La Regenza ha incumbensà Comamala Ismail Architectes cun la planisaziun generala da la nova basa per la Polizia da traffic da la Polizia chantunala sper l'access a l'autostrada Cuira sid. L'edifizi sper l'autostrada A13 duai esser in project da pilot e d'innovaziun che chapescha la persistenza sco part integrala. El duai valair sco exempel extraordinari per construcziuns persistentas e prontas per il futur. L'Uffizi da construcziun auta ha inoltrà il project sco project exemplaric en il plan d'acziun «Green Deal» dal chantun Grischun. En quel senn duai l'aspect da la persistenza ir pli lunsch che las mesiras cumprovadas ed ils standards vertents. En il pensar en ciclus da vita duai il project exemplaric esser caracterisà plitgunsch d'ideas innovativas per schanegiar las resursas, per reducir las grevezzas per l'ambient e per promover la biodiversitad.

La nova basa da la Polizia da traffic è vegnida publitgada en ina procedura da concurrenza da projects averta d'in stgalim. Il project victur «FAR» da Comamala Ismail Architectes ha la finala gudagnà cunter dudesch ulteriurs projects da teams da planisaziun. Il project victur cumpiglia in edifizi cumpact cun quatter plauns, chè situà sin la part vest dal bain immobigliar a la cruschada Sommeraustrasse/Waffenplatzstrasse. Il sboz è caracterisà da spargnusadad e da simplicitad. Suenter ch'il project da construcziun è avant maun, vegn la missiva per la nova basa da la Polizia da traffic preschentada per mauns dal Cussegl grond en la sessiun da favrer 2022.

Ulteriuras infurmaziuns davart la nova basa per la Polizia da traffic

La Regenza ha incumbensà il biro d'architectura D. Jüngling ed A. Hagmann da Cuira cun la construcziun d'in nov edifizi da manaschi per il stabiliment per l'allevament da peschs a Claustra. Lur project «speziFISCH» è sa fatg valair envers sis ulteriurs concurrents.

Il team da project ha survegnì l'incumbensa en il rom d'in contract da plirs stgalims. L'emprim stgalim cumpiglia l'elavuraziun d'in project preliminar detaglià che serva sco basa per dumandar in credit en il Cussegl grond (missiva curta tar il preventiv 2022). L'incumbensa per il segund stgalim vegn surdada pir cun la resalva ch'il credit vegnia approvà dal Cussegl grond.

Ulteriuras infurmaziuns davart la construcziun d'in nov edifizi da manaschi per il stabiliment per l'allevament da peschs a Claustra

Plan orizontal dal stabiliment per l'allevament da peschs a Claustra

Durant ils proxims 3 onns vul la citad da Cuira sanar ils rempars existents en la Plessur. En il rom da las controllas regularas dals stabiliments èsi sa mussà ch'ils rempars èn donnegiads en differents lieus. La Regenza ha approvà l'ultima da tut en tut trais etappas da construcziun. Questa etappa cumpiglia ils trajects tranter la punt Bodmer e la punt Metzger sco er sut la punt Totengut fin sut la cascada da la Plessur. Sin tuts dus trajects èsi previs da reparar u da construir in fundament per ils dus mirs existents a la riva sanestra per pudair garantir lur stabilitad a lunga vista. Ils custs totals da quest project importan circa 1,4 milliuns francs. Il chantun ha approvà per quest intent ina contribuziun federala da 490 000 francs tenor la cunvegna da program da la NGF e duas contribuziuns chantunalas da 280 000 francs e da 63 000 francs tenor la Lescha davart la correcziun dals curs d'aua en il chantun Grischun e tenor la Lescha davart las vias.