Program da vaccinaziun da corona 2021 Grischun

gruppa 1: chasas d’attempads e da tgira

Las vaccinaziuns en las chasas da persunas attempadas e da tgira en terminadas.

gruppa 2: persunas da 75 onns e pli veglias

s'annunziar qua

gruppa 3: persunas pli veglias che 16 onns cun grevas malsognas cronicas*

s'annunziar qua

gruppa 4: persunas tranter 65 e 74 onns

s'annunziar qua

gruppa 5: persunal da sanadad e da tgira**

persunal da sanadad cun contact da pazients sco er persunal da tgira spezialmain periclitads

** cun permissiun per pratitgar la professiun u attestaziun correspundenta

s'annunziar qua

gruppa 6: persunas tranter 55 e 64 onns

s'annunziar qua

gruppa 7: persunas tranter 45 e 54 onns

s'annunziar qua

gruppa 8: persunas tranter 12 e 44 onns

s'annunziar qua

*grevas malsognas cronicas

• insuffizienza dal cor ed angina dal pèz
• ipertonia da las arterias resistenta a tuttas terapias
• grevas malsognas da la via respiratorica
• greva e cronica insuffizienza dals gnirunchels
• diabetes mellitus cun donns organics u diabetes mellitus reglà a moda e maniera nunsuffizienta
• adipositas (a partir da BMI ≥35)
• defizienza d’immunitad da naschientscha u acquistada sco era terapia che supprima il sistem immun (p.ex. tschertas malsognas da cancer en terapia activa, greva infecziun HIV, transplantaziun d’organs)
• trisomia 21

Nua poss jau m'annunziar e co è il proceder?

Il link per As annunziar chattais Vus a partir dals 12 da schaner sin questa pagina. Resguardai per plaschair ch'il link n'è, tut tenor la disponibladad dal vaccin, betg avert a medem temp per tut las gruppas.

Nua poss jau ma laschar vaccinar?

Dapi mez schaner 2021 stattan nov centers da test e da vaccinaziun regiunals a disposiziun. Dapi mez matg 2021 èn vaccinaziuns era pussaivlas en praticas da medis da chasa e dapi mez zercladur en singulas apotecas.

Apotecas (Sanunziar an las apotecas):

 Amavita Apotheke Ilanz, Bahnhofstrase 10, 7130 Ilanz, T 058 878 29 10

Coop Vitality Quader Chur, Masanserstrasse 14, 7000 Chur, T 058 878 89 10 

Coop Vitality Apotheke Flims, Via Nova 80, 7017 Flims, T 058 878 87 10

Giacometti Apotheke AG Chur, Giacomettistrasse 32, 7000 Chur, T 081 284 18 18 

Rätus Apotheke, Bahnhofstrasse 14, 7000 Chur, T 81 250 15 15

TopPharm Fortuna Apotheke Chur, Tittwiesenstrasse 55, 7000 Chur, T 081 284 20 22

Tge stoss jau prender cun mai per la vaccinaziun?

Prendai per plaschair cun Vus al termin da vaccinaziun:

• carta da l'assicuranza da malsauns
• passaport, carta d'identitad u in auter document d'identitad uffizial
• glista da diagnosas e/u da medicaments da la media u dal medi da chasa ubain da la media spezialisada u dal medi spezialisà
• attest da vaccinaziun, sche avant maun

Quant ditg dura il vaccinar?

Il vaccinar dura per regla var 30 minutas (inclusiv 15 minutas temp da paus). Quintai per plaschair avunda temp per la vaccinaziun.

Poss jau ma laschar vaccinar er tar mia media da chasa u tar mes medi da chasa?

Gea. Questas praticas pon laschar furnir quantitads da vaccins limitadas e vegnan a priorisar quellas tenor il plan da vaccinaziun chantunal.

Poss jau era ma laschar vaccinar en l’apoteca?

Gea. Singulas apotecas en il chantun sa participeschan dapi mez zercladur 2021 a la campagna da vaccinaziun. Ellas disponan d’ina quantitad da vaccins limitada e sa drizzan a la populaziun mobila davent da 18 onns.

Tge custa la vaccinaziun?

La vaccinaziun cunter COVID-19 è gratuita per la populaziun dal Grischun.

Co poss jau spustar il termin da vaccinaziun?

