Navigaziun principala

Cuntegn da la pagina

In tunnel sco soluziun per la via da Malögia

  • Erste Mitteilung
  • Neuen Beitrag einfügen

Per motivs da segirezza sto la via da Malögia vegnir serrada regularmain per il traffic tranter Segl e Plaun da Lej per duradas pli curtas u pli lungas. En la media dals ultims decennis èn quai stadas circa 50 uras per onn. In tunnel duai ussa schliar duraivlamain il problem. La consultaziun tar il project è averta.

Gia l'onn 2009 aveva cumenzà in lung process d'evaluaziun e da projectaziun. Ils onns 2014 e 2015 era vegnì elavurà in project general. Quel è la finala vegnì refusà, perquai che las posiziuns inoltradas en chaussa en il rom da la consultaziun respectiva han mussà ch'il project n'era betg approvabel ord vista da la protecziun da la natira e da la patria. Vegnì crititgà era cunzunt in disturbi gravant per la cuntrada da lais da l'Engiadin'Ota e per la gruppa dal Bernina.

Consultaziun davart in tunnel sco soluziun
Suenter in'ulteriura fasa d'evaluaziun ha la Regenza incumbensà l'Uffizi da construcziun bassa d'elavurar in project general per in tunnel sco soluziun. Ussa è il project avant maun e vegn suttamess a la Cumissiun federala per la protecziun da la natira e da la patria (CFNP), a la Cumissiun per la protecziun da la natira e da la patria dal Grischun (CNP), a l'Uffizi federal d'ambient, a las represchentantas ed als represchentants da las vischnancas e da las regiuns pertutgadas, a las organisaziuns economicas e turisticas, ma er a las organisaziuns per la protecziun da l'ambient, als posts chantunals spezialisads sco er a las deputadas ed als deputads da l'Engiadin'Ota e da la Bregaglia per laschar prender posiziun. La consultaziun dura fin la fin da zercladur 2021.

Il project prevesa in tunnel d'ina lunghezza da circa 2,2 kilometers. A l'ost cumenza il tunnel 170 meters suenter la rundella Segl Föglias en direcziun da Malögia. Parallelamain al tunnel da via vegn construida ina gallaria da segirezza. Quella vegn colliada sur set tunnels traversals cun il tunnel principal. Il trassé existent da la via principala tranter la rundella Segl Föglias e la colliaziun da Segl Baselgia vegn per part renatiralisà e serva vinavant sco via d'avertura per Segl Baselgia. Il traject existent da la via principala tranter la colliaziun da Segl Baselgia ed il nov portal dal tunnel al vest vegn redimensiunà e transfurmà en ina via da velos ch'è charrabla en tuttas duas direcziuns. Il project è budgetà cun custs da var 230 milliuns francs.

Suenter la consultaziun vegnan evaluadas las posiziuns. Sch'il resun da talas duess esser per gronda part positiv, vegn elavurà – en in proxim pass – il project d'exposiziun cun in rapport davart la cumpatibilitad ecologica.

Mesiras a curta vista
Perquai ch'i vegn a durar anc plirs onns fin a l'avertura d'in eventual tunnel da sviament, ha l'Uffizi da construcziun bassa incumbensà il WSL Institut per la perscrutaziun da la naiv e da las lavinas d'elavurar in concept da mesiras per ils irals da lavinas 1 fin 14 sa basond sin las enconuschientschas las pli novas en connex cun la siglientada da lavinas. Il concept prevesa d'installar il pli tard l'onn proxim sis ulteriuras pitgas per siglientar lavinas. Quai sut la premissa ch'il project necessari vegnia approvà. Plinavant vegn installà in nov sistem d'alarm en furma d'in radar da lavinas. Quel serva ad identifitgar automaticamain lavinas, e quai independentamain da las cundiziuns da vista ch'èn avant maun. Questas mesiras duain cunzunt augmentar la segirezza per las participantas ed ils participants dal traffic e sche pussaivel reducir il temp che la via è serrada.

Plan agiuntà:
Plan da survista dal traject pertutgà, inclusiv las mesiras planisadas.


Infurmaziuns: 
- president da la Regenza dr. Mario Cavigelli, Departament d'infrastructura, energia e mobilitad, tel. +41 81 257 36 01, e‑mail Mario.Cavigelli@diem.gr.ch 
- Reto Knuchel, inschigner chantunal, Uffizi da construcziun bassa, tel. +41 81 257 37 01, e‑mail Reto.Knuchel@tba.gr.ch 
- Roger Stäubli, schef da la Construcziun da vias, Uffizi da construcziun bassa, tel. +41 81 257 38 42, e‑Mail Roger.Staeubli@tba.gr.ch


Gremi: Uffizi da construcziun bassa
Funtauna: rg Chanzlia chantunala

Neuer Artikel