La Lescha davart la promoziun da la transfurmaziun digitala en il Grischun è en vigur dapi il 1. da schaner 2021. Ina incumbensa impurtanta en il sectur da la promoziun ha l'Uniun GRdigital ch'è vegnida fundada ils 10 da matg 2021 sco organisaziun spezialisada prescritta da la lescha. Cun la conclusiun da l'incarica da prestaziun è vegnì cuntanschì in proxim term impurtant.
La suprastanza da GRdigital ha fatg avanzar ils ultims mais las lavurs organisatoricas da l'uniun. En il center stattan ultra da l'installaziun dal cussegl spezialisà e dal secretariat er las preparativas per liquidar las dumondas. Tenor la lescha è l'uniun responsabla tranter auter per examinar la realisabladad e l'efficacitad da projects da digitalisaziun sco er per dar recumandaziuns da promoziun per mauns dal chantun. Per promover la transfurmaziun digitala en il Grischun stattan a disposiziun 40 milliuns francs.
Terminà l'incarica da prestaziun per la fasa iniziala
In term impurtant è ussa cuntanschì. Cun l'uniun ha il chantun fatg ina incarica da prestaziun per la fasa iniziala, che dura fin la fin da l'onn. Durant las proximas emnas vegn l'uniun ad installar il cussegl spezialisà ed il secretariat ch'è en spezial er il post da contact per las organisaziuns da branscha, sch'ellas han dumondas davart la transfurmaziun digitala e davart ils projects da digitalisaziun. Ultra da quai vegn l'uniun ad examinar dumondas da promoziun ed alura a far recumandaziuns da promoziun per mauns dal chantun. Las recumandaziuns da promoziun sa basan sin in model directiv e sin criteris da promoziun, ch'èn vegnids sviluppads da l'uniun en enclegientscha cun il chantun e ch'èn vegnids approvads da la Regenza ensemen cun l'incarica da prestaziun. La decisiun da promoziun definitiva prenda mintgamai la Regenza.
Dumondas u ideas da project pon vegnir inoltradas a GRdigital
A partir da l'october 2021 pon ins inoltrar dumondas da promoziun per projects da digitalisaziun u ideas da project sur in formular online directamain a l'Uniun GRdigital. Las ideas da project en furma d'ina skizza da project (maximalmain 10 paginas) pon ins trametter per in'emprima expertisa per e-mail a gesuch@grdigital.digital. Durant las proximas duas fin trais emnas vegn GRdigital plinavant ad infurmar pli detagliadamain davart il model directiv da promoziun e davart ils criteris da promoziun. Ulteriuras infurmaziuns en chaussa chattais Vus sin la pagina d'internet da GRdigital.
Infurmaziuns:
cusseglier guvernativ Marcus Caduff, Departament d'economia publica e fatgs socials, tel. 081 257 23 15, e-mail: info@dvs.gr.ch.
Responsabladad: Departament d'economia publica e fatgs socials