Navigaziun principala

Cuntegn da la pagina

Communicaziun da la Regenza dals 11 da mars 2021

  • Erste Mitteilung
  • Neuen Beitrag einfügen

La Regenza ha prendì enconuschientscha dals projects federals da la votaziun dal pievel dals 13 da zercladur 2021. Ultra da quai ha ella fixà per quest termin la votaziun davart trais projects chantunals, tranter auter davart la revisiun parziala da la Constituziun chantunala concernent in nov sistem electoral per il Cussegl grond.

La Regenza ha prendì enconuschientscha dal fatg ch'ils suandants projects federals vegnan suttamess a la votaziun dal pievel dumengia, ils 13 da zercladur 2021:

  • Iniziativa dal pievel dals 18 da schaner 2018 "Per aua da baiver netta e vivonda sauna – Naginas subvenziuns per l'utilisaziun da pesticids ed il diever profilactic d'antibiotica" (Fegl uffizial federal 2020 7635);
  • Iniziativa dal pievel dals 25 da matg 2018 "Per ina Svizra senza pesticids sintetics" (Fegl uffizial federal 2020 7637);
  • Lescha federala dals 25 da settember 2020 davart las basas legalas da las ordinaziuns dal Cussegl federal per superar l'epidemia da COVID-19 (Lescha COVID-19) (CULF 2020 3835);
  • Lescha federala dals 25 da settember 2020 davart la reducziun da las emissiuns da gas cun effect da serra (Lescha davart il CO2) (Fegl uffizial federal 2020 7847); e
  • Lescha federala dals 25 da settember 2020 davart las mesiras polizialas per cumbatter cunter il terrorissem (MPT) (Fegl uffizial federal 2020 7741).

Sin plaun chantunal vegni votà ils 13 da zercladur 2021 davart ils suandants trais projects da votaziun:

  • revisiun parziala da la Constituziun chantunala (art. 27 al. 2 CC; nov sistem electoral per il Cussegl grond);
  • Iniziativa chantunala dal pievel "Per ina chatscha etica che sa cumporta cun la natira"; ed
  • aboliziun da la Lescha davart contribuziuns da maternitad dals 8 da december 1991 (DG 548.200).

Gremi: Regenza
Funtauna: rg Chanzlia chantunala dal Grischun

Neuer Artikel