Navigation

Inhaltsbereich

  • Erste Mitteilung
  • Neuen Beitrag einfügen

Il delegà dal nov Post spezialisà per la plurilinguitad ha num Alberto Palaia. El cumenza ses uffizi il 1. da mars 2022.

Il Departament d'educaziun, cultura e protecziun da l'ambient ha elegì Alberto Palaia, che ha 49 onns, sco delegà per il Post spezialisà per la plurilinguitad. El cumenza ses uffizi il 1. da mars 2022 cun in pensum da 40 pertschient ed a partir dal 1. d'avust 2022 cun in pensum da 100 pertschient. Il magister da gimnasi diplomà e manader da scola ha studegià istorgia a l'Universitad da Friburg cun ils roms laterals rumantsch e talian. Sia lingua materna è talian ed el discurra er rumantsch e tudestg sin nivel da lingua materna. Alberto Palaia lavura actualmain sco magister al gimnasi da la claustra da Mustér (istorgia, rumantsch, talian). El è maridà, ha trais uffants ed abita a Glion. Durant ses temp liber s'engascha el tranter auter sco president da la Surselva Romontscha.

Sco delegà dal nov Post spezialisà per la plurilinguitad s'engascha Alberto Palaia per rinforzar la trilinguitad sco element caracteristic dal chantun. Ina da sias incumbensas principalas èsi, da sensibilisar ils departaments ed ils uffizis en connex cun la realisaziun da la legislaziun da linguas. Tar ses champ d'incumbensas tutgan er la cussegliaziun e la sensibilisaziun dad acturas ed acturs d'ordaifer l'administraziun. Sche necessari, dat il post spezialisà cleras instrucziuns d'agir als posts respectivs. Il delegà lavura en ina rait e tgira ina stretga collavuraziun cun ils departaments e cun ils uffizis. El collavura stretgamain cun la Promoziun chantunala da linguas.

Fotografia agiuntada: 

Delegierter Fachstelle Mehrsprachigkeit

Infurmaziuns:

cusseglier guvernativ dr. Jon Domenic Parolini, schef dal Departament d'educaziun, cultura e protecziun da l'ambient, tel. +41 81 257 27 02 (cuntanschibel per telefon tranter las 10.30 e las 12.00), e‑mail Jondomenic.Parolini@ekud.gr.ch

 

 

Responsabladad: Departament d'educaziun, cultura e protecziun da l'ambient

Neuer Artikel