La situaziun epidemiologica è sa meglierada fermamain ils ultims mais. Betg sco ultim er grazia al concept da protecziun cumplessiv ed a las mesiras sistematicas per la protecziun da la populaziun. Il Departament da giustia, segirezza e sanadad tira bilantscha, guarda cun in optimissem precaut sin la stad ed appellescha a la populaziun: Il virus vegn a circular ed ad infectar umans er vinavant. L'atun stoi schizunt vegnir quintà cun in nov augment dals cas da corona. La vaccinaziun è perquai il med il pli efficazi per proteger la sanadad.
Grazia al fatg che la situaziun epidemiologica è sa meglierada fermamain, èn vegnidas abolidas tut las mesiras chantunalas ch'eran pli severas che quellas da la Confederaziun. Las mesiras sistematicas per la protecziun da la sanadad mussan effect. Il Departament da giustia, segirezza e sanadad (DGSS) guarda perquai cun in optimissem precaut sin ils mais da stad. Il virus na vegn betg a svanir; el vegn a circular vinavant en la populaziun. Ils umans vegnan a vegnir en contact cun el ed a s'infectar vinavant, sch'els n'èn betg protegids tras ina vaccinaziun.
La vaccinaziun è la mesira la pli efficazia cunter corona
Il concept da protecziun cumplessiv da la Regenza sa cumprova. En quest connex sa mussa la vaccinaziun cunter il coronavirus sco la mesira la pli efficazia per la protecziun da la sanadad. Dapi il schaner 2021 èn vegnidas dadas var 175 000 vaccinaziuns en il Grischun. Fin mez fanadur 2021 vegnan var 50 pertschient da la populaziun grischuna ad esser protegids. Memia pauc per proteger suffizientamain las abitantas ed ils abitants. Per quest motiv ha l'Uffizi da sanadad lantschà – sco cumplettaziun da la campagna d'infurmaziun da la Confederaziun – ina campagna da communicaziun. Ils nov centers da vaccinaziun regiunals restan vinavant en funcziun. Il center da vaccinaziun a Cuira mida a partir dals 4 d'avust 2021 ses lieu e vegn manà da nov da l'Ospital chantunal dal Grischun. Plinavant vegnan examinadas ulteriuras mesiras per simplifitgar l'access a la vaccinaziun cunter il coronavirus.
La strategia da tests preventivs fa effect
La «via grischuna» che prevesa tests preventivs è sa cumprovada en il cumbat cunter la pandemia. En tut èn vegnids fatgs fin ussa 705 900 tests da corona en il Grischun. Ils tests repetitivs en las scolas ed en ils manaschis èn s'integrads en il mintgadi ed èn acceptads fitg bain. Tras il maletg ch'ins ha survegnì da la situaziun èsi stà pussaivel da proteger la societad e l'economia cun agid da mesiras sistematicas. Ils tests en ils manaschis vegnan cuntinuads per entant fin mez avust 2021. La Regenza grischuna vegn a decider il cumenzament d'avust 2021 davart l'ulteriur proceder. Il project dals «tests preventivs» vegn sviluppà vinavant durant las emnas da stad, per ch'el possia vegnir reactivà tant pli svelt en cas da basegn – numnadamain sche la situaziun epidemiologica duess puspè daventar mendra l'atun.
Detecziun da SARS-CoV-2 en l'aua persa
Cun tutta forza vegni er lavurà vi dal project «Detecziun da SARS-CoV-2 en l'aua persa». Analisas da l'aua persa permettan in monitoring da gronds dumbers da la populaziun e servan sco sistem da preavertiment per prender cleras mesiras en las regiuns pertutgadas. Sche tests clinics na vegnan numnadamain betg pli realisads savens ed en tut il territori (p.ex. suenter ina reducziun signifitganta dal dumber d'infecziuns suenter campagnas da vaccinaziun), po l'analisa da l'aua persa sin SARS-CoV-2 furnir indizis, nua ch'il virus circulescha, e dar infurmaziuns davart novas cumulaziuns da cas.
Experientschas positivas cun occurrenzas da pilot
Per las occurrenzas da pilot realisadas il zercladur èn vegnidas selecziunadas duas radunanzas communalas e quatter occurrenzas. Occurrenzas grondas èn stadas scumandadas dapi il favrer 2020. Cun las occurrenzas da pilot ha il chantun rimnà emprimas experientschas en connex cun occurrenzas grondas. Tut en tut èn vegnids fatgs 3483 tests. Il DGSS tira in facit positiv. En quest connex èn resortidas la muntada d'in certificat COVID per l'entir territori, l'impurtanza da la collavuraziun tranter las organisaturas, il chantun e la Confederaziun sco er la relevanza d'ina clera communicaziun envers las participantas ed ils participants. Questas enconuschientschas vegnan resguardadas per giuditgar las permissiuns d'occurrenzas grondas futuras.
Il Stab directiv chantunal resta activ
Pervia da las activitads currentas vegn mantegnida l'organisaziun sin basa cuminaivla.
La collavuraziun tranter l'administraziun, la Confederaziun, las vischnancas, las federaziuns da las branschas, las instituziuns sco er las partenarias ed ils partenaris involvids vegn considerada sco decisiva. Uschia resta il Stab directiv chantunal er vinavant en funcziun per sustegnair l'Uffizi da sanadad. En funcziun resta er il post da communicaziun central sco instanza da consultaziun per la populaziun e per las collavuraturas ed ils collavuraturs da las medias.
Infurmaziuns:
Post da communicaziun per il coronavirus dal chantun Grischun, e‑mail kfsmedien@amz.gr.ch, tel. +41 79 716 22 95 (exclusivamain per collavuraturas e collavuraturs da las medias)
Responsabladad: Departament da giustia, segirezza e sanadad