La Regenza ha approvà in project da la vischnanca da Scuol per construir rempars per lung dal torrent Val Triazza. Ultra da quai sa participeschan la Confederaziun ed il chantun al project cun maximalmain var 1,81 milliuns francs en il rom da la cunvegna da program da la NGF «Ovras da protecziun cunter l'aua». Ils custs totals vegnan calculads cun 3,3 milliuns francs.
L'aual Val Triazza curra amez tras il vitg da Pradella. La stad 2015 han ferms urizis chaschunà là aua gronda. Silsuenter ha l'aual inundà il territori d'abitadi da Pradella. Ina chasa d'abitar e duas chasas da champs han subì donns totals. Las analisas posteriuras han revelà ina ristga d'aua gronda augmentada ed in donn dals rempars existents. Pervia da quai ha la vischnanca da Scuol decidì d'elavurar in nov project per construir rempars.
Il project duai reducir il privel d'aua gronda ad ina dimensiun acceptabla. El cumpiglia mesiras da la construcziun idraulica en differents lieus per lung da tut l'aual en il territori dal vitg. L'element central dals rempars furma in mir da protecziun cunter aua gronda d'ina autezza da var 1,5 meters per lung da la riva dretga. Quest mir duai impedir ch'il vitg da Pradella vegnia inundà en l'avegnir.

La Regenza ha approvà il plan directiv regiunal concludì da la regiun Plessur ils 23 d'avust 2021 pertutgant las tematicas «traffic turistic betg motorisà» sco er «alloschaments e gastronomia». Elements da questas tematicas èn tranter auter vias da viandar, vias da velos sco er vias da velos da muntogna ed infrastructuras sco ustarias ed alloschaments ordaifer il territori d'abitadi. La finamira dal plan directiv è quella, da stgaffir il rom liant per las autoritads per mantegnair e per sviluppar vinavant ina rait da vias da velos attractiva e segira ch'è colliada cun la rait da vias surordinada. Cun trair a niz las sinergias cun autras purschidas sco staziuns da restauraziun ed alloschaments, vulan ins augmentar l'attractivitad turistica en la regiun sco er optimar las purschidas durant la stagiun da stad e durant la stagiun bassa.
Tut en tut giuditgescha la Regenza che las adattaziuns sajan adequatas e cunvegnentas. Ella beneventa en spezial la finamira d'optimar las raits da sendas da viandar e da vias da velos per augmentar l'attractivitad da la regiun. Sco ch'il text dal plan directiv menziunescha correctamain vali però a medem temp da mitigiar – nua che quai è necessari e pussaivel – eventuals conflicts tranter las differentas gruppas d'utilisaders.

©Grischun Vacanzas