d'accumulaziun è vegnì mess en funcziun l'onn 1992, èn s'accumulads en il lai var 169 000 meters cubic sediments che restrenschan il manaschi da l'ovra. Las derschentadas dastgan vegnir fatgas dals 15 da matg fin e cun ils 30 da settember 2021. Sch'i n'è betg pussaivel da far ellas l'onn 2021, dastgan ellas vegnir spustadas fin maximalmain l'onn 2023.

 

Foto Stauanlage Panix
Il lai d'accumulaziun da Pigniu; ©AXPO / OEG (Ovras electricas Glion SA)

 

Foto Stauanlage BrigelsIl lai d'accumulaziun da Breil; ©AXPO / OEF (Ovras electricas Frisal SA)

La Regenza ha concedì a las Ovras electricas Frisal SA (OEF) sut cundiziuns la permissiun per derschentar il lai d'accumulaziun da Breil. Plinavant ha la Regenza concedì a las Ovras electricas Glion SA (OEG) la permissiun per derschentar il lai d'accumulaziun da Pigniu.

Neuer Artikel
Gremi: Regenza
Funtauna: rg Chanzlia chantunala dal Grischun