Navigation

Inhaltsbereich

  • Erste Mitteilung
  • Neuen Beitrag einfügen

Suenter la realisaziun d'ina simulaziun da crisa naziunala tira l'Uffizi per la segirezza da victualias e per la sanadad d'animals in emprim facit positiv. L'exercizi ha gì lieu dals 2 fin ils 4 da november 2021 ed ha simulà in'erupziun da la pesta da portgs africana (PPA) en l'entira Svizra. Quest scenari è vegnì simulà tranter auter en territoris da guaud dal Signuradi.

Actualmain è la pesta da portgs africana sin l'entir mund in dals privels ils pli gronds per ils animals. L'avust 2021 ha il dumber da gnieus da contaminaziun cuntanschì in nivel fitg aut tar ils portgs en l'Europa. La ristga d'importar la PPA en Svizra è damai gronda. In'attenziun correspundenta è dumandada. Per l'uman è la malsogna da virus nunprivlusa, ma tar ils portgs domestics e selvadis infectads chaschuna ella bunamain adina la mort.

La collavuraziun entaifer il chantun e tranter ils chantuns funcziuna
Durant in exercizi da stab da trais dis han ins testà l'effizienza tar la reacziun sin la crisa sco er la collavuraziun tranter las autoritads chantunalas ed ils uffizis veterinars vischins da Son Gagl e dal Principadi da Liechtenstein. Er las capacitads organisatoricas e digitalas ed ils instruments digitals per l'elavuraziun da datas èn vegnids testads en il rom da l'exercizi. L'exercizi da crisa è vegnì realisà sut la direcziun da l'Uffizi federal da segirezza alimentara e fatgs veterinars (USAV).

Las emprimas enconuschientschas dal chantun Grischun or da la simulaziun da crisa permettan da trair in facit positiv. Da menziunar spezialmain èn la collavuraziun effizienta e cunvegnenta tranter las autoritads chantunalas involvidas sco er il sustegn tras las vischnancas. Mesiras pussaivlas per dumagnar la crisa – sco la restricziun u il scumond d'ir a chatscha, la restricziun d'acceder al guaud e da far lavurs forestalas, la serrada da passadis per animals selvadis ed il scumond da racoltar pavel – mussan en moda impressiunanta, quant impurtanta e cumplexa che questa tematica è.

Ulteriuras infurmaziuns davart l'exercizi da crisa chattais Vus sin la pagina d'internet dal USAV.

Fotografia agiuntada:

Foto Wildschweinjagd Mesocco
Maletg simbolic: Uffizi per la segirezza da victualias e per la sanadad d'animals

Infurmaziuns:

Dr. med. vet. Giochen Bearth, manader da l'Uffizi per la segirezza da victualias e per la sanadad d'animals, tel. +41 81 257 24 11, e‑mail Giochen.Bearth@alt.gr.ch


Responsabladad: Uffizi per la segirezza da victualias e per la sanadad d'animals

Neuer Artikel