Navigation

Inhaltsbereich

1996

Ils 24 da matg concluda il Cussegl grond – sin proposta da la Regenza – d'installar il «Post da stab per dumondas d'egualitad». La basa furma la Lescha federala davart l'egualitad da dunna ed um, ch'entra en vigur il 1. da fanadur 1996. Sco organ consultativ da la Regenza per dumondas d'egualitad vegn nominada ina Cumissiun d'accumpagnament e d'impuls. Il 1. da november 1996 cumenza l'emprima manadra, Rita Jerjen-Habich, cun sia activitad. Ella lavura en in pensum da 70 pertschient. L'incumbensa è quella da constituir il Post da stab e da far avanzar l'egualitad en il chantun Grischun, particularmain cun furmar la conscienza per questa dumonda e cun rinforzar la confidenza en sasezzas da las dunnas.

1997

Il Post da stab vegn engrondì sin 130 pertschients da plazzas. La direcziun survegn il sustegn d'ina collavuratura scientifica e d'ina emploiada d'administraziun.

1999

Sco successura da Rita Jerjen-Habich surpiglia Sina Bardill la direcziun dal Post da stab, ed ina collavuratura giuridica vegn engaschada. Il Post da stab sviluppa da qua davent ina vasta activitad: el redigia posiziuns da consultaziun tar novas leschas e tar revisiuns da leschas, cusseglia persunas privatas en dumondas dal dretg da lavur ed en autras dumondas giuridicas, cumenza cun l'analisa da la represchentanza da las dunnas en las vischnancas, infurmescha l'administraziun e la publicitad davart la protecziun cunter mulestas sexualas e tgira la colliaziun activa tranter las dunnas e tranter las organisaziuns da dunnas.

2000

Il Post da stab va online cun sia atgna pagina d'internet www.stagl.gr.ch. Il med d'instrucziun PIAZZA ch'el ha sviluppà, accumpogna las scolas durant blers onns en la furmaziun da l'egualitad. L'analisa «Dunnas en las vischnancas dal Grischun» renda conscienta la quota da dunnas sgarschaivlamain pitschna en las autoritads communalas.

2001

Il biro d'egualitad festivescha sia existenza da 5 onns e lantscha il project da perscrutaziun «Meta – Participaziun politica da dunnas en la politica communala dal Grischun». Mintga onn ha lieu il Di naziunal da la figlia dad ussa davent er en il Grischun, a partir da l'onn 2010 sco Di naziunal da l'avegnir. L'egualitad da las schanzas en l'administraziun chantunala vegn promovida tranter auter cun introducir l'uschenumnada «regla da preferenza», tenor la quala vegnan preferidas dunnas en posts da cader, sche las candidatas han la medema qualificaziun.

2002

Cun in'occurrenza per babs metta il Post da stab novs accents. Per l'emprima giada sa participescha el – ensemen cun il Vorarlberg e cun il Liechtenstein – ad in project d'Interreg: «Surpassar cunfins – metter cunfins», ina campagna da sensibilisaziun davart la violenza envers dunnas en la lètg ed en il partenadi.

2003

Silvia Hofmann-Conrad surpiglia la direcziun dal Post da stab. L'october ha lieu a Cuira l'emprima conferenza da las presidentas communalas, a la quala prendan part 14 da las tut en tut 18 presidentas. Fin las grondas fusiuns da vischnancas l'onn 2014 cuntinuescha questa occurrenza mintga onn. Il december vegn inizià il «Project d'intervenziun grischun cunter violenza a chasa». Il project dura fin l'onn 2011 e furnescha la basa per stgaffir in post da coordinaziun «Violenza a chasa».

