Navigaziun principala

Cuntegn da la pagina

In expert da furmaziun intercurescha la procedura d'admissiun a las scolas medias

  • Erste Mitteilung
  • Neuen Beitrag einfügen

En consequenza d'ina incumbensa parlamentara vegn intercurida la procedura d'admissiun chantunala a las scolas medias grischunas dal renumà expert da furmaziun prof. dr. Franz Eberle. En il center stat en quest connex la dumonda, sche la procedura d'admissiun vertenta porscha a tuts la medema schanza per entrar en ina scola media u sche la procedura d'admissiun sto vegnir adattada.

Ensemen cun 44 consutsegnadras e consutsegnaders ha l'anteriur deputà Remo Cavegn supplitgà il favrer 2020 la Regenza cun ina incumbensa parlamentara da stgaffir la basa per in'admissiun senza examen a las scolas medias grischunas. La procedura d'admissiun vertenta cun in examen d'admissiun chantunal pericliteschia l'egualitad da las schanzas e stgaffeschia differenzas regiunalas. Ultra da quai possian ins sa dumandar, sch'er propi las scolaras ed ils scolars adattads vegnian admess ad ina scola media cun questa procedura. I vegn fatg valair ch'il success da l'examen dependia fermamain da la preparaziun, ma ch'ina preparaziun efficazia – en spezial cun frequentar curs da preparaziun che custan u ch'èn gratuits – na stettia betg a disposiziun en medema moda e maniera a tut las candidatas e tut ils candidats da l'examen en tut las scolas ed en tut las regiuns. 

Intercurir ils avantatgs ed ils dischavantatgs d'examens d'admissiun
Sin proposta da la Regenza ha il Cussegl grond approvà ina midada da l'incumbensa. Empè d'abolir l'examen d'admissiun chantunal duai en in emprim pass vegnir stgaffida ina basa da decisiun objectiva per adattar eventualmain la procedura d'admissiun a las scolas medias. A maun d'ina expertisa externa duain vegnir intercurids ils avantatgs ed ils dischavantatgs da proceduras d'admissiun cun e senza examen d'admissiun. Sin basa da datas objectivas duai l'expertisa externa sustegnair la Regenza a decider, tge procedura ch'è adattada il meglier en il chantun Grischun per selecziunar las scolaras ed ils scolars tenor lur abilitads e tenor lur interess per las differentas scolaziuns. Questa procedura da selecziun duai porscher sche pussaivel las medemas schanzas a tuttas e tuts.

La realisaziun da questa retschertga ha pudì vegnir surdada al renumà expert da furmaziun svizzer prof. dr. Franz Eberle. Il professer da blers onns emerità per pedagogia gimnasiala ed economica ed anteriur directur da la partiziun Furmaziun da persunas d'instrucziun per scolas da maturitad da l'Institut da pedagogia da l'Universitad da Turitg ha enconuschientschas profundas dals fatgs da furmaziun naziunals, en spezial dal stgalim secundar II. El ha perscrutà tranter auter en il sectur da la maturitad gimnasiala e da la midada a l'universitad, per exempel cun il studi EVAMAR II tar l'evaluaziun da la refurma da la maturitad l'onn 1995. Prof. dr. Franz Eberle è commember dal Cussegl svizzer da la scienza e serva ultra da quai en differents gremis da furmaziun impurtants, tranter auter sco commember da la Cumissiun svizra da maturitad e sco president da la Cumissiun da la CDEP per la renconuschientscha dals diploms d'instrucziun per scolas da maturitad.

Ils resultats da la retschertga duain esser avant maun fin la primavaira 2022.


Infurmaziuns: 
cusseglier guvernativ dr. Jon Domenic Parolini, schef dal Departament d'educaziun, cultura e protecziun da l'ambient, tel. +41 81 257 27 01, e‑mail Jondomenic.Parolini@ekud.gr.ch


Gremi: Departament d'educaziun, cultura e protecziun da l'ambient
Funtauna: rg Departament d'educaziun, cultura e protecziun da l'ambient

Neuer Artikel