En sia consultaziun pretenda la Regenza grischuna ch'ils chantuns survegnian dapli libertads en il rom da la strategia da schluccada previsa. Far tests en moda preventiva ed activa porscha – sper las mesiras restrictivas – alternativas cumprovadas che ston vegnir onuradas en connex cun las schluccadas. Plinavant duain ils secturs externs dals manaschis da gastronomia vegnir averts gia a partir dal 1. da mars 2021. A medem temp appellescha la Regenza a la populaziun d'observar vinavant consequentamain las reglas vertentas.
Suenter ch'il Cussegl federal ha annunzià la mesemna passada pass da schluccada pussaivels, ha la Regenza grischuna discutà a chaschun d'ina sesida extraordinaria davart sia posiziun tar la consultaziun da la Confederaziun. La reavertura da las activitads economicas e socialas è urgenta e vegn beneventada ord vista da la Regenza. Las interpresas e la populaziun dovran ussa ina clera perspectiva; ils princips da questa perspectiva ston vegnir mussads a maun dals pass da schluccada proponids.
Las mesiras federalas èn memia unilateralas e memia plaunas
Ord vista dal chantun Grischun na van ils pass da schluccada proponids betg lunsch avunda resp. s'avanzan memia plaun. Els ston vegnir accelerads e vegnir sustegnids cun mesiras activas da test e da tracing e – sche necessari – cun mesiras supplementaras localas. A chantuns che disponan d'in bun monitoring duai esser permess da schluccar pli svelt las mesiras, perquai che svilups negativs vegnan identifitgads correspundentamain pli svelt. Ultra da quai augmentass quest impuls la motivaziun dals chantuns da posseder in bun monitoring, e la populaziun sco er l'economia vegnissan motivadas anc pli fitg ad ina participaziun activa.
La Regenza è perquai surpraisa che la strategia da la Confederaziun na prevesa betg ulteriuras mesiras, sco p.ex. tests preventivs. Questa strategia è memia pauc dinamica ed è focussada en moda memia unilaterala sin las mesiras restrictivas. Ils pass da schluccada proponids paran perquai arbitrars (p.ex. tschertas occurrenzas da sport èn pussaivlas – purschidas gastronomicas al liber n'èn betg pussaivlas). Correspundentamain na poi betg vegnir discurrì d'ina strategia cumplessiva en il cas qua avant maun, perquai ch'i duai apparentamain mo vegnir decidì, co che las mesiras restrictivas duain vegnir tractadas en l'avegnir. La Regenza pretenda correcturas.
Avrir pli svelt ils secturs externs dals manaschis da gastronomia e las purschidas culturalas
Las experientschas en il Grischun mussan ch'igl è nunproblematic ord vista epidemiologica d'avrir ils secturs externs dals manaschis da restauraziun e che quai è ordvart impurtant tant per l'economia sco er per la societad. Ils secturs externs da tut ils manaschis da restauraziun duain perquai vegnir averts gia a partir dal 1. da mars 2021. Sch'il Cussegl federal avess da refusar questa proposta, ston vegnir permessas – sco varianta minimala – en l'entira Svizra pussaivladads da seser en ils conturns da take-aways. Sch'ils secturs externs vegnissan averts pli tard, pudess quai dar fullas nuncontrolladas en ils vitgs ed en las citads, ussa che la primavaira stat davant porta e che las temperaturas van gia ad aut.
La Regenza sustegna ultra da quai la reavertura dals museums cun las mesiras da protecziun correspundentas. Dentant er per kinos, per teaters e per instituziuns sumegliantas duai vegnir planisà in pass da schluccada pli grond a partir dal 1. da mars 2021, premess ch'i valia in'obligaziun da purtar ina mascrina, ch'il public sesia e che las reglas da distanza correspundentas vegnian observadas.
I dovra anc ina giada pazienza e disciplina
La Regenza grischuna è conscienta dal fatg che la populaziun è stancla da corona e ch'ella giavischa dapli libertads suenter lungs mais cun bleras restricziuns. Meglra che la situaziun epidemiologica è, e dapli pussaivladads che pon vegnir concedidas. Perquai appellescha la Regenza a la populaziun da demussar anc ina giada la disciplina necessaria e d'avair in pau pazienza, per betg periclitar ils success cuntanschids cuminaivlamain, sco p.ex. ils dumbers da cas ch'èn actualmain bass. L'observanza da las reglas da distanza, il diever consequent da mascrinas e la participaziun allegraivlamain gronda a la strategia da test gidan d'obtegnair en moda controllada e pass per pass dapli schluccadas. Er dapli vaccins duain gidar da returnar a partir da la fin da la primavaira a la situaziun normala.
Infurmaziuns:
president da la Regenza dr. Mario Cavigelli, tel. +41 81 257 36 01 (infurmaziuns tranter las 14.30 e las 16.30)
Gremi: Regenza
Funtauna: Chanzlia chantunala