2004

Pervia da las mesiras da spargn ch'il Cussegl grond ha concludì, vegnan schliads il post da consultaziun per dumondas d'egualitad entaifer l'administraziun e la Cumissiun d'accumpagnament e d'impuls. Uschia surpiglia il Post da stab la cussegliaziun en cas da mulestas sexualas entaifer l'administraziun. Il studi «Meta» davart la «Participaziun politica da dunnas en la politica communala dal Grischun» ha mussà: cumbain che las dunnas s'interessan fitg per la politica communala, vegnan ellas dumandadas darar per in uffizi. Anc adina èn las dunnas suttamessas als pregiudizis tradiziunals concernent las rollas, e lur candidaturas vegnan prendidas pli criticamain sut egl che quellas dad umens. L'atun vegn lantschà il project da furmaziun «Grischun sco schanza» che scolescha persunas d'instrucziun per ina instrucziun che tegna quint da las schlattainas, e che metta a disposiziun – a partir da l'onn 2008 – unitads d'instrucziun per las differentas perspectivas da professiun e da vita da mattas e da mats.

2005

En la broschura «Cifras e fatgs. Umens e dunnas dal Grischun» publitgescha il Post da stab per l'emprima giada las inegualitads tranter dunnas ed umens, las qualas pon vegnir cumprovadas statisticamain e las qualas pertutgan ils secturs furmaziun, lavur, tegnairchasa e famiglia, entradas, tgira d'uffants, mobilitad, sanadad e politica. Uschia sa mussi per exempel che en il Grischun han trais giadas uschè blers umens ina furmaziun professiunala superiura che dunnas e che dus terzs da la lavur nunpajada vegn prestada da dunnas.

2006

Tras la reorganisaziun dals departaments che la Regenza ha concludì, vegn transferì il Post da stab dal Departament da finanzas e militar al Departament d'educaziun, cultura e protecziun da l'ambient. A medem temp mida el ses num en «Post da stab per l'egualitad da las schanzas». Quai sa basond sin la nova Constituziun chantunala ch'è entrada en vigur il 1. da schaner 2004. Quella di: «Els (il chantun e las vischnancas) s'engaschan per l'egualitad da las schanzas per tuts, spezialmain per l'egualitad da dunna ed um.» Il giubileum «10 onns biro d'egualitad» vegn festivà cun ina turnea tras il chantun.

2008

Ina retscha da referats davart la medischina tenor las schlattainas tematisescha la sanadad da las dunnas e dals umens e mussa, quant impurtant ch'igl è da resguardar la perspectiva tenor las schlattainas per la qualitad dal provediment medicinal da la populaziun e per concepir las purschidas e la politica da sanadad. La retscha da referats è ina part d'in project d'Interreg e dura fin l'onn 2014.

 

2009

L'exposiziun ambulanta «Famiglia & professiun en ballantscha» va sin viadi tras il Grischun.

2010

Cun in program d'acziun da plirs onns motivescha il Post da stab interpresas pitschnas e mesaunas, uschenumnadas IPM, da meglierar la cumpatibilitad da la famiglia cun la professiun en lur manaschis. Fin l'onn 2021 realiseschan 26 interpresas cun tut en tut 2000 collavuraturas e collavuraturs var 1000 mesiras singulas en trais ciclus.

2012

Il 1. Parlament da mattas dal Grischun permetta a 120 dunnas giuvnas tranter 13 e 16 onns da far emprimas experientschas cun la lavur parlamentara. Ellas survegnan il sustegn da commembras e commembers dal Cussegl grond ch'èn en funcziun sco menturas e menturs. Da qua davent ha lieu il Parlament da mattas mintga 3 fin 4 onns. Per l'emprima giada sa participescha il Post da stab a la fiera da tscherna da professiun «Fiutscher» che ha lieu mintga 2 onns.

2015

Il «Lohnmobil» è en gir tras il Grischun fin l'onn 2016 e renda attent en moda divertenta e nunconvenziunala al dretg ch'è fixà en la Constituziun svizra, da survegnir il medem salari per la medema lavur. Il project vegn purtà da la Conferenza per l'egualitad da las schanzas da la Svizra orientala e dal Liechtenstein.

Il project d'Interreg «Frauen entscheiden» documentescha fin l'onn 2017 la sutrepreschentanza da «Dunnas en posiziuns da decisiun e da cader» e la «Preschentaziun da dunnas en posiziuns da cader en las medias».