Ils termins per vaccinaziuns vegnan attribuids. As drizzai en cas d’impediment a la hotline da vaccinaziun via impfung@amz.gr.ch u per telefon 081 254 16 00.

Per plaschair tegnair a disposiziun las suandantas indicaziuns: num, prenum, data da naschientscha, center da vaccinaziun, spazi da temp, durant il qual in termin è suandabel.

Tenor recumandaziun dals producents e da l’Uffizi federal da sanadad publica (UFSP) sto la distanza tranter las vaccinaziuns cumpigliar almain 28 dis.

Quant savens stoss jau ma laschar vaccinar?

Per persunas cun ina malsogna confermada da Covid-19 (per test da PCR u d’antigens) vegn la vaccinaziun recumandada sis mais suenter l’infecziun, quai cun excepziun da persunas spezialmain periclitadas che duain survegnir ina vaccinaziun vinavant gia suenter trais mais. Ultra da quai vegn recumandà sulettamain ina dosa da vaccinaziun a tuttas persunas cun ina malsogna confermada da Covid-19, cun excepziun da persunas spezialmain periclitadas cun in defizienza d’immunitad che duain survegnir duas dosas da vaccinaziun.

Persunas spezialmain periclitadas che duain gia vegnir vaccinadas trais mais suenter la malsogna cun il coronavirus, duain s’annunziar per plaschair tar la hotline 081 254 16 00 u per e-mail tar impfung@amz.gr.ch.

È il vaccin segir?

Il vaccin ha survegnì l'admissiun da Swissmedic, l'Institut svizzer per products terapeutics.

Las datas disponiblas mussan en tut las gruppas da vegliadetgna in'auta efficacitad cumparegliabla ed ellas adempleschan las pretensiuns da segirezza.

Cun tge effects secundars èsi da far quint?

Ils effects secundars documentads il pli savens en ils studis d'admissiun èn cumparegliabels cun ils effects che sa mussan suenter ina vaccinaziun cunter la grippa. Suenter la segunda dosa pon quests effects secundars dentant esser pli ferms.

A tgi che survegn sintoms pli ferms u nunusitads suenter ina vaccinaziun vegni recumandà da contactar il center da vaccinaziun, l'ospital, la media u il medi ubain l'apotecra u l'apotecher.

Quant bain protegia la vaccinaziun?

Tenor las datas dals studis ch'èn vegnidas evaluadas da Swissmedic importa la protecziun da la vaccinaziun, 7 dis suenter la segunda dosa, passa 90 pertschient tar persunas creschidas. Quai vul dir: mo ina da diesch persunas vaccinadas po anc vegnir infectada. Pli bleras persunas che sa laschan vaccinar, e meglra che la protecziun è per tuts (immunitad collectiva).

Stoss jau ma laschar vaccinar?

Na, i n'exista nagina obligaziun da vaccinaziun. Mintga persuna duai decider sezza, sch'ella vul sa laschar vaccinar.

Co vegnan assegnads ils termins per la vaccinaziun?

Il program da vaccinaziun chantunal preveda duas priorisaziuns:

• Persunas sur 45 onns survegnan access prioritar tar la vaccinaziun da corona; las vaccinaziuns succedan tenor prioritad da vegliadetgna.
• Per persunas da 12 fin a 44 onns vegnan ils termins repartids tenor entrada da las annunzias.
  

Poss u duai jau ma laschar vaccinar, suenter ch'jau hai gia gì corona?

Gea. A persunas cun ina malsogna da Covid-19 confermada (per test da PCR/d’antigen) vegn recumandà da sa laschar vaccinar cunter Covid-19 sis mais suenter l’infecziun. Quai vala cun excepziun da persunas spezialmain periclitadas che duain vinavant survegnir la vaccinaziun gia suenter trais mais. Ultra da quai vegn recumandà a tuttas persunas cun ina malsogna da Covid-19 confermada be ina dosa da vaccinaziun. Exceptadas èn persunas spezialmain periclitadas cun ina defizienza d’immunitad che duain vinavant survegnir duas dosas da vaccinaziun.

Persunas spezialmain periclitadas, che duain vegnir vaccinadas gia suenter trais mais ch’ellas han patì da la malsogna cun il coronavirus, s’annunzian per plaschair tar la hotline 081 254 16 00 u per e-mail tar impfung@amz.gr.ch.

Pertge duess jau ma laschar vaccinar?

