En il rom da la Lescha davart la promoziun da la transfurmaziun digitala en il Grischun è vegnida fundada oz avantmezdi l'Uniun GRdigital sco organisaziun spezialisada interdisciplinara. L'uniun vegn a surpigliar en il futur incumbensas centralas per promover la digitalisaziun en il Grischun.

La Lescha davart la promoziun da la transfurmaziun digitala en il Grischun (LTD) prevesa tranter auter la furmaziun d'ina organisaziun spezialisada interdisciplinara che ademplescha incumbensas centralas per promover la transfurmaziun digitala en il Grischun. Per quest intent han differents partenaris en il sectur da la digitalisaziun fundà ensemen cun il chantun l'Uniun GRdigital. Il chantun è commember da l'uniun e vegn a fixar cun ella ina incarica da prestaziun en il rom da la surdada da las incumbensas previsas en la LTD e da lur finanziaziun.

Organisaziun spezialisada per la transfurmaziun digitala
En il barat cun las acturas ed ils acturs relevants da las differentas branschas e dals divers secturs duai l'Uniun GRdigital tractar quellas tendenzas e quels temas ch'èn relevants per il Grischun en connex cun la transfurmaziun digitala. La finamira è quella d'unir las forzas innovativas e las expertas ed ils experts da la digitalisaziun da divers secturs e da differentas branschas. Quels duain identifitgar, inizialisar, accumpagnar e coordinar projects da digitalisaziun sco er sustegnair il chantun en sias incumbensas. L'uniun duai ultra da quai examinar la realisabladad e l'efficacitad da projects da digitalisaziun e far recumandaziuns da promoziun per mauns da la Regenza.

Las commembras ed ils commembers fundaturs derivan d'in circul cun ina vasta basa da federaziuns, d'organisaziuns, d'instituziuns e da singulas interpresas da differentas branschas e da divers secturs da la vita sociala. La radunanza constitutiva è vegnida salvada – er sco ferm simbol – oravant tut en moda digitala (per video) cun var 40 persunas.

Sco commembras e commembers da la suprastanza han pudì vegnir gudagnadas las suandantas persunas (en urden alfabetic): Arnold Bachmann, Maurus Blumenthal, Yvonne Brigger, Jon Erni, Lilian Ladner, Barbara Rupf Haller e Nikolaus Schmid. Il presidi surpiglia Jon Erni. Tut las parts ch'èn interessadas vi d'ina commembranza (federaziuns, organisaziuns, instituziuns, interpresas, persunas privatas) pon ussa sa registrar sco commembras. Fin ch'il secretariat è occupà, vegn la suprastanza da l'uniun a surpigliar la fatschenta operativa. Per giuditgar projects inoltrads vegn numnà in cussegl spezialisà.

Ulteriuras infurmaziuns
Sin la pagina d'internet da l'Uniun Grdigital è descrit l'ulteriur proceder ed èn da chattar indicaziuns davart l'inoltraziun da projects. Ultra da quai datti là la pussaivladad da sa registrar sco commembra u commember nov.

Fotografia agiuntada:

Infurmaziuns:
- cusseglier guvernativ Marcus Caduff, schef dal Departament d'economia publica e fatgs socials, tel. +41 81 257 23 01, e‑mail Marcus.Caduff@dvs.gr.ch
- Jon Erni, president da l'Uniun GRdigital, tel. +41 78 844 66 09, e‑mail jon.erni@miaengiadina.ch