Avant 25 onns, ils 24 da matg 1996, ha il Cussegl grond approvà l'installaziun d'in biro chantunal d'egualitad. En l'onn da giubileum sa ferma il Post da stab per l'egualitad da las schanzas per in mument e dumonda: Nua stat l'egualitad en il Grischun l'onn 2021?
Il biro chantunal d'egualitad è vegnì installà sin proposta da la Regenza ed en vista a la Lescha federala davart l'egualitad da dunna ed um ch'è entrada en vigur il 1. da fanadur 1996. Il project per installar il post da stab ed in post da mediaziun è bain vegnì acceptà unanimamain dal Cussegl grond ils 24 da matg 1996, ma ils votums cumprovan: Il tema ha occupà ils umans avant 25 onns precis sco oz. Da quel temp è l'egualitad quasi vegnida messa a pèr cun la promoziun da dunnas.
Ina societad senza rollas fixas
Bleras chaussas ch'èn vegnidas prendidas en mira avant 25 onns èn oz realitad. Ord vista giuridica èn blers obstachels vegnids eliminads, uschia che dunnas ed umens han cundiziuns generalas sumegliantas en blers secturs. L'egualitad da las schanzas n'è però betg mo ina dumonda giuridica, mabain er ina dumonda socioculturala. "Uschè ditg che rollas fixas determineschan noss sbozs da vita, na pudain nus betg sviluppar bain avunda nossas preferenzas e noss talents ed als metter a disposiziun a la societad", constatescha Barbara Wülser che maina dapi il favrer 2021 il Post da stab per l'egualitad da las schanzas. Il cusseglier guvernativ Jon Domenic Parolini è cuntent d'avair las cumpetenzas d'egualitad sut ses tetg. Il schef dal Departament d'educaziun, cultura e protecziun da l'ambient punctuescha: "L'egualitad na sa realisescha betg mo uschia, mabain sto vegnir tgirada permanentamain e sviluppada vinavant."
Il Grischun sa tschenta dumondas davart l'egualitad
Tge temas èn relevants oz e nua stat il Grischun en reguard a l'egualitad? Il team dal Post da stab per l'egualitad da las schanzas – trais dunnas ed in um – na dat (anc) naginas respostas en l'onn da giubileum, mabain rimna dumondas che vegnan sviluppadas en discurs persunals cun persunalitads tschernidas. Ils discurs e las dumondas rimnadas servan al Post da stab sco orientaziun per concepir da nov la strategia e per priorisar las activitads per ils proxims 5 onns. Ina schelta da 25 dumondas dat il Post da stab per l'egualitad da las schanzas enavos a la societad: Ellas vegnan messas en scena artisticamain sin placats, sin chartas da gieu e sin cartas postalas sco er a chaschun d'ina occurrenza da giubileum il 1. d'october 2021.
Ina versiun concisa da l'istorgia dal Biro grischun d'egualitad sa chatta (en tudestg) sin la pagina d'internet dal Post da stab per l'egualitad da las schanzas.
Fotografia agiuntada:
In team maschadà procura per dapli egualitad da las schanzas tranter dunna ed um en il Grischun: Patrizia Pavone, Susanna Mazzetta, Barbara Wülser, Nicolas Zogg (da sanestra)
Infurmaziuns:
- cusseglier guvernativ dr. Jon Domenic Parolini, schef dal Departament d'educaziun, cultura e protecziun da l'ambient, tel. +41 81 257 27 02, e-mail Jondomenic.Parolini@ekud.gr.ch
- Barbara Wülser, manadra dal Post da stab per l'egualitad da las schanzas, tel. +41 81 257 35 71, e-mail Barbara.Wuelser@stagl.gr.ch
Gremi: Departament d'educaziun, cultura e protecziun da l'ambient
Funtauna: rg Post da stab per l'egualitad da las schanzas