La Regenza ha gì l'occasiun da discutar oz a Cazas cun il cusseglier federal Ignazio Cassis. Il discurs cun il minister da l'exteriur ha permess da sclerir differents giavischs dal chantun Grischun e d'approfundar temas transcunfinals.

Il cusseglier federal Ignazio Cassis ha creà in dialog politic regular cun il Grischun per discutar ils giavischs e las sfidas particularas dal chantun triling e per rinforzar il barat d'infurmaziuns tranter il Cussegl federal e la Regenza. Il dialog dad oz cun il cusseglier federal Ignazio Cassis è gia stà il quart barat uffizial cun la Regenza grischuna dapi sia entrada en uffizi avant 4 onns.

Promoziun da la plurilinguitad
In dals temas principals a chaschun dal discurs a Cazas èn stadas ulteriuras mesiras per mantegnair e per promover la lingua e cultura rumantscha e taliana en il Grischun ed en Svizra. Uschia è tranter auter vegnì discurrì davart l'exposiziun ambulanta «Rumantsch è…». L'exposiziun sensibilisescha per il rumantsch, gida a colliar las Rumantschas ed ils Rumantschs ed envida las visitadras ed ils visitaders da sezzas e sezs «semnar lingua». Temas eran ultra da quai la proxima ediziun da la «Emna rumantscha», il stadi actual dal program «Piccolo Erasmus» che prevesa il barat da collavuraturas e collavuraturs tranter las administraziuns chantunalas tessinaisas e grischunas d'ina vart ed il Departament federal d'affars exteriurs (DFAE) a Berna da l'autra vart, sco er la conferenza annuala da las ambassaduras e dals ambassadurs da la Svizra e da la Scola svizra a Milaun ch'è planisada l'onn proxim a Puntraschigna.

Fotografia agiuntada:

La Regenza grischuna cun il cusseglier federal Ignazio Cassis

Infurmaziuns:

Responsabladad: Regenza