Navigation

Inhaltsbereich

Il coronavirus nov è fitg contagius e po manar tar grevs decurs da la malsogna sco era tar mortoris. Ina vaccinaziun na reducescha perquai betg mo il burdi da la malsogna e protegia qua tras la sanadad publica. Era las negativas consequenzas socialas ed economicas da la pandemia pon uschia vegnir sminuidas.

Vaccinaziun encunter COVID-19

  • Tut las persunas a partir da 5 onns pon sa laschar vaccinar.
  • Vaccinaziuns da rinfrestgament cun in vaccin mRNA vegnan recumandadas per tut las persunas a partir da 12 onns.
  • L’annunzia per la vaccinaziun da rinfrestgament succeda sur la pagina Impf-check.ch.
  • Persunas senza access a l’internet pon s’annunziar per telefon directamain tar il center da vaccinaziun.

 

Ulteriura vaccinaziun da rinfrestgament per persunas dad 80 onns e dapli

  • Da qua envi pon persunas dad 80 onns e dapli laschar rinfrestgar in'ulteriura giada la vaccinaziun (booster). La vaccinaziun vegn recumandada il pli baud 4 mais suenter l'ultima dosa da vaccinaziun ed il pli baud 4 emnas suenter ina infecziun passentada.

 

Segunda vaccinaziun da rinfrestgament (booster)

  • Persunas che vulan renovar lur certificat da Covid pervi d’in viadi, pon far ina segunda vaccinaziun da rinfrestgament (booster) a partir d’immediat. Quella vegn fatga sin agens custs che muntan ca. 60 francs. Admessas èn persunas a partir da 12 onns che han fatg ina emprima vaccinaziun da rinfrestgament (booster) avant almain quatter mais.
  • La vaccinaziun succeda off-label, q.v.d. ordaifer ina recumandaziun da la Cumissiun federala per vaccinaziuns (CFV) u dal Uffizi federal da sanadad publica (UFSP).
  • L’obligaziun da surpigliar ils custs vala mo per la segunda vaccinaziun da rinfrestgament. Vaccinaziuns per l’immunisaziun da basa (emprima e segunda vaccinaziun), l’emprima vaccinaziun da rinfrestgament (booster) e la terza vaccinaziun da basa e la segunda vaccinaziun da rinfrestgament (booster) per persunas cun ina greva suppressiun dal sistem immunitar restan gratuitas. 

s'annunziar qua

 

Vaccinaziun suenter ina malsogna da Covid
Tgi che ha cumprovadamain suffrì da Covid-19, duai sin il pli baud suenter quatter emnas e be ina giada vegnir vaccinà. Sco cumprova ch’ins haja suffrì da Covid vala in test positiv da Covid (test da PCR).

Infurmaziuns en las linguas da la populaziun da migraziun
Per migrantas e migrants da la Svizra metta l’UFSP a disposiziun infurmaziuns en diversas linguas.

La vaccinaziun

  • impedescha grevs decurs da COVID-19 e consequenzas a lunga durada;
  • reducescha il privel da mutaziuns dal virus cun la furmaziun da novas variantas;
  • distgargia uschia il sectur da la sanadad.

Co funcziuna la vaccinaziun?

La vaccinaziun cunter COVID-19 permetta al corp da sviluppar ina defensiun immunitara che sa drizza spezialmain cunter il virus. Uschespert ch’il corp è exponì al virus, po el cumbatter quel ed evitar uschia ina greva malsogna. La vaccinaziun rinforza e trenescha pia noss sistem d’immunitad cunter il coronavirus, e quai en moda intenziunada.

Tge vaccins vegnan duvrads e co?

En Svizra èn admess actualmain quatter vaccins. En general recumandain nus la vaccinaziun cun in vaccin mRNA (Pfizer/BioNTech u Moderna). Quests vaccins procuran per la pli gronda protecziun pussaivla encunter ina malsogna da Covid-10 ed encunter las consequenzas pussaivlas.

Avais Vus passa 18 onns? Alura pudais Vus era sa laschar vaccinar cun il vaccin-vectur da Janssen u cun il vaccin da protein da Novavax, sche Vus na dastgais betg survegnir vaccins mRNA per motivs medicinals u sche Vus refusais vaccins mRNA.

