Navigation

Inhaltsbereich

  • Erste Mitteilung
  • Neuen Beitrag einfügen

Suenter ils onns 2010 e 2016 ha la Ernst & Young SA (EY) preparà per la terza giada – per incumbensa da la Regenza – in rapport da ristga e da responsabladad concernent la garanzia chantunala dal Grischun per la Banca chantunala grischuna (BCG). La societad d'audit è vegnida a la conclusiun «ch'in cas da responsabladad dastga vegnir valità vinavant sco fitg improbabel sut las supposiziuns exprimidas». La Regenza e la BCG èn fitg cuntentas cun la valitaziun dals experts independents. La BCG è chapitalisada surproporziunalmain bain ed è ina banca fitg segira.

La Regenza ha incumbensà la EY da valitar da nov la situaziun da ristga e da responsabladad dal chantun Grischun areguard la garanzia chantunala per la BCG. L'ultima giada è ina tala valitaziun vegnida fatga l'onn 2016. La midada da l'activitad commerziala, la creschientscha da la banca cun ina summa da bilantscha da passa 30 milliardas francs, ils conturns dals tschains negativs istoricamain bass sco er la pandemia dal coronavirus èn stads tranter auter arguments che han recumandà da valitar da nov la ristga areguard la garanzia chantunala.

La BCG è vinavant ina banca fitg segira
La BCG ha ina substanza ordvart ferma ed è ina banca chapitalisada surproporziunalmain bain. La substanza da ristga ha importà per ils 31-12-2020 2,6 milliardas francs en furma d'agens meds imputabels. En la cumparegliaziun da la branscha e spezialmain er tranter las bancas chantunalas ha la BCG in fitg aut grad da cuvrida dals agens meds. La quota da l'agen chapital da basa (CET-1-ratio) da 20,4 pertschient è levamain sur la valur mesauna definida dal cussegl da banca da 17,5 fin 22,5 pertschient e cleramain sur la valur prescritta da l'Autoritad federala per la surveglianza dals martgads da finanzas (FINMA) da 12,0 pertschient.

Cas da responsabladad per il chantun fitg improbabel
Il Rapport da ristga e da responsabladad 2021 cuntegna in'analisa da la situaziun da ristga da la BCG areguard in'eventuala responsabladad dal chantun. La EY constatescha ch'ils agens meds da la banca sajan creschids vinavant envers il rapport 2016 tant en moda absoluta sco er en cumparegliaziun cun las activas reglamentaras graduadas tenor las ristgas da la banca, e che l'abilitad da supportar ristgas ch'exista en la banca, permettia da cumpensar las perditas potenzialas en in scenari negativ per ella. "L'analisa mussa ch'in cas da responsabladad dastga vegnir valità vinavant sco fitg improbabel sut las supposiziuns exprimidas", constateschan ils experts.

La dotaziun da chapital fitg solida da la BCG dat gronda segirezza a la clientella d'ina vart ed al chantun sco proprietari e garant da l'autra vart. Cun plaschair ha la Regenza prendì enconuschientscha dal Rapport da ristga e da responsabladad 2021, ed ha approvà a medem temp il Rapport da fatschenta e da persistenza 2020 da la BCG.


Infurmaziuns:
- cusseglier guvernativ dr. Christian Rathgeb, schef dal Departament da finanzas e vischnancas, tel. +41 81 257 32 01, e‑mail Christian.Rathgeb@dfg.gr.ch
- Peter Fanconi, president dal cussegl da banca da la Banca chantunala grischuna, tel. +41 81 256 96 01, e‑mail Peter.Fanconi@gkb.ch


Gremi: Regenza
Funtauna: rg Departament da finanzas e vischnancas

Neuer Artikel