Var 150 meters sur las gallarias Steintöbeli a la via da Val S. Pieder datti pli grondas massas da grip instabilas. L'Uffizi da construcziun bassa disfa ussa cun ina siglientada controllada questa massa da grip ch'è periclitada da crudar giu. Uschia impedescha el che la massa da grip pudess crudar e che las gallarias vegnan donnegiadas. Plinavant garantescha l'uffizi che las lavurs da reparaziun che cumenzan proximamain possian vegnir exequidas en segirezza.

L'Uffizi da construcziun bassa ha gia renovà durant ils ultims onns pliras construcziuns artifizialas e gallarias per lung da la via da Val S. Pieder. Cun il project current duain l'onn proxim, il 2022, vegnir sanadas e rinforzadas las duas gallarias Steintöbeli 1 e 2 che sa chattan paucs kilometers avant Val S. Pieder respectivamain al cunfin nord da la chava da crappa Schmitteli.

Concept da mesiras
Durant las lavurs da rumir grippa e da segirezza da la stad 2021 èsi vegnì constatà – ultra da las enconuschentas instabilitads da la grippa da pitschna dimensiun – er in pli grond clutger da grip e plinavant, gist sur quel, pachets da grippa libers. Las massas da grip sa chattan en ina strivla da grip che n'è betg visibla davent da la via, var 150 meters sur la via chantunala. Ils scleriments geologics e geotecnics ch'èn vegnids fatgs, han mussà ch'i sto vegnir fatg quint proximamain cun ina crudada parziala u totala. En quest connex èsi da far quint che las gallarias vegnissan donnegiadas fermamain u schizunt destruidas. Pervia da quai sto l'Uffizi da construcziun bassa prender mesiras gia avant la renovaziun da las gallarias. Il concept da mesiras cumpiglia ina siglientada da segirezza immediata per impedir che las massas da grip pudessan crudar sin las gallarias. Il medem mument duai il concept garantir che las lavurs da reparaziun possian vegnir exequidas senza privel. Las massas da grip da var 400 meters cubic, ch'èn periclitadas da crudar giu, vegnan allontanadas cun ina siglientada controllada.

Andament da la siglientada
Igl è previs da siglientar il grip mardi, ils 12 d'october 2021. Per siglientar il grip e per exequir silsuenter la rumida da segirezza dal territori, sto la via vegnir serrada da las 09.40 fin las 17.00 per tut il traffic sco er per pedunas e peduns. Pervia da la topografia difficila ed en cas da mal'aura poi esser ch'il termin sto vegnir spustà. Sco datas da reserva èn perquai vegnidas fixadas la gievgia, ils 14 d'october 2021, ed il mardi, ils 19 d'october 2021. La siglientada vegn fatga en enclegientscha cun ils uffizis responsabels. Sut www.strassen.gr.ch stattan a disposiziun la charta e la glista da plazzals actuala cun indicaziuns detagliadas davart las lavurs e davart ils impediments.

Fotografia agiuntada:

Foto 2

Infurmaziuns:

– Eugen Duff, schef dal district 6, Uffizi da construcziun bassa, tel. +41 79 662 22 77, e-mail Eugen.Duff@tba.gr.ch
– Marcel Züger, manader da construcziun per incumbensa da l'Uffizi da construcziun bassa dal Grischun, tel. +41 79 426 98 18, e-mail Marcel.Zueger@infrageo.ch

Responsabladad: Uffizi da construcziun bassa