Navigation

Inhaltsbereich

  • Erste Mitteilung
  • Neuen Beitrag einfügen

A partir dad oz pon tut las persunas da 16 onns e dapli sa registrar per la vaccinaziun cunter corona. A medem temp avra il nov center da vaccinaziun en la Halla da la citad da Cuira. El remplazza l'Ospital da la Crusch. Uschia pon vegnir vaccinadas dapli persunas entaifer in temp pli curt. Perquai ch'in producent è en retard cun las furniziuns, n'èn ils vaccins betg disponibels en la quantitad giavischada. Quai influenzescha negativamain il process da vaccinaziun.

La preannunzia per la vaccinaziun cunter il coronavirus è ussa pussaivla er per persunas da 16 fin 24 onns e da 25 fin 34 onns. Questas classas da vegliadetgna tutgan tar las duas ultimas gruppas da vaccinaziun. Ils termins da vaccinaziun na vegnan betg surdads immediatamain – i po dar temps da spetga fin 2,5 mais. La surdada dals termins da vaccinaziun vegn ussa priorisada tenor la vegliadetgna. Uschia vegnan er vinavant priorisadas persunas cun grevas malsognas cronicas preexistentas e persunas da 75 onns e dapli. I vegn recumandà da sa preannunziar sur la pagina d'internet (www.gr.ch/vaccinar). Persunas senza access a l'internet pon er s'annunziar sur la hotline chantunala da vaccinaziun.

La Halla da la citad da Cuira daventa in center da vaccinaziun
Per ils mais vegnints han ils producents empermess furniziuns da vaccins pli grondas. Per che las dosas da vaccinaziun possian vegnir injectadas pli svelt, vegn il center da vaccinaziun en l'Ospital da la Crusch schlià a partir da sonda, ils 24 d'avrigl 2021, e remplazzà tras in nov center en la Halla da la citad da Cuira. Là vegnan vaccinadas ils proxims dis fin 1700 persunas per di. Per pudair vaccinar entaifer curt temp uschè bleras persunas sco pussaivel n'han ins betg mo engaschà il persunal da sanadad actual, mabain er tgirunzas e tgirunzs sco er medias e medis ch'èn pensiunads u che na lavuran betg pli sin il mastergn. Ellas ed els tuts han ina scolaziun fundada en medischina u en il sectur da tgira. Plinavant vegnan adattadas las uras da manaschi, per ch'er persunas che lavuran hajan la pussaivladad da cumparair a lur termins da vaccinaziun attribuids.

Novs retards tar las furniziuns dals vaccins
Perquai ch'in producent è en retard cun las furniziuns, influenzescha quai l'urari chantunal. Per che persunas che vulan sa laschar vaccinar survegnian tuttina uschè svelt sco pussaivel ina vaccinaziun, vegnan reducids ils deposits da vaccins per las segundas vaccinaziuns. Persunas che pon cumprovar d'avair gì COVID-19, vegnan – tenor la recumandaziun da vaccinaziun da l'Uffizi federal da sanadad publica – vaccinadas da nov mo pli ina giada. In'excepziun èn las persunas cun in sistem d'immunitad supprimì u defizient.

Las infurmaziuns davart las vaccinaziuns cunter corona vegnan cumplettadas cuntinuadamain sin la pagina d'internet www.gr.ch/vaccinar.


Agiunta:
Plan da vaccinaziun (stadi: 22 d'avrigl 2021)


Infurmaziuns:
Post da communicaziun per il coronavirus dal chantun Grischun, e-mail kfsmedien@amz.gr.ch


Gremi: Uffizi da sanadad
Funtauna: Chanzlia chantunala

Neuer Artikel