La suandanta tabella mussa ina survista dals vaccins utilisads en Svizra e quantas dosas che èn necessarias per ina  vaccinaziun cumpletta (immunisaziun da basa).

Vaccins
 

A tgi vegn recumandada la vaccinaziun?

  • A tut las persunas a partir da 12 onns
  • La vaccinaziun cunter COVID-19 vegn recumandada per uffants da 5 fin 11 onns, sche lur geniturs ubain lur persunas responsablas per l'educaziun giavischan quella, suenter ch'els han valità individualmain las ristgas ed il niz per lur uffant.
  • A dunnas en speranza (per proteger la mamma e l’uffant betg anc naschì) ed a dunnas che tezzan
  • A persunas guaridas

A giuvenils da 12 fin 17 onns, a dunnas en speranza ed a mammas che tezzan sco er a persunas cun in sistem d’immunitad pli flaivel vegnan recumandads mo ils vaccins mRNA.

Nua poss jau ma laschar vaccinar?

En praticas da medis/medias da chasa, apotecas ed ospitals. Qua chattais Vus ina survista actuala dals centers da vaccinaziun.

Nua poss jau m'annunziar e co è il proceder?

L’annunzia succeda online.
Persunas senza access a l’internet pon s’annunziar per telefon directamain tar il center da vaccinaziun.

Tge stoss jau prender cun mai per la vaccinaziun?

Prendai per plaschair cun Vus al termin da vaccinaziun:

  • carta da l'assicuranza da malsauns
  • passaport, carta d'identitad u in auter document d'identitad uffizial
  • glista da diagnosas e/u da medicaments da la media u dal medi da chasa ubain da la media spezialisada u dal medi spezialisà
  • attest da vaccinaziun, sche avant maun

Quant ditg dura il vaccinar?

Il vaccinar dura per regla var 30 minutas (inclusiv 15 minutas temp da paus). Quintai per plaschair avunda temp per la vaccinaziun.

Poss jau ma laschar vaccinar er tar mia media da chasa u tar mes medi da chasa?

Gea. Qua chattais Vus ina survista actuala dals centers da vaccinaziun en il chantun Grischun.

Poss jau era ma laschar vaccinar en l’apoteca?

Gea. Qua chattais Vus ina survista actuala dals centers da vaccinaziun en il chantun Grischun. 

Quant custa la vaccinaziun?

  • Immunisaziun da basa (1. e 2. vaccinaziun): gratuita
  • 1. vaccinaziun da rinfrestgament (booster): gratuita
  • Ulteriuras vaccinaziuns da rinfrestgament (booster): gratuita per persunas sur 80 sco era per persunas cun ina greva suppressiun dal sistem immunitar
  • Vaccinaziun da rinfrestgament per scopos nun medicinics (p.ex. viadis): ca. 60 francs

Co poss jau spustar il termin da vaccinaziun?

As drizzai per plaschair al center da vaccinaziun correspundent.

Cun tge effects secundars èsi da far quint?

Ils effects secundars documentads il pli savens en ils studis d'admissiun èn cumparegliabels cun ils effects che sa mussan suenter ina vaccinaziun cunter la grippa. Suenter la segunda dosa pon quests effects secundars dentant esser pli ferms.

A tgi che survegn sintoms pli ferms u nunusitads suenter ina vaccinaziun vegni recumandà da contactar il center da vaccinaziun, l'ospital, la media u il medi ubain l'apotecra u l'apotecher. 

Stoss jau ma laschar vaccinar?

Na, i n'exista nagina obligaziun da vaccinaziun. Mintga persuna duai decider sezza, sch'ella vul sa laschar vaccinar.

Poss u duai jau ma laschar vaccinar, suenter ch'jau hai gia gì corona?

Gea. A persunas guaridas vegn recumandà da sa laschar vaccinar cunter Covid-19;  il pli baud quatter emnas suenter la malsogna.

Pertge duess jau ma laschar vaccinar?

La vaccinaziun As protegia d’in grev decurs da Covid-19. Qua chattais Vus ulteriurs buns motivs. 

Jau sun en speranza u vuless vegnir en speranza. Duai/sai jau ma laschar vaccinar?

