Navigation

Inhaltsbereich

  • Erste Mitteilung
  • Neuen Beitrag einfügen

La consula generala svizra a Milaun, Sabrina Dallafior, ha visità oz – sin invitaziun da la Regenza – il chantun Grischun.

La consula generala svizra Sabrina Dallafior è vegnida beneventada oz en la Chasa grischa dal president da la Regenza Mario Cavigelli, dals dus cussegliers guvernativs Marcus Caduff e Jon Domenic Parolini sco er dal chancelier Daniel Spadin e da Carlo Crameri, incumbensà per relaziuns externas. Tar questa scuntrada è la consula generala svizra Sabrina Dallafior vegnida accumpagnada da Sandra Caluori, vicescheffa da post.

Barat davart temas multifars
En il center dals discurs èn stadas las relaziuns bilateralas cun las regiuns vischinas talianas. Ultra da quai han ils partenaris da discurs tractà differents temas transcunfinals. Tranter auter èn vegnidas discutadas las consequenzas dal coronavirus per la collavuraziun transcunfinala e per las cunfinarias ed ils cunfinaris. Ulteriurs temas discutads èn stads il "pop-up house" da la Svizra ch'è planisà a Milaun per la primavaira 2022, la Scola svizra a Milaun che stat tranter auter sut il patrunadi dal Grischun, sco er la candidatura dal rumantsch en l'Italia dal nord ed il program d'interreg Italia-Svizra.

La Regenza grischuna tgira ils contacts cun represchentantas e represchentants da la Svizra en ils stadis vischins cunfinants. Quests discurs èn elements impurtants da las relaziuns externas dal chantun Grischun. Cun ils stadis vischins e cun ils pajais che han relaziuns spezialas cun la Svizra e cun il Grischun vegnan discutads savens dumondas e temas specifics actuals.

Fotografia agiuntada:

Gruppenbild mit Generalkonsulin

Legenda (da sanestra): incumbensà per relaziuns externas Carlo Crameri, vicescheffa da post Sandra Caluori, cusseglier guvernativ Marcus Caduff, president da la Regenza dr. Mario Cavigelli, cusseglier guvernativ dr. Jon Domenic Parolini, consula generala Sabrina Dallafior, chancelier Daniel Spadin

Infurmaziuns:

president da la Regenza dr. Mario Cavigelli, schef dal Departament d'infrastructura, energia e mobilitad, tel. +41 81 257 36 01, e‑mail Mario.Cavigelli@diem.gr.ch


Responsabladad: Chanzlia chantunala
Neuer Artikel