La vaccinaziun duai contribuir a la protecziun ed al mantegniment da la sanadad da la populaziun svizra. Questa finamira duai vegnir cuntanschida cunzunt tras la reducziun da la chargia da la malsogna, en spezial da cas da COVID-19 grevs e mortals. Uschia po er il provediment da la sanadad vegnir garantì vinavant. Plinavant pussibilitescha ina rata da vaccinaziun uschè auta sco pussaivel da reducir ils effects negativs che la pandemia da COVID-19 ha per la sanadad, per la psica, per la societad e per l'economia.

En cas dal coronavirus èsi necessari da vaccinar – tenor il stadi actual – 60 fin 90% da la populaziun per cuntanscher ina immunitad collectiva che permetta da stgatschar la pandemia.

Pon dunnas en speranza e mammas che tezzan lur uffants sa laschar vaccinar?

I na dat anc betg bleras datas tar la vaccinaziun da Covid-19 en la gravidanza. Nus na cussegliain la vaccinaziun generala da dunnas en speranza per il mument anc betg. Tar tschertas furmas da malsognas cronicas u tar ina ristga d’infecziun augmentada (p.ex. persunal da sanadad) cussegliain nus dentant la vaccinaziun cun ina vaccin mRNA. Era per tut las ulteriuras dunnas en speranza èsi pussaivel da sa laschar vaccinar. Discurri cun Vossa media u cun Voss medi, sche Vus essas en speranza.

Las vaccinaziuns mRNA che vegnan actualmain duvradas pon durant il temp da tezzar vegnir fatgas senza restricziun.

Pon dimorantas e dimorants temporars (p.ex. stagiunarias e stagiunaris) s’annunziar per la vaccinaziun da corona?

Lavurantas e lavurants da l’exteriur cun permissiun da dimora che vala main ditg che 3 mais (p.ex. stagiunaris) pon s’annunziar en il chantun Grischun per la vaccinaziun da corona. Per quai s’annunzian els sur la pagina-web www.gr.ch/impfen.
Lavurantas e lavurants da l’exteriur basegnan in numer d’assicuranza valaivel d’ina cassa da malsauns svizra u ina confermaziun (permissiun da dimora da la vischnanca u contract da lavur).

Pon uffants e giuvenils sa laschar vaccinar?

Dapi ils 4 da zercladur 2021 è il vaccin da Pfizer/BioNTech en Svizra permess davent da 12 onns. Il vaccin da Moderna è permess davent da 18 onns. Access prioritar a la vaccinaziun han tenor strategia da vaccinaziun da la Confederaziun vinavant persunas tenor vegliadetgna descendenta. La ristga d’ina greva malsogna da Covid-19 s’augmenta cun la vegliadetgna.

La vaccinaziun d’uffants sut 12 onns n’è per il mument betg prevesida. Las datas da studis correspundents per questas gruppas da vegliadetgna mancan da preschent. Ils vaccins da Pfizer/BioNTech e Moderna n’èn en Svizra anc betg permess per uffants sut 12 onns.

Fegl d'infurmaziun per uffants davent da 12 onns

Dumondas frequentas per uffants

Vegni a dar in attest da vaccinaziun?

Gea. Ina vaccinaziun cunter Covid-19 vegn en Svizra – sco quai ch’igl è usità tar vaccinaziuns – nudà en l’attest da vaccinaziun cun suttascripziun e bul dal medi. Uschia po ina persuna ch’è vegnida vaccinada en Svizra confermar sia vaccinaziun. Davent dals 21 da zercladur pon persunas vaccinadas far la dumonda per in certificat da Covid en furma electronica u sin palpiri: COVID-19-Zertifikat - COVID.

Po mia patruna u mes patrun ma sfurzar da ma laschar vaccinar?

En la lescha è previsa unicamain la pussaivladad d'ina obligaziun da vaccinaziun per collavuraturas e collavuraturs dals fatgs da sanadad. Per il mument na datti nagins indizis ch'il legislatur fetschia diever da questa pussaivladad.

Ulteriuras infurmaziuns:

Vaccinaziun: Uschia ans protegin nus (UFSP)

Ulteriuras infurmaziuns davart la vaccinaziun (Uffizi federal da sanadad publica)

Infoline vaccinaziun cunter COVID-19 (Uffizi federal da sanadad publica): +41 58 463 00 00 (mintga di da las 06.00 fin las 23.00)