Navigation

Inhaltsbereich

  • Erste Mitteilung
  • Neuen Beitrag einfügen

La Regenza ha decidì d'indemnisar meglier las perditas economicas da las interpresas en consequenza da las mesiras uffizialas cunter corona. Perquai ha ella augmentà la tariffa da contribuziun da 50 sin 75 pertschient da la perdita economica e fatg ulteriuras adattaziuns.

Il chantun indemnisescha las commerziantas ed ils commerziants che han subì ina perdita da la svieuta en consequenza da las mesiras uffizialas durant la pandemia dal coronavirus, da nov cun 75 pertschient da las perditas economicas en il rom dal program per cas da direzza da la Confederaziun e dal chantun. Quai correspunda da princip a la part dals custs fixs da la perdita da la svieuta.

INFURMAZIUN IMPURTANTA: BETG NECESSARI DA FAR INA NOVA DUMONDA  

  • Interpresas che han gia fatg ina dumonda, na ston betg inoltrar ina nova dumonda. La nova tariffa da contribuziun vegn applitgada a partir d'immediat.  
  • Las interpresas che han gia survegnì contribuziuns, survegnan automaticamain la contribuziun supplementara. Ellas na ston betg inoltrar ina nova dumonda.

Ulteriuras adattaziuns
Interpresas ch'èn serradas mo per part e che ston pia cumprovar ina perdita da la svieuta da passa 40 pertschient, sco per exempel ina pasternaria cun gastronomia (mo la gastronomia è serrada uffizialmain) u in hotel cun restaurant (il restaurant è serrà uffizialmain per giasts externs), pon pretender che questa limita da la perdita da la svieuta vegnia considerada mo per la sparta serrada, sch'ellas na cuntanschan uschiglio betg questa limita. En questa sparta eri fin ussa necessari da cumprovar ina perdita da la svieuta da passa 40 pertschient. Da nov sto vegnir cumprovada ina perdita da la svieuta da mo pli 15 pertschient en la sparta ch'è serrada uffizialmain. Dad ina interpresa cun pasternaria e gastronomia, che ha gì ina perdita da la svieuta da tut en tut "mo" 35 pertschient, vegn pretendida da nov ina cumprova da la perdita da la svieuta da mo pli 15 pertschient en la sparta da gastronomia. La valur minimala da la perdita da la svieuta da 15 pertschient vala vinavant areguard l'entira interpresa.

Ultra da quai vegn ina interpresa considerada da nov sco serrada cumplettamain, sch'ella cuntanscha almain 70 pertschient da sia svieuta en il sectur ch'è serrà (per exempel ina interpresa che cumpiglia ina pasternaria (30 pertschient) ed ina gastronomia (70 pertschient) ubain in hotel che cumpiglia in restaurant (70 pertschient) ed in alloschi (30 pertschient) (princip d'essenzialitad 70 a 30). Fin ussa valeva il princip d'essenzialitad en ina relaziun dad 80 a 20.

Commerzi en detagl e nova soluziun electronica
Las lavurs preparatoricas per indemnisar il commerzi en detagl èn quasi terminadas. Valair valan da princip las medemas reglas sco per las autras branschas. Per eruir la perdita da la svieuta sto il commerzi en detagl sulettamain far las indicaziuns davart la fasa dal 1. da mars 2020 fin ils 28 da favrer 2021. Cun las adattaziuns las pli novas èn vegnidas meglieradas las premissas per indemnisar il commerzi en detagl. Il commerzi en detagl sto dentant avair anc in zic pazienza. Il chantun è vidlonder d'installar ina nova soluziun electronica per ch'ils agids per cas da direzza possian vegnir pajads or pli svelt. Il sistem vegn introducì en pauc temp. Perquai èsi planisà da liquidar las dumondas dal commerzi en detagl sur quest sistem. Cun l'inoltraziun da las dumondas stoi pia anc vegnir spetgà circa duas emnas. Al commerzi en detagl vegni recumandà da procurar fin lura ils documents per cumprovar la perdita da la svieuta durant la fasa dal 1. da mars 2020 fin ils 28 da favrer 2021.

Tut las infurmaziuns concernent ils agids per cas da direzza stattan a disposiziun sin la pagina d'internet dal Departament d'economia publica e fatgs socials.


Infurmaziuns:
Post da communicaziun per il coronavirus dal chantun Grischun, e‑mail kfsmedien@amz.gr.ch, tel. +41 79 716 22 95 (exclusivamain per collavuraturas e collavuraturs da las medias)


Gremi: Regenza
Funtauna: Chanzlia chantunala

Neuer Artikel