2016

A chaschun da sia existenza da 20 onns edescha il Post da stab per l'egualitad da las schanzas ina broschura che cuntegna ina retrospectiva ed ina perspectiva da l'egualitad en il Grischun e da las activitads dal Post da stab.

2017

Tamara Gianera surpiglia la direcziun dal Post da stab per l'egualitad da las schanzas.

2019

Per l'emprima giada collavura in um en il team dal Post da stab. En collavuraziun cun il Center per management d'administraziun da la Scola auta spezialisada dal Grischun vegn lantschada la retscha da curs per dunnas en la politica ed en l'administraziun.

2020

En collavuraziun cun il Center per management d'administraziun da la Scola auta spezialisada dal Grischun e cun 4 ulteriurs biros d'egualitad chantunals vegn lantschà il project da 2 onns PROMO Femina che vul guidar dapli dunnas en la politica communala.

2021

Durant l'onn da giubileum suonda Barbara Wülser sco nova manadra dal Post da stab. Il team fa var 30 discurs cun persunalitads elegidas davart il stadi da l'egualitad en il Grischun e rimna dumondas en chaussa. Questas dumondas vegnan messas en scena da dus acturs a chaschun d'ina occurrenza da giubileum che ha lieu il 1. d'october e derasadas tras placats, tras cartas postalas e tras chartas da gieu. Il fanadur vegn lantschà «egual21 – egualitad en l'administraziun». Il project che dura 4 onns resulta dal «Plan d'acziun per l'egualitad en l'administraziun chantunala», ch'è vegnì acceptà dal Cussegl grond l'onn 2019 suenter il Di da chauma da las dunnas.

2022

Per il giubileum da 50 onns dal dretg chantunal da votar e d’eleger han gì lieu la producziun «Vuschs visiblas». L’avrigl 2022 è vegnida publitgada l’emprima survista davart la situaziuna d’egualitad actuala en l’administraziun chantunala. Per s’orientar e priorisar la lavur d’egualitad ha il post da stab per l’egualitad da las schanzas elavurà in document strategic cun tschintg accents tematics: societad, politica, mund da lavur, furmaziun e professiun sco er violenza e schlattaina.

2023

In punct central è l'elavuraziun dal «Plan d'acziun per l'egualitad en l'administraziun chantunala» (egual21). El vegn deliberà il zercladur da la Regenza e prenda suenter schlantsch. Il schaner cumenza a Soglio en la Bregaglia la retscha d'occurrenzas «PROMO Femina on Tour – dunnas en la politica communala». Ensemen cun la Scola auta spezialisada dal Grischun vegnan ils resultats dal project «PROMO Femina» purtads en las regiuns e valurisads. In accent metta il post da stab il november cun l'occurrenza «StadTraum» en la Biblioteca da la citad davart planisar e construir resguardond il gender ed il mintgadi.

 

Bild
Stimmperformance «Vuschs visiblas – Visible Voices», Uraufführung am 5. März 2022 in Chur. v.l.n.r. Ursina Giger, Annika Hunziker, Anna Kühn, Wanda Wylowa

 

Manadras dal Post da stab

Rita Jerjen-Harbach (1996-1998), Sina Bardill (1998-2002), Silvia Hofmann Auf der Maur (2003-2016), Tamara Gianera (2016-2020), Barbara Wülser (2021-actual)

Collavuratur dal Post da stab 

collavuratur(a)s actual(a)s: Susanna Mazzetta, Miriam Erni, Patrizia Pavone, Yara Annina Branger (Praktikantin)

Anteriur(a)s collavuratur(a)s: Claudia Meili, Alessandra Gartmann, Bettina Joos, Doris Caviezel-Hidber, Karin Reich, Silvia Graf-Frey, Nicolas Zogg, Chantal Wernli (Praktikantin), Annika Abplanalp (Praktikantin), Giulia Cathomen (Praktikantin)