Navigaziun principala

Cuntegn da la pagina

Definir la direcziun tar la promoziun chantunala da linguas

  • Erste Mitteilung
  • Neuen Beitrag einfügen

"Fermezza en la diversitad" è il motto en il program da la Regenza 2021–24 pertutgant ils secturs Lingua e Cultura. Ils emprims pass concernent la promoziun da linguas cumpiglian la domiciliaziun dal post da coordinaziun "Administraziun plurilingua" sco post da stab en il Departament d'educaziun, cultura e protecziun da l'ambient (DECA), la preschentaziun da propostas da mesiras concretas per rinforzar la plurilinguitad sco er la realisaziun d'emprimas mesiras.

Cun las propostas da mesiras elavuradas prevesa il chantun da resguardar pli fitg ils basegns da las differentas gruppas linguisticas chantunalas sco er da surpigliar ina rolla activa sin ses champ d'incumbensas. Ina incumbensa impurtanta en la promoziun da las linguas minoritaras chantunalas han anc adina las organisaziuns linguisticas.

Post da coordinaziun "Administraziun plurilingua"
La Regenza ha decidì da stgaffir in post da coordinaziun nov "Administraziun plurilingua". Quel duai vegnir domicilià sco post da stab en il Departament d'educaziun, cultura e protecziun da l'ambient (DECA).

Il post da coordinaziun duai sustegnair ils uffizis da l'administraziun chantunala a realisar las directivas tenor la legislaziun da linguas, ma er cussegliar acturs ordaifer l'administraziun chantunala, sco per exempel vischnancas, en dumondas che stattan en connex cun la realisaziun da la Lescha da linguas. Plinavant duai el examinar, sche ulteriuras propostas da mesiras èn realisablas e far propostas a la Regenza sco er sviluppar ulteriuras mesiras cun la finamira da dar dapli preschientscha a la plurilinguitad.

Propostas da mesiras per promover las linguas en il chantun Grischun
Elavuradas èn vegnidas var 80 propostas da mesiras concretas. Sco ina collecziun d'ideas cumplessiva e bain basada furman quellas in instrument da lavur impurtant per l'ulteriura planisaziun da la promoziun da linguas. L'emprima part sa drizza als uffizis chantunals; en ina segunda part vegnan formuladas mesiras ch'èn attribuidas a las singulas organisaziuns linguisticas sco er ad autras instituziuns ordaifer l'administraziun. Bleras mesiras duain vegnir integradas en las cunvegnas da prestaziun cun las organisaziuns linguisticas, che duain vegnir renovadas l'onn 2021. Il medem mument èn ils uffizis vegnids incumbensads da realisar emprimas mesiras.

Las propostas da mesiras èn vegnidas elavuradas en in'emprima fasa d'ina gruppa da lavur nominada per quest intent, che cumpigliava represchentanzas da differents uffizis e da la Chanzlia chantunala. Il DECA ha surdà la direcziun da questa gruppa a la firma Input Consulting SA, Berna/Turitg. Questa firma ha tranter auter gia accumpagnà la realisaziun d'in rapport davart la bilinguitad en il chantun Berna. Suenter èn vegnidas consultadas las organisaziuns linguisticas Lia Rumantscha e Pro Grigioni Italiano sco er la Fundaziun Medias Rumantschas ed ulteriuras instituziuns ordaifer l'administraziun.

Agiunta:
Propostas da mesiras per promover las linguas en il chantun Grischun


Infurmaziuns:
dr. Jon Domenic Parolini, cusseglier guvernativ, tel. +41 81 257 27 01, e-mail Jondomenic.Parolini@ekud.gr.ch 


Gremi: Departament d'educaziun, cultura e protecziun da l'ambient
Funtauna: rg Departament d'educaziun, cultura e protecziun da l'ambient

Neuer Artikel