Navigaziun principala

Cuntegn da la pagina

Communicaziun da la Regenza dals 15 d'avrigl 2021

  • Erste Mitteilung
  • Neuen Beitrag einfügen

La Regenza ha approvà il project d'exposiziun per renovar e per sanar cunter canera la via dal Bernina a Campocologno en la vischnanca da Brusio. Plinavant ha ella deliberà al Parc naziunal svizzer ina contribuziun chantunala per restaurar la Chamona Cluozza. Ultra da quai sa participescha l'administraziun chantunala er quest onn puspè a "bike to work".

Approvà la renovaziun e la sanaziun cunter canera da la via dal Bernina a Campocologno

La Regenza ha approvà il project per renovar e per sanar cunter canera il traject da Campocologno da la via dal Bernina en la vischnanca da Brusio. Il traject sto vegnir sanà e renovà per differents motivs. La segirezza per las pedunas ed ils peduns n'è actualmain betg pli garantida. Ils passapes èn malgulivs e na correspundan betg pli als basegns da las persunas cun impediments. Plinavant è la cuvrida da la via en in nausch stadi ed ils conducts d'ovra èn arrivads a la fin da lur vita. Ultra da quai vegnan surpassadas las limitas d'immissiuns tar 16 objects e las valurs d'alarm per la canera da via tar 6 objects per lung da la via chantunala.

Il project prevesa da renovar la via dal Bernina sin ina lunghezza da 200 meters entaifer il vitg da Campocologno. Il vial duai survegnir ina ladezza minimala da 5,5 meters. Las vias lateralas, ils passapes, las plazzas davantvart sco er las entradas e las sortidas existentas vegnan adattadas correspundentamain al trassé nov. Per motivs da la protecziun cunter la canera vegn la sveltezza maximala signalisada reducida da 50 a 30 kilometers per ura sin in traject d'ina lunghezza da ca. 220 meters. Ils custs totals da quest project importan circa 1,6 milliuns francs.

La Regenza ha approvà il project per renovar e per sanar cunter canera il traject da Campocologno da la via dal Bernina en la vischnanca da Brusio. Il traject sto vegnir sanà e renovà per differents motivs.

Contribuziun chantunala per la Chamona Cluozza en il Parc naziunal svizzer

Per restaurar a Zernez la Chamona Cluozza inclusiv il tetg da schlondas ha la Regenza garantì al Parc naziunal svizzer tut en tut ina contribuziun chantunala da circa 160 000 francs. Ils custs totals dal project da restauraziun importan circa 2,5 milliuns francs. En connex cun questa contribuziun vegn la chamona messa da qua envi sut protecziun chantunala da monuments.

La Chamona Cluozza è ina chamona simpla en il center dal Parc naziunal svizzer en Engiadina. La chasa da laina radunda era oriundamain vegnida construida l'onn 1912 sco chamona d'ina stanza. Il concept da renovaziun prevesa da restaurar l'entir stabiliment. Sco mesira da la protecziun dal maletg dal vitg duain ultra da quai tut ils edifizis puspè vegnir cuvrids cun schlondas da lain. Quest gener da cuvrir ils tetgs caracterisescha il maletg d'entiras cuntradas en il chantun Grischun e dat al chantun in'apparientscha nunconfundibla.

Foto 1 Hütte Chamanna Cluozza Foto 2 Hütte Chamanna Cluozza

©Parc naziunal svizzer

Per restaurar a Zernez la Chamona Cluozza inclusiv il tetg da schlondas ha la Regenza garantì al Parc naziunal svizzer tut en tut ina contribuziun chantunala da circa 160 000 francs.

L'administraziun chantunala sa participescha a l'acziun "bike to work 2021"

L'administraziun chantunala sa participescha l'onn 2021 danovamain a l'acziun "bike to work" da la Pro velo Svizra. La Regenza ha surdà l'organisaziun a l'Uffizi per la natira e l'ambient, a l'Uffizi da sanadad, a l'Uffizi da persunal ed a l'Uffizi da construcziun bassa sco post spezialisà per il traffic betg motorisà. En il rom da questa acziun vegnan las collavuraturas ed ils collavuraturs envidads da sa participar ad in'equipa da quatter e da prender il velo per ir a lavurar, e quai durant almain la mesadad dals dis da lavur dals mais d'acziun. Pervia da las mesiras cunter la pandemia vertentas quintan quest onn però tut ils viadis cun il velo – tals a la plazza da lavur sco er turas privatas per sa recrear u per augmentar la fitness.

Dapi l'onn 2010 è l'administraziun chantunala dal Grischun sa participada mintga onn a questa acziun. Il dumber creschent da participantas e participants ed il dumber da kilometers fatgs mussan ch'il velo daventa adina pli bainvis er tar las collavuraturas ed ils collavuraturs chantunals.

L'administraziun chantunala sa participescha l'onn 2021 danovamain a l'acziun "bike to work" da la Pro velo Svizra.

Entrada en vigur da la revisiun parziala da la Lescha davart la protecziun civila dal chantun Grischun

La revisiun parziala da la Lescha davart la protecziun civila dal chantun Grischun, concludida dal Cussegl grond en la sessiun da december 2020, vegn messa en vigur retroactivamain per il 1. da schaner 2021.

La consequenza da la revisiun totala da la Lescha federala davart la protecziun da la populaziun e davart la protecziun civila (LPPC) è quella ch'il il dumber d'appartegnents a la protecziun civila (AdPC) è vegni reducì. La reducziun chaschunass ch'i stessan a disposiziun bler main AdPC per cas d'urgenza, sco per exempel a Bondo u per dumagnar la pandemia da COVID-19. Perquai sto vegnir chattada ina soluziun per il chantun Grischun. La revisiun da la Lescha federala davart la protecziun da la populaziun e la protecziun civila prevesa da prolungar l'obligaziun da far servetsch da protecziun civila per in temp limità. Cun la revisiun parziala da la Lescha davart la protecziun civila dal chantun Grischun fa la Regenza diever da la pussaivladad d'adattar la protecziun civila grischuna a questa nova situaziun da partenza e d'elavurar las midadas da lescha respectivas.

Neuer Artikel
Gremi: Regenza
Funtauna: rg Chanzlia chantunala dal Grischun