Navigaziun principala

Cuntegn da la pagina

Cooperaziun publica per il program d'aglomeraziun Cuira

  • Erste Mitteilung
  • Neuen Beitrag einfügen

Las lavurs vi dal program d'aglomeraziun il pli nov per las regiuns Landquart, Plessur e Plaun èn avanzadas fitg bain. Il program mussa il svilup che vegn prendì en mira a lunga vista per l'abitadi, per la cuntrada e per il sistem da traffic, ed el cuntegna numerusas mesiras per cuntanscher questas finamiras. Il proxim pass è la cooperaziun publica.

Dapi var dus onns vegn elavurà il nov program d'aglomeraziun da la 4. generaziun sut l'egida da l'Uffizi per il svilup dal territori. Las regiuns Plaun, Plessur e Landquart, ch'èn situadas en il perimeter da l'aglomeraziun, sco er las vischnancas èn involvidas e coopereschan al program.

Premissa per ina participaziun finanziala da la Confederaziun
La Confederaziun sa participescha a la finanziaziun da mesiras per meglierar l'infrastructura da traffic en citads ed en aglomeraziuns. Quai sut la premissa ch'in program d'aglomeraziun coordineschia en moda efficazia il svilup da l'abitadi e dal traffic cun la planisaziun da la cuntrada. Perquai metta er il program d'aglomeraziun Cuira il focus sin quests secturs. El cuntegna in'analisa detagliada, in maletg actualisà dal futur, il basegn d'agir, strategias parzialas sco er mesiras novas u optimadas.

Plan da mesiras bain coordinà
Las mesiras èn tematicamain vastas e repartidas sur l'entira aglomeraziun. Ils accents èn mess sin centers attractivs e sin ina moda da construir concentrada e d'auta qualitad en lieus centrals e bain cuntanschibels a Domat, a Cuira ed a Landquart. Perquai vegnan er optimadas las staziuns per pudair midar bain tren u bus, e las cundiziuns per sa trategnair a las staziuns vegnan meglieradas. Plinavant è vegnida fixada la finamira da concepir l'andament dal traffic tut en tut en ina moda che tegna quint meglier dals abitadis. Per quest intent dovri per part spustaments dal traffic, ma er mesiras da dosagi e mesiras directivas. Er la rait da vias da velo duai vinavant vegnir rinforzada e meglierada, per exempel tras ina ruta nuninterrutta da Razén fin Maiavilla.

Proxim pass: cooperaziun publica
Dals 13 d'avrigl fin ils 12 da matg 2021 ha lieu la cooperaziun publica per il program d'aglomeraziun Cuira. Ils documents pon vegnir consultads sin la pagina d'internet da l'Uffizi per il svilup dal territori. Ils conclus necessaris da las vischnancas e da las regiuns involvidas èn previs fin la fin da zercladur 2021. Il program d'aglomeraziun vegn inoltrà a la Confederaziun il settember 2021 sin basa d'in conclus da la Regenza.

Infurmaziuns:
- cusseglier guvernativ Marcus Caduff, schef dal Departament d'economia publica e fatgs socials, tel. +41 81 257 23 01, e‑mail Marcus.Caduff@dvs.gr.ch
- dr. Boris Spycher, manader da project/collavuratur scientific, Uffizi per il svilup dal territori, tel. +41 81 257 23 06, e‑mail Boris.Spycher@are.gr.ch


Gremi: Uffizi per il svilup dal territori
Funtauna: rg Uffizi per il svilup dal territori

 

Neuer Artikel