Navigation

Inhaltsbereich

Il DGSS interroghescha las collavuraturas ed ils collavuraturs

  • Erste Mitteilung
  • Neuen Beitrag einfügen

Il Departament da giustia, segirezza e sanadad (DGSS) ha infurmà sias var 1100 collavuraturas e collavuraturs ch'i dettia l'atun per l'emprima giada in'enquista da las collavuraturas e dals collavuraturs. Cun quest instrument directiv ch'è sa cumprovà en blers lieus vegnan consultads tranter auter il clima da lavur, l'attaschadadad al patrun, las pussaivladads da svilup e la cultura da sbagls. Plinavant vegnan rimnadas experientschas en connex cun la superaziun da la pandemia dal coronavirus. Questas experientschas vegnan francadas per sfidas futuras Per far l'enquista anonima è vegnida incumbensada ina interpresa spezialisada externa.

Il DGSS introducescha da nov in instrument directiv impurtant ch'è sa cumprovà en blers lieus. Cun l'enquista da las collavuraturas e dals collavuraturs vegnan tut las collavuraturas ed ils collavuraturs interrogads periodicamain davart il clima da lavur, davart l'attaschadadad al patrun, davart la cuntentientscha cun l'infrastructura a la plazza da lavur, davart las pussaivladads da svilup sco er davart la cultura da direcziun e da sbagls. «Ils resultats permettan a la direcziun dal departament, als manaders dals uffizis sco er a las persunas directivas da trair a niz las fermezzas e da prender per mauns cun cleras finamiras eventualas optimaziuns, uschia che lur incumbensas a favur da la populaziun pon vegnir ademplidas optimalmain e cun collavuraturas e collavuraturs motivads ed engaschads», ha accentuà il cusseglier guvernativ Peter Peyer.

Sentir il puls da las collavuraturas e dals collavuraturs
Il DGSS stat ussa dapi stgars dus onns e mez sut la direcziun dal cusseglier guvernativ Peter Peyer. Ina gronda part da quest temp è stada caracterisada da la superaziun da la pandemia dal coronavirus, ch'è stada ina gronda sfida per bleras collavuraturas e blers collavuraturs e per numerus posts da servetsch. Dapi il cumenzament da ses temp d'uffizi ha il schef dal departament bain fatg baininqual visita tar ils uffizis sco er tar las collavuraturas ed ils collavuraturs cun l'intent da far lur enconuschientscha e da survegnir a medem temp ina impressiun dal grad da cuntentientscha en la lavur. Ma dapi il cumenzament da la pandemia dal coronavirus èn las pussaivladads da visita stadas restrenschidas. Per tuttina survegnir ina survista da la situaziun da las collavuraturas e dals collavuraturs ha Peter Peyer decidì da far enquistas regularas e professiunalas entaifer l'entir departament. Ina lavur satisfaschanta, in bun clima da lavur, l'attaschadadad al patrun, ina buna infrastructura a la plazza da lavur, ina cultura da direcziun e da sbagls constructiva e.u.v. èn elements centrals, per che l'administraziun chantunala possia ademplir optimalmain sias incumbensas a favur la populaziun. Per il schef dal DGSS èsi impurtant da savair, sche las premissas respectivas èn ademplidas. «Plinavant ston las enconuschientschas positivas en connex cun la pandemia vegnir francadas per sfidas futuras», ha ditg il cusseglier guvernativ Peter Peyer.

In instrument directiv cumprovà
Enquistas da collavuraturas e collavuraturs èn in instrument directiv prezius e cumprovà ch'è instituziunalisà tant en auters chantuns sco er en l'economia privata. Las enquistas n'èn betg in "instrument da surveglianza" che sa basa sin disfidanza. Anzi, ils resultats duain mussar, nua ch'i dat fermezzas ed eventualas deblezzas e tge facturs che influenzeschan il success d'ina buna administraziun. Uschia survegnan las persunas dal cader in instrument directiv impurtant per pudair concepir anc meglier la lavur quotidiana. Da quai profitan tut ils posts da servetsch dal DGSS ed er la populaziun.

Il DGSS vegn a realisar per l'emprima giada ina tala enquista tar tut ses uffizis. Per quest intent ha il schef dal departament incumbensà la firma "empiricon" che ha blera experientscha en quest sectur. Per preparar l'enquista han ins nominà ina gruppa centrala sut la direcziun dal schef dal departament ed infurmà gia ordavant la Federaziun dal persunal chantunal e l'Associaziun da la Polizia chantunala. Tuttas duas organisaziuns sustegnan il project.


Infurmaziuns:
cusseglier guvernativ Peter Peyer, schef dal Departament da giustia, segirezza e sanadad, tel. +41 81 257 25 01, e‑mail Peter.Peyer@djsg.gr.ch



Gremi: Departament da giustia, segirezza e sanadad
Funtauna: rg Departament da giustia, segirezza e sanadad

Neuer Artikel