Navigation

Inhaltsbereich

  • Erste Mitteilung
  • Neuen Beitrag einfügen

Pervia dal grond dumber da selvaschina d'ungla e pervia da sia influenza regiunalmain fitg gronda sin il guaud vegn il squitsch da chatscha sin tschiervs e sin chavriels augmentà danovamain fitg ferm, en singulas regiuns er sin ils chamutschs e sin ils portgs selvadis. Perquai ch'en spezial er il chavriel gioga ina rolla decisiva tar ils conflicts tranter il guaud e la selvaschina, sto la chatscha sin ils chavriels vegnir augmentada en il Grischun. Cun ina chatscha attractiva duain las finamiras da la chatscha vegnir ademplidas da las chatschadras e dals chatschaders. 

Il dumber total da tschiervs sajettads l'onn 2020 ha pudì vegnir surpassà levamain cumpareglià cun il plan da prelevaziun. Ultra da quai ha stuì vegnir constatà tar il tschierv in dumber surproporziunal d'animals disgraziads durant l'enviern passà. Pervia da quai ha la populaziun da tschiervs pudì vegnir reducida a 16 000 animals (2020: 16 300). En la Surselva hai pudì vegnir constatà che la populaziun da chavriels è sa reducida fitg ferm pervia dals envierns cun blera naiv e grazia a la preschientscha dal luf-tscherver e dal luf. Il medem vala per la populaziun da chamutschs en quest territori. Tar ils capricorns e tar ils chamutschs furneschan pir las dumbraziuns da stad ch'èn anc en curs respectivamain las dumbraziuns d'atun respostas fidaivlas davart l'autezza dals effectivs.

Ulteriura regulaziun consequenta da las populaziuns da selvaschina d'ungla
Il giudicament da l'influenza da la selvaschina d'ungla sin la regiuvinaziun dal guaud tras ils organs forestals mussa ch'ils problems en spezial en ils territoris Partenz/Signuradi, Val dal Rain da Cuira, Scanvetg, Tumleastga/Mantogna sco er per part en la Mesolcina/Val Calanca ed en il Grischun central èn anc adina fitg gronds (descripziun da la situaziun www.awn.gr.ch) e pretendan ina reducziun da la populaziun d'animals selvadis. Igl è l'incumbensa da la chatscha da reducir las populaziuns da selvaschina d'ungla en quests territoris. Autras mesiras sco saivs da protecziun cunter la selvaschina e protecziuns da bostgs singuls pon mo avair in effect cumplementar. A la chatscha da quest onn ston vegnir sajettads tut en tut 5565 tschiervs (2020: 5560 tschiervs) sin l'entir territori chantunal. La regulaziun succeda, cun fixar las finamiras per las singulas regiuns da guaud, en spezial cun sajettar ils animals feminins. Il plan è ademplì, cur ch'i èn vegnids sajettads almain 3177 animals feminins (2020: 3154). Ultra da quai sto la chatscha sin ils chavriels e sin ils chamutschs vegnir intensivada en tschertas regiuns da guaud

La reducziun fitg ferma tar la populaziun da chavriels e da chamutschs en la Surselva vegn resguardada en la planisaziun da la chatscha 2021 cun las restricziuns da chatscha correspundentas.

Intensivaziun da la chatscha sin portgs selvadis en la Mesolcina
La populaziun da portgs selvadis en la part sut da la Mesolcina è creschida fermamain e chaschuna gronds conflicts areguard il terren cultivà. Pervia da quai vegnan introducidas differentas mesiras per stabilisar la populaziun e per impedir ch'ella creschia vinavant. Las mesiraziuns da la radioactivitad tar portgs selvadis sajettads ch'èn vegnidas introducidas l'onn passà, vegnan cuntinuadas.

Planisaziun buna e premurusa da la chatscha bassa
Grazia al monitoring intensiv èsi cumprovà che la populaziun da la selvaschina da chatscha bassa en il Grischun, en spezial da la lieur brina e dals cots e da las giaglinas da draussa, è sauna e che las spezias prospereschan anc adina fitg bain. Las prescripziuns da chatscha èn sa cumprovadas e vegnan cuntinuadas correspundentamain. Las chatschadras ed ils chatschaders èn conscients da lur responsabladad cun exequir questa chatscha e s'engaschan activamain per questas spezias cun far lavurs da tgira.


Infurmaziuns:
Hannes Jenny, vicemanader da l'Uffizi da chatscha e pestga dal Grischun, tel. +41 81 257 38 92, e‑mail Hannes.Jenny@ajf.gr.ch


Responsabladad: Uffizi da chatscha e pestga

Neuer Artikel