Ils 10 da settember èn sa scuntrads ils presidents dals chantuns da la Svizra orientala sco er il president dal commember associà Principadi da Liechtenstein en il Grischun. La delegaziun è viagiada cun la Viafier retica a Preda, nua ch'ella ha visità il stadi da las lavurs sin il plazzal dal tunnel da l'Alvra.
Suenter la mesadad da ses segund onn presidial ha il cusseglier guvernativ grischun e president actual da la Conferenza da las regenzas dals chantuns da la Svizra Orientala (CRO), Jon Domenic Parolini, envidà las presidentas ed ils presidents dals chantuns da la Svizra orientala sco er dals commembers associads en il chantun Grischun. Suenter in temp marcà da las restricziuns pervia da la pandemia è il barat tranter ils commembers da la CRO spezialmain impurtant.
Vias da traffic intactas èn da gronda impurtanza
Sin il program è stà in viadi en il char-salun da la Viafier retica da Cuira a Preda. Il directur da la Viafier retica, Renato Fasciati, ha accumpagnà la delegaziun. A Preda ha la delegaziun visità il stadi da las lavurs al nov tunnel da l'Alvra. A partir da l'onn 2024 remplazza il project tschientaner il tunnel existent tranter l'Engiadina e la Val d'Alvra, che datescha da l'onn 1903. La realisaziun dal tunnel da l'Alvra d'ina lunghezza da 5860 meters tranter Preda e Spinas mussa la gronda impurtanza da vias da traffic intactas en il chantun il pli vast da la Svizra. Il project sa chatta en l'otgavla stagiun da construcziun e sa sviluppa tenor program.
Suenter èn ils presidents viandads per lung da la senda d'aventura da viafier, che appartegna al patrimoni cultural mundial da la UNESCO, Alvra. La tschaina communabla ha gì lieu en la Chasa da cura Bravuogn, in hotel istoric dal stil floreal.
Fotografia agiuntada:
Infurmaziuns:
cusseglier guvernativ Jon Domenic Parolini, president da la CRO, tel. +41 81 257 27 01 (cuntanschibel per telefon tranter las 16.00 e las 17.00), e-mail Jondomenic.Parolini@ekud.gr.ch
Responsabladad: Conferenza da las regenzas dals chantuns da la Svizra Orientala (CRO)