Per bleras scolaras e blers scolars èn ils 9 da favrer ed ils 9 da mars 2021 stads dis spezials. Quels dus dis han gì lieu ils examens d'admissiun chantunals per entrar en ina scola media grischuna. Tut en tut han 504 giuvenils dumagnà l'admissiun ad ina da las nov scolas medias grischunas cun las partiziuns gimnasi, scola media commerziala e scola media spezialisada.

Grazia a l'applicaziun da mesiras da protecziun severas han las sessiuns d'examen da quest onn en las scolas medias grischunas pudì vegnir manadas tras sut cundiziuns regularas, malgrà che la pandemia dal coronavirus dura anc adina. Tut en tut han 779 scolaras e scolars frequentà ils examens d'admissiun chantunals en ina da las totalmain nov scolas medias grischunas. L'onn precedent eran quai 800 candidatas e candidats. Legraivlamain han mo 16 candidatas e candidats stuì absolver ils examens supplementars dals 9 da mars 2021 e dals 11 da matg 2021 pervia d'ina malsogna u pervia d'in accident.

Passa 500 novas scolaras e novs scolars da scola media
Da 365 scolaras e scolars da la 6. classa primara han 219 (60 pertschient) reussì l'admissiun a la 1. classa dal gimnasi da 6 onns (uschenumnà gimnasi da lunga durada). 146 (40 pertschient) n'han betg gì success. Areguard il total da scolaras e scolars da la 6. classa primara (1697) importa la quota da giuvenils admess a la 1. classa dal gimnasi da lunga durada 12,9 pertschient. La quota da l'onn precedent (13,1 pertschient) è stada levamain pli auta.

Da las 414 scolaras e scolars che han fatg quest onn l'examen unifitgà per l'admissiun a la 3. classa gimnasiala u per la 1. classa da la scola media commerziala u da la scola media spezialisada, han 182 (44 pertschient) dumagnà l'admissiun en la 3. classa gimnasiala e 103 (25 pertschient) en la 1. classa da la scola media commerziala u da la scola media spezialisada. La quota d'admissiun per entrar en la 3. classa gimnasiala importa quest onn 11,2 pertschient cumpareglià cun l'annada da referenza. Quai correspunda circa a la quota d'admissiun da l'onn passà (11,1 pertschient).

Success tar ils examens finals a las scolas medias dal Grischun
Cuntrari als examens finals da l'onn passà han quest onn tant ils examens finals en scrit sco er quels a bucca pudì vegnir realisads sut cundiziuns regularas. Tut las persunas participadas han observà las mesiras da protecziun, uschia che ni las scolaras ed ils scolars ni las persunas d'instrucziun n'han stuì s'exponer ad ina periclitaziun da la sanadad. La sessiun d'examen ha pudì vegnir terminada ad ura avant las vacanzas da stad. Da totalmain 598 scolaras e scolars (377 gimnasi, 80 scola media spezialisada, 86 maturitad spezialisada, 25 scola media commerziala e 30 maturitad professiunala) che han fatg ils examens finals en las nov scolas medias dal Grischun han 583 pudì prender en consegna lur attestat final ils ultims dis.

Responsabladad: Uffizi per la furmaziun media-superiura