Navigation

Inhaltsbereich

Vaccinaziun cunter corona: persunas sur 65 onns pon s'annunziar

  • Erste Mitteilung
  • Neuen Beitrag einfügen

Dapi mez schaner èn vegnidas vaccinadas passa 18 000 persunas en il Grischun. Quai èn passa 9 pertschient da la populaziun grischuna. Var 9700 da questas persunas han gia survegnì lur segunda vaccinaziun. Suenter che las vaccinaziuns èn stadas pussaivlas fin qua per persunas sur 75 onns sco er per persunas creschidas cun grevas malsognas cronicas, pon ussa er persunas sur 65 onns (gruppa da vaccinaziun 4) s'annunziar per lur vaccinaziuns.

Fin ussa n'ha l'acziun da vaccinaziun chaschuna naginas cumplicaziuns en il Grischun. En ils nov centers da vaccinaziun sco er en las chasas da persunas attempadas e da tgira han ins pudì vaccinar dapi ils 12 da schaner 2021 var 18 000 persunas da las gruppas da vaccinaziun 1 fin 3 respectivamain persunas sur 75 onns sco er persunas creschidas cun grevas malsognas cronicas. Plinavant èn vegnidas vaccinadas dapi lura passa 80 pertschient da las abitantas e dals abitants da las chasas da persunas attempadas e da tgira.

Las persunas annunziadas da las gruppas da vaccinaziun 2 e 3 duain survegnir lur emprima vaccinaziun fin la fin da mars, premess ch'il vaccin saja disponibel.

La gruppa da vaccinaziun 4 vegn dada liber
Da nov pon er persunas che appartegnan a la gruppa da vaccinaziun 4 respectivamain persunas sur 65 onns far ina preannunzia. Ils emprims termins per la gruppa da vaccinaziun 4 vegnan previsiblamain surdads a partir da mez avrigl 2021, premess ch'il vaccin saja disponibel. La preannunzia duai sche pussaivel vegnir fatga online (www.gr.ch/impfung). Tgi che n'ha betg access a l'internet, po s'annunziar per telefon sur la hotline da vaccinaziun (telefon 081 254 16 00).

Ils termins da vaccinaziun vegnan attribuids e confermads dals centers da vaccinaziun suenter la registraziun; i n'è betg pussaivel da tscherner libramain in termin. Per la preannunzia online dovran ins la carta da l'assicuranza da malsauns. Persunas da las gruppas da vaccinaziun 2 e 3 pon s'annunziar er vinavant.

Vaccinaziuns tar la media u il medi da chasa betg avant il matg
Las cussegliaziuns da vaccinaziun tutgan vinavant al champ da cumpetenza da las medias e dals medis da chasa. Ellas ed els vegnan dentant a pudair porscher vaccinaziuns en lur praticas il pli baud il matg, e pir cur ch'il vaccin correspundent è disponibel. Uschespert ch'il vaccin è disponibel en quantitads pli grondas, vegnan er las apotecas a pudair porscher vaccinaziuns.

Fin il cumenzament d'avrigl 2021 duain vegnir furnidas 18 700 dosas da vaccinaziun. Uschia pon 9350 ulteriuras persunas vegnir vaccinadas mintgamai duas giadas.

Tgi che n'appartegna betg a las emprimas gruppa en mira, sto anc avair pazienza in pèr emnas. Vaccinaziuns da massa dependan da la disponibladad dal vaccin e pon vegnir purschidas – tenor la planisaziun da l'Uffizi federal da sanadad publica (UFSP) – probablamain a partir dal cumenzament da la stad. Las infurmaziuns davart las vaccinaziuns cunter corona vegnan cumplettadas cuntinuadamain sin la pagina d'internet www.gr.ch/impfung.


Infurmaziuns:
Post da communicaziun per il coronavirus dal chantun Grischun, e#8209;mail kfsmedien@amz.gr.ch

Neuer Artikel