Navigaziun principala

Cuntegn da la pagina

Avertura da la consultaziun tar l'introducziun d'ina votaziun per correspundenza senza custs da porto

  • Erste Mitteilung
  • Neuen Beitrag einfügen

La Regenza ha dà en consultaziun la revisiun parziala da la Lescha davart ils dretgs politics (LDPC). Tras questa adattaziun da la lescha duai da nov il chantun pudair surpigliar ils custs da la votaziun per correspundenza per posta en Svizra.

En la sessiun d'october 2019 ha il deputà Roman Hug (PPS) inoltrà l'incumbensa concernent cuvertas da votaziun prefrancadas per il Grischun. Actualmain han las votantas ed ils votants grischuns la pussaivladad da votar a l'urna, ad in post inditgà da la vischnanca ubain per correspundenza (cun trametter ils documents per posta u cun metter quels en ina chascha da brevs da l'administraziun communala inditgada da la vischnanca). Per pudair votar per posta ston las votantas ed ils votants actualmain surpigliar sezs ils custs en la gronda part da las vischnancas.

Il chantun surpiglia ils custs en cas d'ina votaziun per correspundenza
Tras la revisiun parziala da la LDPC proponida duai vegnir stgaffida la basa giuridica, per ch'il chantun possia da nov surpigliar ils custs da la votaziun per correspundenza per posta en Svizra. Per quest intent duai mintgamai vegnir stampà in code Datamatrix sin l'attest da votar sut l'adressa da la vischnanca. Sch'il cedel da votar u il cedel electoral vegn tramess enavos a la vischnanca, fa la Posta in scan dal code sin l'attest da votar. Al chantun vegn messa a quint automaticamain ina francatura. Percunter na resultan nagins custs per il chantun, sch'i vegn votà sur in'autra via u sch'i na vegn insumma betg votà.

Il chantun Grischun surpiglia la francatura per ina spediziun per posta B da 0.95 francs. Quai correspunda a la pratica en auters chantuns e resguarda ch'i existan gia autras pussaivladads da votar gratuitas.

La consultaziun dura fin ils 12 da fanadur 2021. Ils documents appartegnents pon vegnir consultads sin la pagina d'internet dal chantun Grischun.


Infurmaziuns:
president da la Regenza dr. Mario Cavigelli, schef dal Departament d'infrastructura, energia e mobilitad, tel. +41 81 257 36 01, e-mail Mario.Cavigelli@diem.gr.ch


Gremi: Regenza
Funtauna: rg Chanzlia chantunala

Neuer Artikel