La pandemia da COVID‑19 ha chaschunà ils ultims dus onns custs supplementars da pliras dunsainas da milliuns francs per il traffic public en il chantun Grischun. Pervia da questa situaziun da partenza finanzialmain tendida han ins stuì desister d'extender la purschida dal traffic public per l'onn 2022. Cun grondas stentas da vart da la Confederaziun e dal chantun han ins pudì evitar reducziuns da la purschida. Tuttina èn stadas pussaivlas las suandantas adattaziuns da la purschida: Las dumengias vegnan purschidas novas colliaziuns da l'Intercity tranter Cuira e Turitg. La Viafier Matterhorn‑Gottard prolunghescha ses temp da manaschi sin la lingia da Mustér ad Andermatt la damaun e la saira mintgamai per in'ura. Ultra da quai commerzialisescha la marca da tetg «invia» da nov interpresas da transport e consorzis tariffars en il chantun Grischun.
La pandemia da COVID‑19 ha midà las disas da viagiar en il traffic public. Oravant tut il homeoffice e dapli viadis da temp liber han influenzà la dumonda: Tranter auter èsi vegnì constatà che las capacitads ston vegnir augmentadas en spezial las dumengias suentermezdi; da questa circumstanza vegni tegnì quint cun in tact da mes'ura tranter las regiuns turisticas las pli impurtantas en il chantun Grischun e Turitg. Percunter èn las colliaziuns ch'eran pauc occupadas vegnidas stritgadas da la purschida.
Il temp da pandemia han il chantun Grischun e las interpresas da transport duvrà per sviluppar cuminaivlamain innovaziuns: En il chantun Grischun è il traffic public da nov en gir cun la marca da tetg cuminaivla «invia». «invia» represchenta ina ferma orientaziun a la clientella en il traffic public ed ina colliaziun intelligenta dals meds da transport en tut il chantun (www.gr-invia.ch).
Trens supplementars per il sport d'enviern
Tranter Cuira e Turitg megliereschan las Viafiers federalas la purschida particularmain per il traffic da temp liber. Da nov circulescha l'Intercity 3 (IC3) durant l'entira stagiun da sport d'enviern, da Nadal fin Pasca, mintgamai la dumengia da las 14.00 fin las 20.00 cun in tact da mes'ura da Cuira a Turitg. Durant l'entir onn parta la dumengia da nov in Intercity a las 15.37 davent da Cuira per Turitg ed a las 17.07 davent da la staziun principala da Turitg per Cuira. Medemamain da nov datti – tut tenor la stagiun – mintgamai il venderdi ina colliaziun directa senza midar tren tranter Berna e Cuira.
Meglieraziuns da la purschida tar la Viafier retica e tar la Viafier Matterhorn-Gottard
Sin la rait da la Viafier retica vegnan fatgas pitschnas adattaziuns da l'urari senza chaschunar custs supplementars. En spezial en il Partenz e fin a Tavau vegn optimà l'urari, quai che chaschuna in tact da mes'ura quasi nuninterrut sin la lingia tranter Landquart e Tavau durant las fins d'emna.
L'avertura da la part sura da la Surselva tras la Viafier Matterhorn‑Gottard vegn meglierada durant las uras marginalas, la saira e la damaun vegn il temp da manaschi sur l'Alpsu (Andermatt – Mustér) extendì per mintgamai in'ura en tuttas duas direcziuns. A Mustér parta l'ultim tren da nov a las 19.14 e l'ultim tren arriva a las 20.39. La nova colliaziun da baud tranter Mustér ed Andermatt circulescha durant la perioda da stad a las 06.20, l'emprim tren dad Andermatt arriva a Mustér gia a las 07.22.
Adattaziuns da la purschida er sin la rait da bus
Pervia da la situaziun finanziala tendida datti sin las lingias da bus en il Grischun mo adattaziuns pli pitschnas da l'urari. Tranter auter vegn introducì da glindesdi fin venderdi in tact d'ina ura tranter Cuira e Maladers. Singuls temps da colliaziun tranter la viafier ed il bus vegnan meglierads e las periodas da traffic stagiunalas vegnan extendidas en tschertas regiuns, medemamain èn vegnidas abolidas las colliaziuns pauc occupadas.
Colliaziuns pli attractivas cun l'exteriur
Pervia da la pandemia è vegnì reducì mintgatant fermamain il dumber da colliaziuns dal traffic public cun l'exteriur vischin. L'extensiun da la purschida sin la lingia da bus tranter Cuira e Bellinzona ch'è vegnida introducida ils 5 d'avrigl 2021, n'è anc betg sa manifestada en la dimensiun giavischada per cuntinuar cun il viadi per l'Italia. Per il Tessin dal Sid sco er per l'Italia vegnan purschidas colliaziuns durant l'entir onn cun temps da viadi attractivs, perquai ch'il tunnel da basa dal Ceneri po vegnir utilisà cumplainamain en il fratemp.
Singulas colliaziuns tranter Turitg e Minca daventan 30 minutas pli curtas, supplementarmain vegn Lindau rendì accessibel durant las fins d'emna davent da St. Margrethen cun ina nova viafier S.
Infurmaziuns pli detagliadas davart las midadas sin las singulas lingias da viafier e da bus
Er sin auters trajects da viafier e da bus èn vegnidas fatgas ulteriuras adattaziuns da l'urari. Las purschidas detagliadas da l'urari da mintga lingia chattais Vus en il document agiuntà sco er en l'internet sut www.fahrplanfelder.ch.
Agiunta:
Midadas da l'urari 2022 en il Grischun
Infurmaziuns:
- Thomas Schmid, manader da l'Uffizi d'energia e da traffic, tel. +41 81 257 36 21, e‑mail Thomas.Schmid@aev.gr.ch
- Daniel Caduff, manader dal project Traffic public, Uffizi d'energia e da traffic, tel. +41 81 257 36 27, e‑mail Daniel.Caduff@aev.gr.ch
Responsabladad: Uffizi d'energia e da traffic