La Regenza ha avert l'audiziun tar la revisiun totala dals contracts normals da lavur per l'agricultura sco er per il persunal d'alp e per la pastriglia. Ils dus contracts normals da lavur dateschan da l'onn 1998 e basegnan ina revisiun. Perquai ha l'Uniun purila grischuna supplitgà l'atun 2019 da reveder ils dus contracts normals da lavur. Silsuenter èn vegnids elavurads ils dus sbozs.

Tenor il Dretg d'obligaziuns sto in contract normal da lavur vegnir publitgà avant ch'el vegn relaschà. Quai cun fixar in termin, entaifer il qual mintgin che po far valair vardaivlamain in interess, po prender posiziun en scrit en chaussa. Ultra da quai vegnan tadladas federaziuns professiunalas ed uniuns d'utilitad publica interessadas. Correspundentamain vegnan mo federaziuns u uniuns spezialas envidadas directamain da prender posiziun, entant che autras ston far valair in interess per pudair prender posiziun. L'audiziun dura fin ils 25 da fanadur 2021.

Documents d'audiziun tar la revisiun totala dals contracts normals da lavur per l'agricultura sco er per il persunal d'alp e per la pastriglia

A la vischnanca da Valsot sco vischnanca responsabla vegn concedida ina contribuziun da maximalmain 200 000 francs per realisar il concept da demontascha dals 15 da december 2019 cun las mesiras planisadas per revalitar la cuntrada da palì d'impurtanza naziunala Val Fenga. La Confederaziun ed il chantun surpiglian mintgamai la mesadad dals custs.

En la cuntrada da palì Val Fenga en l'Engiadina Bassa duain vegnir demontads ils edifizis ed ils stabiliments ch'èn vegnids duvrads oriundamain da l'Armada svizra e durant ils ultims decennis per proveder la chamona Heidelberg dal Deutscher Alpenverein cun electricitad. Tenor la descripziun en l'inventari è la cuntrada da palì Val Fenga ina da las cuntradas da vallada da palì las pli bellas e las pli aut situadas da la Svizra. La val autalpina è fitg isolada e pervia da quai restada mantegnida en in rar stadi natiral. Cun la demontascha da quests edifizis e stabiliments po vegnir cuntanschida ina revalitaziun efficazia da la cuntrada da palì.

©ARINAS environment AG

Differentas organisaziuns, instituziuns, uniuns, federaziuns e fundaziuns d'utilitad publica survegnan quest onn ina contribuziun da totalmain 364 000 francs or dal retgav da las taxas da patenta d'alcohol. Tenor la Lescha d'ustaria vegnan in terz dal retgav net dal chantun or da la taglia dal commerzi en detagl cun bavrondas destilladas duvrà per intents d'utilitad publica e dus terzs per la promoziun dal turissem.

Ultra da quai vegnan pajads ora en il chantun Grischun tut en tut 627 307 francs or da la dieschma d'alcohol da la Confederaziun. Ils meds finanzials vegnan duvrads per mesiras d'infurmaziun che duain gidar a prevegnir cunter problems d'alcohol sco er cunter l'abus da drogas, da narcotics e da medicaments. Plinavant vegnan ils meds finanzials impundids per mesiras per assister uffants e giuvenils da famiglias cun problems da dependenza d'alcohol sco er per programs che sa drizzan a gruppas da ristga. Ultra da quai vegnan cofinanziads posts da cussegliaziun spezialisads sco er instituziuns d'assistenza e da tractament per persunas dependentas d'alcohol, da tissis enivrants, da medicaments e da drogas. Tenor la Lescha d'alcohol survegnan ils chantuns 10 pertschient dal retgav net da l'Administraziun federala d'alcohol (dieschma d'alcohol).

Tenor il conclus da la Regenza vegn mintgamai in terz dal retgav or da la collecta da la Rogaziun federala 2021 attribuì a las suandantas organisaziuns: a l'Associaziun Fontana, Passugg, a l'Uniun TECUM ed a la Fundaziun Tischlein deck dich. Questas organisaziuns furneschan servetschs a favur da la populaziun grischuna ed èn spezialmain dumandadas pervia da la situaziun actuala. Il Di da la rogaziun federala è ils 19 da settember 2021. Quel di vegn fatga en tut las baselgias dal chantun ina collecta per intents d'utilitad publica. L'utilisaziun da quella vegn determinada da la Regenza. En il quint 2020 ha la collecta importà 21 000 francs. Per l'onn 2021 vegni quintà cun ina collecta da 24 000 francs.