Gea. Nus As recumandain la vaccinaziun Covid-19 avant u durant la gravidanza. Perquai che grevs decurs da l’infecziun cun Covid-19 èn bler pli frequents tar dunnas en speranza che tar persunas da la medema vegliadetgna che n’èn betg en speranza. Plinavant è il ristg d’ina naschientscha prematura cleramain pli aut, sche Vus As infectais cun il coronavirus durant la gravidanza. La vaccinaziun avant u durant la gravidanza protegia Vus e l’uffant betg anc naschì.

Planisais Vus da vegnir en speranza? Alura As laschai vaccinar uschè spert sco pussaivel.

Essas Vus gia en speranza e n’avais anc survegnì nagina vaccinaziun avant la gravidanza?

Alura As recumandain nus la vaccinaziun a partir da l’emna 12 da la gravidanza (q.v.d. a partir dal segund terz da la gravidanza). Ideala è la vaccinaziun en il segund u en il terz terz da la gravidanza, cunquai ch’ils emprims trais mais èn la fasa la pli sensibla per il svilup fetal dals organs.

Sche Vus essas en speranza u planisais ina gravidanza ed avais dumondas pertutgant la vaccinaziun, consultai Vossa media/Voss medi u Vossa spendrera.

Pon dimorantas e dimorants temporars (p.ex. stagiunarias e stagiunaris) s’annunziar per la vaccinaziun da corona?

Lavurantas e lavurants da l’exteriur cun permissiun da dimora che vala main ditg che 3 mais (p.ex. stagiunaris) pon s’annunziar en il chantun Grischun per la vaccinaziun da corona. Per quai s’annunzian els sur la pagina-web www.gr.ch/impfen.
Lavurantas e lavurants da l’exteriur basegnan in numer d’assicuranza valaivel d’ina cassa da malsauns svizra u ina confermaziun (permissiun da dimora da la vischnanca u contract da lavur).

Pon uffants e giuvenils sa laschar vaccinar?

Vaccinaziun da giuvenils a partir da 12 onns
La vaccinaziun vegn recumandada a tut ils giuvenils a partir da 12 onns. Cun la vaccinaziun As pudais Vus proteger cunter malsognas da Covid-19 cun in decurs savens miaivel e fitg darar grev. Effects negativs da mesiras eventualmain valaivlas e consequenzas dad exposiziuns frequentas (p.ex. scola/temp liber) pon era vegnir evitadas.

La recumandaziun vala oravant tut per:

  • Giuvenils cun ina malsogna cronica
  • Giuvenils che èn stretgs contacts (p.ex. commembers da chasadas) da persunas spezialmain periclitadas, oravant tut da persunas cun in sistem immunitar indeblì.
  • Giuvenils che vivan en structuras collectivas cun in risico augmentà d’infecziun e d’erupziun.

Giuvenils vegnan vaccinads cun preferenza cun il vaccin da Pfizer/BioNTech.

Infurmaziuns davart la vaccinaziun encunter Covid-19 per giuvenils a partir da 12 onns

 

Vaccinaziun dad uffants da 5 fin 11 onns
La vaccinaziun vegn recumandada ad uffants da 5 fin 11 onns, sche lur geniturs u persunas responsablas per l’educaziun giavischan quai pervi da la valitaziun dal niz e dal ristg per l’uffant. Ulteriuras infurmaziuns davart il tema chattais Vus en il fegl d’infurmaziun davart la vaccinaziun per uffants.

a recumandaziun vala oravant tut per:

  • Uffants cun ina malsogna cronica
  • Uffants che èn stretgs contacts (p.ex. commembers da chasadas) da persunas spezialmain periclitadas, oravant tut da persunas cun in sistem immunitar indeblì.
  • Ad uffants cun ina infecziun dal coronavirus confermada e superada che fan part da las gruppas da persunas menziunadas survart vegn recumandada mo ina dosa da vaccinaziun. A tut ils auters uffants guarids na vegn actualmain recumandada nagina vaccinaziun.

I sa tracta dad in vaccin producì specificamain per uffants. La dosa è pli bassa che en il vaccin per persunas a partir da 12 onns.

Ulteriuras infurmaziuns:

Vaccinaziun: Uschia ans protegin nus (UFSP)

Ulteriuras infurmaziuns davart la vaccinaziun (Uffizi federal da sanadad publica)

Infoline vaccinaziun cunter COVID-19 (Uffizi federal da sanadad publica): +41 58 463 00 00 (mintga di da las 08.00 fin las 18.00)