Dapi bun trais onns è il program per la generaziun giuvna da manadras e manaders «1418coach» in'istorgia da success en il Grischun. Vegnì stgaffì è il program pervi dal grond basegn da las uniuns ed associaziuns da tegnair ils giuvenils en l'uniun e d'impedir ina mancanza da manadras e manaders cun introducir gia giuvenils sut 18 onns en l'activitad da manar. Ier è gia vegnida scolada la 500avla manadra «1418coach» en il Grischun.
La tschertga da manadras e manaders adattads e motivads è in dals puncts ils pli impurtants en l'agenda da las uniuns da sport dal Grischun. Dapi bun trais onns prevegn l'Uffizi per la scola populara ed il sport a quest quità cun famigliarisar giuvenils da 14 fin 18 onns cun la funcziun da manar, quai en in curs da scolaziun da dus dis. Suenter la scolaziun èn ils giuvenils qualifitgads da planisar e da manar tras ensemen cun ina manadra u in manader G+S cun experientscha parts da lecziuns sco manadra auxiliara u manader auxiliar. Ellas ed els rimnan latiers experientschas preziusas, senza gia stuair purtar la plaina responsabladad per ina gruppa. Ils engaschaments dals giuvenils vegnan indemnisads dal chantun Grischun.
Origin en il concept chantunal per promover il sport
Il giavisch da pudair scolar manadras auxiliaras e manaders auxiliars sut 18 onns è vegnì exprimì en il rom da l'elavuraziun dal concept per promover il sport. Dapi che l'emprima fin d'emna da scolaziun ha gì lieu il settember 2018, vegn quest program prezià fitg. La fin d'emna passada ha il cusseglier guvernativ Jon Domenic Parolini pudì surdar il 500avel diplom da «1418coach» a chaschun da la fin d'emna «1418coach» da gimnastica/gimnastica d'urdains a Schiers. Il minister da sport ha profità da la chaschun per engraziar a las giuvnas manadras auxiliaras ed als giuvens manaders auxiliars per lur engaschi e per als dar pleds motivants sin lur via. «L'engaschament dals giuvenils è impurtant e schizunt essenzial per che las uniuns e lur purschidas per talents giuvens possian surviver», è Parolini conscient. «Ch'il chantun ha pudì e po prestar qua lavur da pionier ma legra zunt fitg.»
Il program «1418coach» vegn extendì
La finamira dal program è quella, che las giuvnas manadras ed ils giuvens manaders restian activs en las uniuns e ch'ellas ed els absolveschian la scolaziun da basa da Giuventetgna+Sport suenter avair cumplenì 18 onns. Dals giuvenils ch'èn vegnids scolads fin ussa han gia divers prendì questa via ed èn ussa activs sco manadras u manaders G+S independents. Quest svilup legraivel han er las uniuns registrà e perquai giavischà – a chaschun da la revisiun dal concept chantunal per promover il sport da l'onn passà – ch'il program «1418coach» vegnia extendì. Cun ina fin d'emna da scolaziun supplementara survegnan uss anc dapli giuvenils la schanza da far la scolaziun. Uschia pon mintga onn durant 5 fin d'emnas var 130 fin 150 giuvenils vegnir famigliarisads cun l'activitad da manar.
Ulteriurs chantuns han surpiglià l'exempel
Il chantun Grischun è stà l'emprim chantun che ha multiplitgà il project da pionier cun success, suenter che l'Uffizi da sport dal chantun Turitg al aveva lantschà. Dapi lura èn vegnids tiers adina dapli chantuns che sa barattan en ina rait e che porschan la pussaivladad da visitar vicendaivlamain lur curs. En il fratemp sa participeschan gia 13 chantuns plus il Principadi da Liechtenstein. Uschia pon entant vegnir frequentads curs da «1418coach» en quasi tut las disciplinas da sport, dal sport da chavals al golf a l'ir cun skis fin a la gimnastica u al nudar. Sin la plattafurma www.1418coach.ch chattais Vus tut ils curs ed er la pussaivladad da s'annunziar.
Fotografias agiuntadas:
Foto 2, Foto 3
Infurmaziuns:
Thierry Jeanneret, manader da la partiziun Sport, Uffizi per la scola populara ed il sport, tel. +41 81 257 27 55, e-mail Thierry.Jeanneret@avs.gr.ch
Responsabladad: Uffizi per la scola populara ed il sport