Sin proposta da la Dretgira chantunala dal Grischun ha la Cumissiun dal Cussegl grond per giustia e segirezza (CGS) augmentà la Dretgira regiunala da la Plessur cun derschadras e derschaders extraordinaris en la dimensiun da 200 pertschients da plazzas. Las plazzas èn limitadas a dus onns.

En la sessiun da favrer 2021 ha il Cussegl grond revedì parzialmain la Lescha davart l'organisaziun giudiziala. Uschia è vegnida stgaffida la pussaivladad da rinforzar las dretgiras chantunalas cun dapli persunal, sche derschadras u derschaders èn impedids per pli ditg d'exequir lur uffizi u sche las dretgiras n'èn betg pli en cas – pervia d'ina chargia da lavur extraordinaria – da liquidar dispitas giuridicas entaifer in termin adequat. La cumpetenza per eleger talas derschadras e tals derschaders extraordinaris ha la lescha mess en ils mauns da la Cumissiun da giustia dal Cussegl grond.

Gronda chargia da lavur a la Dretgira regiunala da la Plessur
La Dretgira regiunala da la Plessur cun sedia a Cuira è la dretgira regiunala la pli gronda en il chantun – ad ella è affiliada er la Dretgira da mesiras repressivas dal chantun Grischun. Durant ils ultims tschintg onns èn arrivads en media mintga onn 1775 novs cas tar la Dretgira regiunala e 118 novs cas tar la Dretgira da mesiras repressivas. Durant la medema perioda èn vegnids liquidads en media 1710 cas per onn tras la Dretgira regiunala e 118 cas per onn tras la Dretgira da mesiras repressivas. La cumplexitad pli e pli gronda sco er il fatg che las pretensiuns envers las sentenzias creschan d'in cuntin, han per consequenza che l'elavuraziun dals cas dura pli ditg e ch'il dumber dals cas pendents a la fin da l'onn è s'augmentà permanentamain. Per pudair reducir ils cas pendents ch'èn s'accumulads, ha la Dretgira regiunala da la Plessur dumandà in sustegn persunal a sia autoritad da surveglianza, la Dretgira chantunala dal Grischun. La Dretgira chantunala è stada da l'avis che questa dumonda saja motivada, ed ha dumandà da sia vart la CGS da metter a disposiziun a la Dretgira regiunala da la Plessur derschadras e derschaders extraordinarias per ina durada da dus onns ed en la dimensiun da 200 pertschients da plazzas.

200 pertschients da plazzas per dus onns
La CGS ha publitgà las plazzas giavischadas e fatg ina procedura d'annunzia. Per occupar ils 200 pertschients da plazzas ha ella pudì eleger quatter persunas cun mintgamai in pensum parzial da 50 pertschient: Xavier Dobler, Bettina Flütsch, Sarah Huder-Fischinger e Nicole Mengiardi-Gehrig. Per la cumissiun èsi impurtant che la giustia dal Grischun na possia betg mo sa distinguer tras ina buna qualitad da las sentenzias, mabain er tras decisiuns bainprestas. Quai per pudair porscher svelt ina segirezza giuridica a las persunas che tschertgan dretg. L'elecziun da las derschadras extraordinarias e dal derschader extraordinari per dus onns collia ella però er cun la clera aspectativa ch'il dumber da cas pendents possia vegnir reducì en moda evidenta.

Infurmaziuns:

president da la cumissiun Gian Derungs, tel. +41 79 641 30 72

Responsabladad: Cumissiun per giustia e segirezza