Anc mai èn s'annunziads tantas scolaras e tants scolars per l'examen d'admissiun a las scolas da talent dal Grischun. Da las 150 persunas annunziadas èn 121 vegnidas admessas als examens. Ellas ed els fan oz in test multifar en ils secturs da talent musica u sport.

Per promover la cumpatibilitad dal sport da prestaziun e da la scola, è ina da las finamiras dal concept chantunal per promover il sport quella, da disponer d'ina rait da scolas da talent confurma als basegns che facilitescha da cumbinar sport e scolaziun sin il stgalim secundar I. Cun las classas da talents exista a Champfèr, Cuira, Glion e Tavau ina purschida da scolaziun flexibla che satisfa als basegns da las sportistas e dals sportists giuvens e che giauda in interess creschent.

Tests multifars per talents da musica u da sport
Per l'examen d'admissiun chantunal, che regla l'access a las scolas da talent, èn s'annunziads quest onn 148 scolaras e scolars – tants sco anc mai. Da quellas annunzias pertutgan 10 il sectur da talent musica e 138 il sectur da talent sport. Premissa per l'admissiun a l'examen èn diversas confermas da l'associaziun chantunala. Sco part da la procedura d'admissiun ston las candidatas ed ils candidats far oz in test multifar da la motorica da sport respectivamain in test da musica a la Scola professiunala artisanala a Cuira. Medemamain oz vegn fatg a maun d'in questiunari standardisà er in profil da persunalitad che dat ulteriuras infurmaziuns davart la qualificaziun.

Fotografia agiuntada:

Foto 2

Foto 3

Infurmaziuns:

• Cusseglier guvernativ dr. Jon Domenic Parolini, schef dal Departament d'educaziun, cultura e protecziun da l'ambient, tel. +41 81 257 27 01, e‑mail Jondomenic.Parolini@ekud.gr.ch (cuntanschibel da las 14.00 fin las 15.00)
• Thierry Jeanneret, manader grischunSport, Uffizi per la scola populara ed il sport, tel. +41 81 257 27 51, e‑mail Thierry.Jeanneret@avs.gr.ch (cuntanschibel da las 11.30 fin las 13.00 / a partir da las 14.00)
  

Responsabladad: Uffizi per la scola populara ed il sport