L'administraziun chantunala è da nov activa sin LinkedIn. Suenter ch'ina fasa da pilot d'in mez onn ha mussà success, introducescha il chantun ussa uffizialmain sia preschientscha sin LinkedIn. La plattafurma da social media è spezialisada sin ils secturs professiun, carriera ed interpresas e dumbra passa trais milliuns utilisadras ed utilisaders sulettamain en Svizra. Sur LinkedIn vuless il chantun en spezial survegnir access a persunas spezialisadas ed ad interpresas cun interess al Grischun sco plazza economica.
Cun l'introducziun da LinkedIn extenda il chantun Grischun sia preschientscha en las medias socialas per in ulteriur chanal. Gia oz sa legra l'administraziun chantunala da grondas communitads sin Facebook, Twitter ed Instagram e tutga sin tut quests chanals tar ils chantuns che survegnan la pli gronda attenziun. Las medias socialas sa sviluppan permanentamain vinavant ed il cumportament sco er ils basegns da las utilisadras e dals utilisaders sa midan cuntinuadamain. Per quest motiv examinescha il Servetsch da communicaziun da la Chanzlia chantunala cuntinuadamain il svilup sin las plattafurmas da social media e la pussaivladad da duvrar novs chanals.
Il chantun sco plazza economica e sco patrun attractiv
LinkedIn duai vegnir duvrà per la communicaziun business-to-business sco er per la recrutaziun da persunal. La plattafurma pussibilitescha in access direct ad interpresas cun interess al Grischun sco plazza economica sco er il dialog cun persunas spezialisadas. Cun ina preschientscha attractiva sin LinkedIn duai il chantun ultra da quai s'etablir sco magnet sin la charta geografica da las investidras e dals investiders che s'interessan er per lieus da l'autra vart dals centers classics.
Fasa da pilot empermettenta
La stad 2021 ha il chantun Grischun lantschà in project da pilot d'in mez onn per testar sias activitads sin LinkedIn. Durant questa perioda han ils servetschs participads gia pudì etablir ina communitad cun var 1500 followers sin las trais paginas «Chantun Grischun», «Uffizi per economia e turissem dal Grischun» ed «Uffizi da persunal dal Grischun». La purschida da LinkedIn vegn uss extendida sin ulteriurs posts da servetsch. Ultra da quai pon las collavuraturas ed ils collavuraturs da l'administraziun chantunala ch'èn activs sin LinkedIn designà sasezs sco «persunas occupadas» tar il «chantun Grischun».
Fotografia agiuntada:
Infurmaziuns:
President da la Regenza Marcus Caduff, schef dal Departament d'economia publica e fatgs socials, tel +41 81 257 23 01, e‑mail Marcus.Caduff@dvs.gr.ch (cuntanschibel da las 13.00 fin las 14.00)
Responsabladad: Regenza