A partir d'immediat pon tut ils giuvenils a partir da 12 onns s'annunziar per la vaccinaziun cunter corona. Ella vegn recumandada a tut ils giuvenils da 12 fin 15 onns che vulessan sa laschar vaccinar per sa proteger cunter ina infecziun. Plinavant ha l'Uffizi da sanadad lantschà ina campagna chantunala da communicaziun per motivar en il chantun Grischun uschè bleras persunas sco pussaivel da sa laschar vaccinar.

Las experientschas durant la pandemia da COVID-19 han mussà che uffants e giuvenils èn exponids mo ad ina pitschna ristga da s'infectar grevamain cun COVID-19. La gronda part da las infecziuns passan senza sintoms u han in decurs miaivel. Tuttina duain er umans giuvens survegnir la pussaivladad da sa proteger cun ina vaccinaziun.

Recumandada vegn la vaccinaziun cunzunt a giuvenils ch'èn gia engrevgiads fermamain pervia d'ina malsogna cronica e che vulessan impedir tant sco pussaivel mintga ulteriura infecziun. D'avantatg è ina vaccinaziun cunzunt per tut quels che abitan ensemen cun ina persuna cun in sistem d'immunitad indeblì. Sco vaccin cunter COVID-19 per giuvenils a partir da 12 onns è admess en Svizra fin ussa mo il vaccin da Pfizer/BioNTech. Quel vegn applitgà actualmain mo en il center da vaccinaziun en la Halla da la citad da Cuira. Per quest motiv vegnan planisads – tut tenor il dumber d'annunzias – dis da vaccinaziun spezials en las regiuns per giuvenils a partir da 12 onns. Uschia poi plinavant vegnir garantì che medias e medis d'uffants èn preschents per ils discurs da cussegliaziun. L'annunzia vegn fatga sur la pagina d'internet dal chantun www.gr.ch/vaccinar.

Termins da vaccinaziun en l'avegnir er per persunas extrachantunalas
La vaccinaziun cunter COVID-19 stat a disposiziun en il Grischun en l'avegnir a tut las abitantas ed ils abitants da la Svizra. Admess en Svizras e Svizzers sco er persunas cun permissiuns L, B e C. Collavuraturas e collavuraturs che lavuran main che 3 mais en la regiun, ston preschentar ina conferma da lavur per il termin da vaccinaziun. Persunas cun ina permissiun G (cunfinarias e cunfinari) n'èn betg admess a la vaccinaziun en il Grischun; ellas els stuessan sa laschar vaccinar en lur pajais d'origin. In'excepziun èn las cunfinarias ed ils cunfinaris che lavuran sco persunas spezialisadas en il sectur da sanadad: ellas ed els pon sa laschar vaccinar en Svizra. Persunas vaccinadas cumplettamain survegnan sin dumonda il certificat COVID da la Confederaziun. L'efficacitad da la vaccinaziun ed uschia la valaivladad dal certificat èn vegnidas prolungadas da 6 a 12 mais dapi l'ultima vaccinaziun. Plinavant pon ussa persunas guaridas sa laschar vaccinar gia pli baud. Ina vaccinaziun è da nov pussaivla gia 4 emnas suenter ch'ina infecziun cun il coronavirus è vegnida confermada. Per questas persunas basta ina dosa da vaccinaziun.

L'annunzia per ina vaccinaziun cunter il coronavirus è vinavant pussaivla sur la pagina d'internet www.gr.ch/vaccinar.

Campagna chantunala da communicaziun
Fin ussa èn vegnidas injectadas en il Grischun passa 156 000 vaccinaziuns cunter corona. Per motivar en il chantun Grischun er vinavant uschè bleras persunas sco pussaivel da sa laschar vaccinar ha l'Uffizi da sanadad lantschà ina campagna da communicaziun. Quella cumplettescha la campagna d'infurmaziun currenta da la Confederaziun. La campagna trilingua sa drizza en emprima lingia a persunas pli giuvnas ed a persunas da vegliadetgna mesauna, cunquai che la vaccinaziun cumplessiva da las persunas pli veglias è avanzada bain. Ils motivs da la campagna cun la missiva "Jau sun vaccinà, perquai…" vegnan plazzads principalmain en las medias socialas, en il sectur public (out of home) sco er sin portals online tschernids.

Agiunta:

Infurmaziuns:
Post da communicaziun per il coronavirus dal chantun Grischun, e-mail kfsmedien@amz.gr.ch, tel. +41 79 716 22 95 (exclusivamain per collavuraturas e collavuraturs da las medias)

Responsabladad: Uffizi da sanadad