Tras il rinforzament da la politica chantunala d'uffants e da giuvenils vul la Regenza stgaffir cundiziuns da viver attractivas per famiglias, per uffants e per giuvenils. Entaifer il chantun vegn la politica d'uffants e da giuvenils sviluppada en moda interdepartamentala ed en collavuraziun cun vischnancas, cun acturas ed acturs privats sco er cun famiglias. Mesiras concretas resultan da l'analisa dal stadi actual e dal basegn ch'è vegnida fatga l'onn passà. La realisaziun è planisada per ils onns 2021 e 2022.
Per concepir e per sviluppar vinavant la politica chantunala d'uffants e da giuvenils vegn concedida durant ils onns 2020 fin 2022 ina finanziaziun da partenza da la Confederaziun. L'onn 2020 èn vegnids analisads il stadi actual ed il basegn en ils secturs da la promoziun, da la protecziun e da la participaziun. Sin basa da las analisas è resultada – tras ina collavuraziun interdepartamentala – la planisaziun da las mesiras per ils proxims onns.
Las mesiras cumpiglian lavurs concepziunalas strategicas, in project da pilot en il sectur da la "promoziun tempriva", optimaziuns en il sectur da la protecziun d'uffants, ma er il sustegn da projects innovativs en ils differents champs tematics da la politica d'uffants e da giuvenils.
Model directiv per la politica d'uffants e da giuvenils en il chantun Grischun
Tras il Model directiv per la politica d'uffants e da giuvenils ha gia pudì vegnir realisada ina mesira fundamentala. Il model directiv serva sco basa cuminaivla per tut las acturas ed ils acturs ch'èn activs en il chantun Grischun en la politica d'uffants e da giuvenils. El è redigì sco basa da lavur e da decisiun per temas che pertutgan la politica d'uffants e da giuvenils. Cun s'orientar tenor in model directiv cuminaivel duai vegnir garantì in proceder structurà, consistent e duraivel. Quai vala er per las mesiras che vegnan realisadas en l'entir chantun tras tut las acturas ed ils acturs che prestan ina contribuziun, per che uffants e giuvenils possian crescher si en in ambient encuraschant.
Proxims pass
EIn team da project s'occupa actualmain da l'elavuraziun d'ina strategia chantunala "Promoziun tempriva". Il team sa cumpona da persunas spezialisadas dal chantun or dals secturs furmaziun, sanadad e fatgs socials, ma er da represchentantas e represchentants da differentas vischnancas grischunas.
A medem temp vegnan las ulteriuras mesiras prendidas per mauns tenor la planisaziun. Per quest intent sa basa la Regenza vinavant sin in proceder interdepartamental e duraivel.
Agiuntas:
Model directiv per la politica d'uffants e da giuvenils en il chantun Grischun
Mesiras en il rom dal program "Politica d'uffants e da giuvenils en il chantun Grischun"
Infurmaziuns:
cusseglier guvernativ Marcus Caduff, schef dal Departament d'economia publica e fatgs socials, tel. +41 81 257 23 01 (cuntanschibel per telefon tranter las 13.30 e las 14.30), e-mail Marcus.Caduff@dvs.gr.ch
Gremi: Regenza
Funtauna: rg Chanzlia chantunala dal Grischun