Il Departament d'educaziun, cultura e protecziun da l'ambient ha elegì Nadine Wallaschek sco nova directura da la Biblioteca chantunala dal Grischun. Ella daventa la successura da Petronella Däscher che va en pensiun per il 1. da settember 2021.
Nadine Wallaschek è creschida si en la Val dal Rain songagliaisa ed ha terminà la Scola auta spezialisada dal Grischun SASGR (pli baud SATE Cuira) cun il Master of Science in Information Sciences. En il Center songagliais per il cudesch (ZeBu) ed en la Biblioteca chantunala Vadiana a Son Gagl è ella s'acquistada vastas enconuschientschas spezialas en tut las partiziuns da biblioteca ed ha er fatg experientschas da lavurar en projects e da manar glieud. L'onn 2017 è ella entrada en plazza sco vicedirectura da la Biblioteca chantunala dal Grischun. Sco spezialista per fatgs d'infurmaziun, sco manadra da projects e sco persuna responsabla per la lavur da publicitad ha ella fatg numerusas experientschas en la direcziun strategica da la Biblioteca chantunala ed en la collavuraziun cun instituziuns culturalas regiunalas e naziunalas.
Projects da digitalisaziun da bains culturals chantunals
A Nadine Wallaschek èsi reussì da realisar projects per digitalisar la gasetta Posta ladina e plirs titels da gasetta da la Val Mesauc. Cun quests projects ha la Biblioteca chantunala prestà ina contribuziun impurtanta per archivar duraivlamain sco er per render utilisabels bains culturals chantunals. La finala è la dunna da 36 onns stada participada en moda decisiva per transfurmar cun success il sistem da biblioteca e da catalog da l'Uniun da bibliotecas dal Grischun che cumpiglia pli che 20 bibliotecas. Ella ha il grond giavisch da posiziunar la Biblioteca chantunala vinavant sco lieu attractiv ed inspirant che envida – ultra da sia funcziun da collecziunar e d'archivar – ad emprender, a perscrutar ed a sa barattar en la communicaziun.
Fotografia agiuntada:
Nadine Wallaschek, nova bibliotecaria chantunala
Infurmaziuns:
Barbara Gabrielli, manadra da l'Uffizi da cultura, tel. +41 81 257 48 01, e-mail Barbara.Gabrielli@afk.gr.ch
Responsabladad: Uffizi da cultura