Dapi ch'igl exista il post da stab per l'egualitad da las schanzas, l'onn 1996, s'engascha il chantun Grischun en il cumbat cunter la discriminaziun pervia da la schlattaina, per meglras schanzas da svilup e per dapli pussaivladads da tscherna da mattas e mats, da dunnas ed umens en il Grischun.

La via vers l'egualitad è in process che sto vegnir percurrì da dunnas ed umens cuminaivlamain.

Sco center da cumpetenza central dal chantun Grischun è il post da stab cumpetent per promover, per realisar e per garantir l'egualitad da las schanzas da dunna ed um en tut ils secturs da la vita.

- El elavura las infurmaziuns da basa, meglierescha la basa da las datas ed evaluescha ils resultats pertutgant ils deficits da l'egualitad da las schanzas da dunna ed um en il chantun Grischun. Ils resultats vegnan publitgads.

- El integrescha enconuschientschas spezialisadas en las fatschentas, en ils projects ed en las proceduras da legislaziun da l'administraziun chantunala e sviluppa concepts, strategias ed instruments concrets en secturs politics che han effects externs.

- El è in post public da documentaziun e da cussegliaziun e promova l'infurmaziun e la sensibilisaziun da l'entira populaziun per dumondas da l'egualitad.

- El promova e sustegna ina politica da persunal orientada a l'egualitad da las schanzas per las collavuraturas ed ils collavuraturs da l'administraziun chantunala.

- El è participà a las posiziuns ed a las consultaziuns davart projects chantunals e federals ch'èn relevants per l'egualitad.

- El appartegna a tut las raits regiunalas, naziunalas ed internaziunalas che s'occupan da l'egualitad da las schanzas.