Navigaziun principala

Cuntegn da la pagina

Agid finanzial per il sport grischun

  • Erste Mitteilung
  • Neuen Beitrag einfügen

Il chantun Grischun sustegna las uniuns e las federaziuns da sport er durant la segunda unda da la pandemia. Las mesiras per cumbatter cunter COVID-19 han sfurzà ina retscha d'activitads d'uniun e da concurrenzas da sport ad ina pausa. Sco consequenza è la vita economica e sociala da las differentas organisaziuns da sport en il Grischun restrenschida fermamain. Per tegnair en vita las structuras da sport en spezial per la generaziun giuvna e per dar ad ellas nov schlantsch metta la Regenza a disposiziun ulteriurs agids finanzials en l'autezza da 3 milliuns francs.

En il Grischun procuran passa 700 uniuns da sport cun lur bundant 72 000 commembras e commembers, organisadas en 45 federaziuns chantunalas da sport, per ina purschida da sport vasta e multifara – en spezial er en il sectur dals uffants e dals giuvenils. La segunda unda da la pandemia dal coronavirus tutga danovamain ferm il sport da massa: trenaments èn pussaivels mo en moda fitg limitada, gieus da campiunadi e concurrenzas èn actualmain schizunt scumandads. En il sport da prestaziun èsi bain pussaivel da far concurrenzas, dentant senza aspectaturas ed aspectaturs. Pervia da questas perditas d'entradas èn blers clubs periclitads en lur existenza ed en consequenza da quai èn er smanatschads il manaschi da trenament ed il manaschi da concurrenza sco er en spezial las structuras da la promoziun da talents giuvens.

Contribuziuns chantunalas per organisaziuns da sport engrevgiadas fermamain
Il cusseglier guvernativ Jon Domenic Parolini, schef dal Departament d'educaziun, cultura e protecziun da l'ambient (DECA), aveva incumbensà graubündenSPORT e l'Associaziun grischuna da sport (AGS) da sclerir, co che la situaziun actuala sa preschentia tar las uniuns e tar las federaziuns da sport da squadra pervia da las restricziuns chaschunadas dal coronavirus. Sin quai ha ina maisa radunda ensemen cun represchentanzas da las uniuns e da las federaziuns da sport da squadra mussà ch'i dat ina largia considerabla en la finanziaziun da tschertas uniuns, suenter che las contribuziuns federalas èn vegnidas deducidas, e che la liquiditad n'è betg segirada, perquai che la stagiun 2020/2021 è vegnida annullada dal tuttafatg en blers lieus.

Pervia da quai ha la Regenza decidì da prender mesiras chantunalas cumplementaras e da conceder contribuziuns chantunalas da sustegn ad organisaziuns grischunas da sport, da las qualas la situaziun finanziala è engrevgiada fermamain pervia da las restricziuns chaschunadas dal coronavirus. En il rom d'in emprim agid immediat aveva la Regenza gia mess a disposiziun l'avrigl 2020 1 milliun francs per il mantegniment da la liquiditad e per il sustegn nunbirocratic d'uniuns e da federaziuns da sport.

Infurmaziuns actualas, il fegl d'infurmaziun correspundent sco er il formular da dumonda stattan a disposiziun sin la pagina d'internet da l'Uffizi per la scola populara ed il sport.


Infurmaziuns:
- cusseglier guvernativ dr. Jon Domenic Parolini, schef dal Departament d'educaziun, cultura e protecziun da l'ambient dal Grischun, tel. +41 81 257 27 01, e-mail Jondomenic.Parolini@ekud.gr.ch
- Thierry Jeanneret, manader da graubündenSPORT, tel. +41 81 257 27 51, e-mail Thierry.Jeanneret@avs.gr.ch


Gremi: Uffizi per la scola populara ed il sport
Funtauna: rg Uffizi per la scola populara ed il sport

Neuer Artikel