Il bus da vaccinaziun grischun ha terminà l'emprima runda tras tut las regiuns dal chantun. 3900 persunas han profità da l'access nuncumplitgà a la vaccinaziun. Fin mez october fa il bus da vaccinaziun la segunda runda e sa ferma puspè en 38 lieus. Tut en tut èn 63,5 pertschient da las Grischunas e dals Grischuns vaccinads almain ina giada fin ussa.
Il bus da vaccinaziun circulescha dapi ils 23 d'avust 2021 tras il chantun. En 38 lieus en tut las regiuns èn 3900 persunas sa laschadas vaccinar. La pussaivladad nuncumplitgada da sa laschar cussegliar e vaccinar al lieu ha in bun resun. Questa emna ha il bus da vaccinaziun grischun cumenzà la segunda runda – fin mez october cursescha el danovamain tras il chantun e porscha tant emprimas sco er segundas vaccinaziuns.
63,5 pertschient da las Grischunas e dals Grischuns èn vaccinads
Tut en tut èn vegnidas injectadas fin ussa 130 000 emprimas vaccinaziuns en il chantun Grischun. Var 127 000 da questas dosas èn vegnidas dadas a la populaziun grischuna. Quai correspunda a 63,5 pertschient da las Grischunas e dals Grischuns.
La vaccinaziun cunter il coronavirus è la meglra pussaivladad per impedir in'unda d'infecziun pli gronda l'atun. Tant il privel da s'infectar sco er la ristga per in andament gravant da la malsogna vegnan reducids fermamain tras ina vaccinaziun cumpletta. Pli bleras persunas ch'èn vaccinadas e main ch'il virus circulescha en la societad ed er main persunas che daventan malsaunas u ston murir pervia dal coronavirus. La ristga da survegnir cumplicaziuns seriusas en cas d'ina infecziun cun il coronavirus è bler pli gronda che la probabilitad da grevs effects secundars pervia da la vaccinaziun.
Las staziuns dal bus da vaccinaziun, ina survista da las pussaivladads da walk-in, l'annunzia electronica per in termin da vaccinaziun sco er ulteriuras infurmaziuns èn disponiblas da tut temp sin www.gr.ch/vaccinar.
Infurmaziuns:
Post da communicaziun per il coronavirus dal chantun Grischun, e-mail kfsmedien@amz.gr.ch, tel. +41 79 716 22 95 (mo per collavuraturas e collavuraturs da las medias).
Cumpetenza: Uffizi da sanadad