Durant l'onn da scola passà ha l'instrucziun en il Grischun pudì avair lieu sco usità en scola. Quai è d'engraziar a l'engaschament cuminaivel e professiunal da la scola populara en il chantun. Uschia han las scolaras ed ils scolars pudì mantegnair in zic normalitad en il mintgadi.

Las vacanzas da stad cumenzan ussa en il Grischun e per las scolas popularas finescha in onn da scola 2020/21 pretensius. Il medem mument dastgan scolaras e scolars, geniturs e persunas responsablas per l'educaziun, persunas d'instrucziun, direcziuns da scola ed autoritads da scola guardar enavos sin in temp reussì, cunquai che l'instrucziun ha per il solit pudì avair lieu en scola. «Il contact direct, persunal tranter ils uffants e giuvenils e la persuna d'instrucziun è da gronda impurtanza», ha punctuà Chantal Marti-Müller, manadra da l'Uffizi per la scola populara ed il sport. Grazia al fatg ch'ils purtaders da scola èn stads ordvart pronts da sa participar als tests en las scolas e tras quai che las mesiras da protecziun èn vegnidas realisadas da maniera consequenta, èsi gartegià d'identifitgar svelt las infecziuns cun il coronavirus, d'interrumper las chadainas da transmissiun ed uschia da mantegnair l'instrucziun da preschientscha.

Grond engraziament a las scolas
Per la finiziun da l'onn da scola vuless l'Uffizi per la scola populara ed il sport profitar da l'occasiun per engraziar cordialmain a tut las persunas involvidas en la scola populara – cunzunt er a las persunas d'instrucziun sco er a las scolaras ed als scolars – per lur engaschament extraordinari tar la realisaziun da las mesiras cunter COVID-19 durant l'onn da scola passà.

Durant la stad vegn l'uffizi ad observar vinavant la situaziun pandemica. Avant il cumenzament da l'onn da scola 2021/22 vegn el ad infurmar las scolas cun in'ulteriura brev d'infurmaziun «Scola malgrà corona» davart las mesiras da protecziun che valan alura e davart ils detagls dals tests en las scolas.

Agiunta / fotografia agiuntada:

© Ralph Feiner

Infurmaziuns:
dr. Chantal Marti-Müller, manadra da l'uffizi, Uffizi per la scola populara ed il sport, tel. +41 81 257 27 50, e‑mail Chantal.Marti@avs.gr.ch

responsabladad: Uffizi per la scola populara ed il sport