En il futur duain las plazzas d'emprendissadi libras vegnir publitgadas per l'annunzia pir l'avust da l'onn avant che l'emprendissadi cumenza ed ils contracts d'emprendissadi duain vegnir fatgs il pli baud in onn avant che l'emprendissadi cumenza. Ultra da quai vegnan ils uffizis chantunals per la furmaziun professiunala ad approvar ils contracts d'emprendissadi il pli baud il settember da l'onn avant il cumenzament da l'emprendissadi. A quai èn sa cunvegnids ils partenaris da la furmaziun professiunala ils 10 da november 2021.

La Conferenza tripartita da la furmaziun professiunala da la Svizra ha publitgà ils 10 da november 2021 princips davart il process da la tscherna da professiun e davart l'occupaziun da las plazzas d'emprendissadi. Ils princips èn vegnids elavurads dals partenaris da la furmaziun professiunala. Cun quai reageschan els sin il fatg, ch'il martgà da plazzas d'emprendissadi è suttamess a differents effects. Da la vart da l'economia èn quai tranter auter midadas structuralas, fluctuaziuns conjuncturalas sco er la prontezza da las interpresas da scolar emprendistas ed emprendists. Las futuras persunas en scolaziun vegnan influenzadas dal svilup demografic, dals interess dals giuvenils che midan sco er da l'ambient respectiv.

Questas influenzas pon midar l'equiliber sin il martgà da plazzas d'emprendissadi uschia, ch'i dat ina concurrenza per plazzas da furmaziun ubain per persunas en scolaziun. Ils giuvenils – ma er lur geniturs – vegnan sut squitsch da prender memia baud decisiuns che na correspundan betg a lur talents, a lur finamiras ed a lur preferenzas. Per mitigiar quests svilups e per garantir il medem mument ch'il process da la tscherna da professiun ed il process da l'annunzia possian succeder tenor in urari raschunaivel per ils giuvenils, èn ils partenaris da la furmaziun professiunala sa decidids per in commitment cuminaivel. En l'interess da tut las parts participadas duai questa decleraziun pussibilitar ina tscherna da professiun conscienziusa e coordinada tenor in bun urari.

Novs princips per la tscherna da la professiun e per l'occupaziun da las plazzas d'emprendissadi
L'Uffizi per la furmaziun professiunala dal Grischun sustegna las stentas da la Conferenza tripartita da la furmaziun professiunala. Ils 29 da november 2021 è el perquai sa drizzà cun ina brev a tut ils manaschis d'emprendissadi dal chantun cun la supplica da resguardar ils suandants princips:

• Las plazzas d'emprendissadi vegnan publitgadas per l'annunzia il pli baud a partir dal 1. d'avust da l'onn avant il cumenzament da l'emprendissadi.
  
• Ils contracts d'emprendissadi vegnan fatgs il pli baud 1 onn avant il cumenzament da l'emprendissadi.
  

DL'Uffizi per la furmaziun professiunala da sia vart vegn a publitgar las plazzas d'emprendissadi sut www.cussegliaziun.ch vinavant il pli baud a partir dal 1. d'avust da l'onn avant il cumenzament da l'emprendissadi. Ultra da quai vegnan ils contracts d'emprendissadi approvads il pli baud a partir dal 1. da settember da l'onn avant il cumenzament da l'emprendissadi.

Ulteriuras infurmaziuns sut:

Tripartite Berufsbildungskonferenz – Commitment zu Berufswahlprozess und Lehrstellenbesetzung

Infurmaziuns:

Responsabladad: Uffizi per la furmaziun professiunala