Il Post da stab per l'egualitad da las schanzas collavura cun differentas organisaziuns, uniuns, instituziuns e persunas privatas. Lur finamiras e lur rollas èn fitg differentas. Communabla è lur finamira da sensibilisar per ils dretgs da las dunnas, per las rollas da las schlattainas e per ina politica d'egualitad sco er da represchentar ils interess da dunnas, d'umens e/u d'umans nunbinars ch'èn politicamain activs e/u che han in'activitad da gudogn, e quai independentamain da lur schlattaina. Fin ussa èn las raits per dunnas en il Grischun en la maioritad. Sut il champ tematic Expertas & raits chattais Vus ulteriuras raits naziunalas ed internaziunalas ch'èn activas en quest champ tematic, ma che na collavuran dentant betg directamain cun il Post da stab dal chantun Grischun.
Center per management d'administraziun da la SASGR
Il Center per management d'administraziun (CMA) promova l'agir d'interprendider en l'administraziun publica ed en organisaziuns senza profit (NPO) cun la finamira d'augmentar l'effizienza e l'effectivitad. En quest connex intermediescha el savida applitgada, sviluppa soluziuns praticas per la gestiun publica e perscrutescha en intgins puncts centrals – en spezial davart il management da vischnancas.
Centrala grischuna da dunnas
La Centrala grischuna da dunnas è vegnida fundada l'onn 1939 sco federaziun da tetg da las organisaziuns grischunas da dunnas. En quest connex sa tracti d'ina uniun d'utilitad publica ch'è independenta da las partidas politicas sco er confessiunalmain neutrala. La Centrala da dunnas dispona d'ina gronda rait da commembras e commembers collectivs, da commembras e commembers singuls, da commembras fauturas e commembers fauturs communals sco er da commembras e commembers d'onur.
La finamira da la Centrala grischuna da dunnas è la promoziun e la renconuschientscha da l'egualitad tranter dunnas ed umens en il mund da lavur, en la famiglia, en la politica ed en la societad.
Per quest intent collavuran ellas cun politicras e politichers, cun autoritads e cun instituziuns grischunas sco er cun ulteriuras organisaziun da dunnas dal Grischun e da la Svizra.
Biblioteca da la citad da Cuira
https://www.bibliochur.ch/
L'onn 2018 èn vegnidas reunidas las bibliotecas vertentas Arcas ed Aspermont. Uschia è vegnì creà in lieu central per scuntrada, barat ed emprender. La biblioteca porscha in'infrastructura moderna en l' entira chasa e cun in agen emprest, cun automat da restituziun, cun plazzas da lavur cun access a l'internet sco er cun WLAN. In regal da cudeschs, l'uschenumnada biblioteca da las schlattainas, vegn manà dal post da stab per l'egualitad da las schanzas e dat invistas captivantas en ils temas d'egualitad.
Ultra da quai porscha la biblioteca da la citad in local d' occurrenzas per 70 persunas che vegn duvrà mintga onn er dal post da stab per l' egualitad da las schanzas per ina discussiun u per in'occurrenza.
Center UND
Il Center UND è il center da cumpetenza directiv en Svizra per realisar la cumpatibilitad da lavur da famiglia e d'activitad da gudogn.
El sa drizza a persunas privatas, ad expertas ed experts sco er ad organisaziuns e promova la cumpatibilitad sin plaun individual, manaschial e social. Il post spezialisà s'engascha per l'egualitad effectiva da dunna e d'um en la lavur pajada sco er betg pajada e s'engascha per ina chapientscha da la lavur, nua che l'activitad da gudogn, la lavur da famiglia e la lavur voluntara èn equivalentas.
jugend.gr
https://jugend.gr/
La Federaziun tetgala da la promoziun d'uffants e da giuvenils dal Grischun fundada l'onn 2005 ha la finamira ch'i duajan resultar purschidas da la promoziun d'uffants e da giuvenils en tut las regiuns dal Grischun. jugend.gr maina er diversas gruppas d'expertas e d'experts che servan al barat ed a l'ulteriur svilup da la promoziun d'uffants e da giuvenils en il chantun Grischun. Ses temas sa drizzan als basegns ed als interess da las persunas che lavuran cun giuvenils en il chantun. Actualmain exista la gruppa d'expertas e d'experts gender.
Post da coordinaziun violenza a chasa
Post da coordinaziun violenza a chasa
Il post da coordinaziun violenza a chasa s'engascha en il chantun Grischun per ina collavuraziun interdisciplinara e professiunala da tut las autoritads ed instituziuns ch'èn activas en il sectur da la violenza a chasa.
