Navigation

Inhaltsbereich

  • Erste Mitteilung
  • Neuen Beitrag einfügen

Venderdi, ils 2 da mars 2021, ha la Regenza deliberà ina dumonda per in credit posteriur da 100 milliuns francs per augmentar ils agids per cas da direzza en connex cun il coronavirus da nov sin 200 milliuns francs. Cun quai tegna ella quint da la discussiun dal Cussegl grond en la sessiun da favrer 2021 sco er dal basegn pli grond da meds finanzials da las interpresas grischunas.

Il Cussegl federal ha deliberà ils 17 da favrer 2021 la missiva per midar la Lescha COVID-19. Cun tala ha el dumandà il parlament federal d'augmentar il program per cas da direzza da 2,5 milliardas francs sin 10 milliardas francs (inclusiv las reservas dal Cussegl federal dad 1 milliarda). Ils meds per cas da direzza che vegnan pajads ora dals chantuns importan 9 milliardas francs. Da quels pertutgan 2,2 pertschient u 198 milliuns francs il chantun Grischun. La Confederaziun finanziescha da quels probablamain fin 158 milliuns francs. Da quai resulta ina grevezza netta da totalmain 42 milliuns francs per il chantun. Il Cussegl federal resguarda cun quai la pretensiun dals chantuns per dapli meds per cas da direzza e per ina repartiziun gista da las chargias finanzialas sin la Confederaziun e sin ils chantuns. Il Parlament federal vegn a debattar davart quest augment durant la sessiun da mars currenta.

Dal total dals meds finanzials da 9 milliardas francs èn previsas 6 milliardas francs per las interpresas pitschnas e mesaunas cun ina svieuta annuala da fin 5 milliuns francs. La Confederaziun surpiglia qua 70 pertschient (4,2 mia), ils chantuns 30 pertschient (1,8 mia.). Ulteriuras 3 milliardas èn previsas per interpresas pli grondas ch'èn savens activas en tut la Svizra e che han ina svieuta da passa 5 milliuns francs. Las contribuziuns a las interpresas pli grondas vegnan finanziadas cumplettamain da la Confederaziun. Las dumondas vegnan tractadas vinavant dals chantuns, la Confederaziun vegn però a fixar regulaziuns che valan per tut la Svizra per questas contribuziuns. Quellas regulaziuns vegn el a communitgar a temp util.

Simplificaziun dals agids per cas da direzza
Resguardond las discussiuns dal Cussegl grond durant la sessiun da favrer 2021 ha la Regenza decidì d'indemnisar meglier las commerziantas ed ils commerziants che han subì ina perdita da la svieuta en consequenza da las mesiras uffizialas durant la pandemia dal coronavirus, e quai en il rom dal program per cas da direzza da la Confederaziun e dal chantun. Perquai ha ella augmentà la tariffa da contribuziun da 50 sin 75 pertschient da la perdita economica e concludì ulteriuras facilitaziuns da las premissas per il dretg.

Consequenzas finanzialas, sch'il credit vegn duvrà cumplainamain
Fin ussa stattan a disposiziun meds finanzials da 100 milliuns francs (incl. custs d'execuziun). En sia sesida dals 2 da mars 2021 ha la Regenza deliberà ina dumonda per in ulteriur credit posteriur da 100 milliuns francs per mauns da la Cumissiun da gestiun dal Cussegl grond (CdG), uschia ch'i stattan ussa a disposiziun totalmain 200 milliuns francs. La dumonda resguarda la situaziun giuridica actuala ed il giavisch dal Cussegl federal dad auzar l'entir pachet d'agid da la Confederaziun e dals chantuns sin tut en tut 10 milliardas francs. I vegn supponì che la Confederaziun vegnia a sa participar cun fin a maximalmain 158 milliuns francs, quai che vegn a render supportabla la grevezza per il chantun. La CdG sto anc approvar quest credit posteriur.

Il chantun sustegna l'economia grischuna tenor sias forzas
Dapi l'erupziun da la pandemia dal coronavirus s'inscuntra la Regenza regularmain cun ils caders da l'economia grischuna en il rom d'ina maisa radunda. L'onn passà ha il chantun – cumplettond il sustegn federal – sustegnì generusamain l'economia, il turissem, il sport, la cultura, il traffic sco er las instituziuns da sanadad e da tgira cun contribuziuns finanzialas. Nua che quai è necessari, vegn el a far quai er durant quest onn. Pervia dal coronavirus vegn il quint annual 2020 engrevgià cun expensas supplementaras da 60 milliuns francs. Las consequenzas finanzialas da la pandemia dal coronavirus vegnan a sa mussar er en il quint annual 2021. Actualmain sa chattan las grevezzas supplementaras per l'onn da gestiun 2021 tar var 130 milliuns francs. Da quai èn circa 50 milliuns francs perditas da taglia da l'onn fiscal 2020, 42 milliuns francs agids per cas da direzza e stgars 30 milliuns francs investiziuns per la realisaziun da la strategia da testar e da vaccinar.

Ultra da quai vegn la Regenza ad examinar en il senn d'ina planisaziun eventuala, sch'igl è raschunaivel da reactivar las garanzias solidaricas da COVID per segirar la liquiditad e per sustegnair l'economia e co ch'in tal program pudess vegnir concepì.


Infurmaziuns
RCusseglier guvernativ Christian Rathgeb, schef dal Departament da finanzas e vischnancas, tel. +41 81 257 32 01, e-mail Christian.Rathgeb@dfg.gr.ch


Gremi: Regenza
Funtauna: rg Chanzlia chantunala dal Grischun

Neuer Artikel