La Cuminanza da lavur da las regiuns alpinas (ARGE ALP) tschertga en il rom d'ina concurrenza projects che promovan la persistenza e la protecziun dal clima en il territori alpin. Annunzias pon vegnir inoltradas fin ils 15 da zercladur 2022. Tut en tut vegn surdada ina summa dal premi da 34 000 euros.
Quest onn festivescha la ARGE ALP sut il presidi dal pajais federativ Tirol il giubileum da 50 onns. En quest connex na vegnan betg mo festivadas las prestaziuns dals ultims 50 onns. I vegn er dà in sguard en il futur dals pajais da las Alps. Per quest motiv è il tema surordinà da l'onn da giubileum la protecziun dal clima. La crisa dal clima sco er la superaziun da quella èn sfidas spezialas, a las qualas nus stuain far frunt – surtut en il territori alpin.
Projects relevants per la protecziun dal clima en il territori alpin
Ina contribuziun latiers duai er prestar il premi per la protecziun dal clima da la ARGE ALP da quest onn. Quest premi ha la finamira da metter en il center projects gronds, projects da start-up sco er projects da grassroots en ils secturs da la persistenza e da la protecziun dal clima. Tals projects duain esser extraordinaris e prospectivs per la protecziun dal clima.
Premiadas vegnan ideas da projects ch'èn prontas per la realisaziun e projects che sa chattan en l'emprima fasa da realisaziun. Ils projects duain pertutgar ils secturs tematics spargnar energia, effizienza energetica ed utilisaziun d'energias regenerablas ubain sensibilisar per la protecziun da l'ambient e dal clima. Medemamain pon vegnir inoltradas iniziativas che han en mira in diever conscienzius da las resursas u ina mobilitad persistenta. Ils projects duain avair in caracter exemplaric, mussar in gudogn per la generalitad sco er esser relevants per la protecziun dal clima e per il territori alpin.
Summa dal premi da 34 000 euros
La summa dal premi serva a realisar ideas innovativas u a sustegnair projects che sa chattan en l'emprima fasa da realisaziun. Per las titularas ed ils titulars dals premis da la categoria projects gronds e da la categoria start-up stattan a disposiziun mintgamai 10 000 euros. Ultra da quai vegn premià in project da grassroots da mintga pajais: I vegnan surdads 9 premis da renconuschientscha à 1000 euros ed in premi principal à 5000 euros.
Ils projects gronds pon vegnir inoltrads d'interpresas, da vischnancas, d'associaziuns u d'uniuns ed interprendidras ed interprendiders giuvens pon preschentar lur project da start-up. Er la populaziun interessada sco er giuvenils sur 15 onns èn envidads da participar a la concurrenza e da preschentar lur project da grassroots.
Surdada dal premi a chaschun da la Conferenza da las scheffas e dals schefs da las regenzas da la ARGE ALP
La selecziun dals projects victurs vegn fatga en ina procedura da dus stgalims. Ina giuria regiunala che vegn nominada dals pajais federativs e dals chantuns respectivs sco er da las regiuns respectivas elegia in project victur dal pajais da las Alps en dumonda. En in ulteriur pass eruescha la giuria internaziunala las victuras ed ils victurs finals. Ellas ed els vegnan envidads l'atun a Puntina a la surdada dal premi che ha lieu en il rom da la Conferenza da las scheffas e dals schefs da las regenzas da la ARGE ALP.
Inoltraziuns grischunas
Ils projects or dal chantun Grischun pon vegnir tramess fin ils 15 da zercladur 2022 a l'adressa dad e-mail kommunikation@gr.ch. I vegnan resguardads mo projects che adempleschan las modalitads per l'annunzia e che vegnan inoltrads cun ils documents da publicaziun cumplets.
Las directivas, il formular da participaziun, il consentiment per l'elavuraziun da datas sco er ulteriuras infurmaziuns chattais Vus sut www.argealp.org.
Commembers da la ARGE ALP èn il stadi liber Baviera da la Germania, ils stadis federativs Tirol, Salzburg e Vorarlberg da l'Austria, las provinzas autonomas Bulsaun-Tirol dal Sid e Trento sco er la regiun Lumbardia da l'Italia ed ils chantuns Grischun, Son Gagl e Tessin da la Svizra.
Infurmaziuns:
Tamara Freuler, responsabla per la communicaziun dal chantun Grischun, tel. +41 81 257 22 28, e-mail Tamara.Freuler@staka.gr.ch
Responsabladad: Cuminanza da lavur da las regiuns alpinas (ARGE ALP)