Agid a victimas dal Grischun
L'agid a victimas dal Grischun cusseglia e sustegna dunnas, umens, uffants e giuvenils ch'èn pertutgads da violenza. Ei vegn cussegliu gratuitamain, en moda confidenziala e sin giavisch anonimamain.
Chasa per dunnas dal Grischun
https://www.frauenhaus-graubuenden.ch/
La chasa per dunnas dal Grischun porscha accoglientscha e protecziun, assistenza e cussegliaziun a dunnas, a lur uffants ed a giuvnas ch'èn pertutgadas da violenza a chasa. La chasa per dunnas è averta per victimas da mintga naziunalitad.
Cussegliaziun da babs
Cussegliaziun da babs
La cussagliaziun per babs porscha sustegn da daventar bab u esser bab.
Collectiv da la chauma da dunnas dal Grischun
Il Collectiv da la chauma da dunnas è sa furmà en connex cun la chauma impressiunanta ils 14 da zercladur 2019. Bleras dunnas motivadas vulan er cumbatter suenter il grond di da chauma per dapli egualitad en il chantun Grischun. Dal collectiv resultan regularmain gruppas da lavur productivas che tractan temas divers e surpiglian quels en moda effectiva e nuncumplitgada, per exempel medias, svilup urban u politica communala.
Archiv grischun per la cultura da las dunnas
L'Archiv grischun per la cultura da las dunnas è ina fundaziun privata e d'utilitad publica ed è vegnì fundà l'onn 1997 da Silvia Hofmann e da Silke Margherita Redolfi. L'incumbensa da l'Archiv grischun per la cultura da las dunnas è da rimnar ils documents e las materialas da e per dunnas en il Grischun e d'als render accessibels a la publicitad. El maina in archiv ed ina biblioteca, porscha occurrenzas e fa projects scientifics davart l'istorgia da las dunnas en il Grischun.
Conferenza svizra da las delegadas a l'egualitad tranter dunnas ed umens CSDE
La Conferenza svizra da las delegadas a l'egualitad tranter dunnas ed umens è la fusiun dals posts spezialisads e dals biros publics per l'egualitad tranter dunna ed um da la Confederaziun, dals chantuns e da las citads. Las activitads da la Conferenza svizra da l'egualitad tranter dunnas ed umens han la finamira da persequitar ina politica d'egualitad coerenta a lunga vista en Svizra.
La CSDE procura per il barat da dumondas d'egualitad tranter la Confederaziun, ils chantuns sco er las citads e sa participescha sin plaun spezialisà cun posiziuns en consultaziuns federalas.
Conferenza per l'egualitad da las schanzas da la Svizra orientala e dal Principadi da Liechtenstein
La Conferenza represchenta en ses intschess stgars 1 milliun persunas cun lur finamiras en connex cun l'egualitad da las schanzas, en connex cun l'egualitad tranter dunna ed um sco er en connex cun la concepziun da vita da dunnas e d'umens. Ella è ina plattafurma da barat ed ina rait per sias commembras e ses commembers e per circuls interessads. Cun sia lavur dat ella ina vusch al tema e sa participescha a la furmaziun da l'opiniun da la politica sociala en la Svizra orientala ed en il Principadi da Liechtenstein, quai cun furmaziuns supplementaras, cun projects e cun occurrenzas.
Rait da quatter pajais
Il cumenzament dals onns 90 è sa furmada ina rait tranter ils posts da dunnas ed ils posts d'egualitad en la regiun da cunfin dals trais pajais (Baden-Württemberg, Svizra tudestga ed Austria). Cunzunt las represchentantas dals posts da dunnas e dals posts d'egualitad da Constanza, da Turitg, dal Vorarlberg e dal Principadi da Liechtenstein èn sa scuntradas ed han realisà ch'ils medems obstachels e las difficultads identicas las univa suror ils cunfins en la politica da dunnas. Dapi l'onn 1999 dovran ils posts da dunnas ed ils posts d'egualitad en la regiun da cunfin dals trais pajais il program Interreg per realisar cuminaivlamain projects d'egualitad da dunnas e d'umens e per er francar quels persistentamain.
Uffizi federal per l'egualitad tranter dunna ed um UFEG
https://www.ebg.admin.ch/ebg/de/home.html
L'Uffizi federal per l'egualitad tranter dunna ed um UFEG è in uffizi en il Departament federal da l'intern. Il scumond da discriminaziun legal e la purschida eguala furman la basa per las activitads dal UFEG. Las activitads dal UFEG han l'intent da realisar l'egualitad giuridica ed effectiva. Ellas èn divididas en ils secturs dretg, lavur, violenza ed agids finanzials.