Ils commembers da la ARGE ALP vulan sa colliar meglier en il sectur dal sport, promover il svilup persistent a lunga vista da l'entir spazi da las Alps e meglierar la collavuraziun per ina regiun alpina pli resistenta a crisas. Quai ha concludì la 52. conferenza da las scheffas e dals schefs da las regenzas cun trais resoluziuns.
La 52. conferenza da la Cuminanza da lavur da las regiuns alpinas (ARGE ALP) ha celebrà oz a Clavenna il punct culminant e la finiziun dal presidi d'in onn da la Lumbardia. Il sutsecretari Alan Christian Rizzi ha ussa surdà il presidi al guvernatur dal pajais federativ Tirol, Günther Platter.
Deliberà trais resoluziuns
A la conferenza da las scheffas e dals schefs da las regenzas èn oz vegnidas deliberadas trais resoluziuns. L'emprima resoluziun sa fatschenta cun il sport sco schanza per in nov schlantsch, per in creschament, per ina valurisaziun e per ina colliaziun da las regiuns da muntogna. La segunda resoluziun tracta la rolla da las regiuns alpinas en connex cun la realisaziun da las finamiras dal svilup persistent e dal svilup da l'economia circulara. E la terza resoluziun sa deditgescha al tema collavuraziun per ina regiun alpina pli ferma e pli resistenta a crisas.
Ultra da quai èn vegnids approvads divers novs projects da la ARGE ALP, tranter auter er il project grischun «Migraziun e turissem da la mesadad dal 19avel tschientaner fin la fin da l'Emprima Guerra mundiala» da l'Institut per la perscrutaziun da la cultura grischuna.
Premi da la ARGE ALP per l'innovaziun digitala cun e suenter corona
En il rom d'ina concurrenza ha la ARGE ALP tschertgà soluziuns digitalas innovativas per augmentar la forza da resistenza da las regiuns da muntogna durant e suenter la crisa da corona. L'emprim premi ha survegnì Salzburg per il project «Need it.at». Quai è ina plattafurma, sin la quala ins po prender e dar en locaziun equipament dad outdoor.
Giubileum da 50 onns da la ARGE ALP
IL'onn 2022 festivescha la ARGE ALP ses giubileum da 50 onns. L'onn da giubileum sut il presidi dal pajais federativ Tirol sa concentrescha sin il tema «Protecziun dal clima en il spazi alpin». Ultra da quai è vegnida adattada – en vista a l'onn da giubileum – la direcziun strategica da la ARGE ALP. La ARGE ALP sa focusescha en l'avegnir spezialmain sin ils suandants temas ch'èn relevants per il territori alpin:
- Protecziun da l'ambient, adattaziun a la midada dal clima e management da privels da la natira
- Economia en il territori alpin, cun focus spezialmain sin l'innovaziun tecnica e la digitalisaziun, sin il turissem persistent e l'agricultura da muntogna
- Giuventetgna, furmaziun e sport
Agiuntas:
Fotografia agiuntada:
Infurmaziuns:
cusseglier guvernativ dr. Christian Rathgeb, schef dal Departament da finanzas e vischnancas, tel. 081 257 32 01, e-mail Christian.Rathgeb@dfg.gr.ch (el telefona lura enavos)
Responsabladad: Chanzlia chantunala / Cuminanza da lavur da las regiuns alpinas (ARGE ALP)