Navigation

Inhaltsbereich

  • Erste Mitteilung
  • Neuen Beitrag einfügen

Sco segn da solidaritad cun l'Ucraina fa la Regenza dal chantun Grischun ina donaziun da 200 000 francs ad ovras umanitaras renconuschidas sco la Crusch Cotschna Internaziunala e la Chadaina da Fortuna.

La Regenza grischuna persequitescha ils svilups en l'Ucraina cun gronda preoccupaziun. In'emna suenter il cumenzament da l'invasiun da la Russia en l'Ucraina han pliras tschient milli persunas stuì bandunar lur patria e tschertgan protecziun en ils pajais vischins. La suffrientscha che vegn mintg'ura pli gronda fa che la Regenza è consternada e trista.

In segn da solidaritad
En il senn d'in agid immediat umanitar fa il chantun Grischun ina donaziun da 200 000 francs ad ovras umanitaras renconuschidas sco la Crusch Cotschna Internaziunala e la Chadaina da Fortuna. La Regenza demussa uschia sia solidaritad cun la populaziun da l'Ucraina. «Il chantun Grischun fa ina donaziun dad in franc per abitanta ed abitant», declera il president da la Regenza, Marcus Caduff. La contribuziun deriva dal fond chantunal da lottaria che po vegnir duvrà per intents d'utilitad publica.

Infurmaziuns:

President da la Regenza Marcus Caduff, schef dal Departament d'economia publica e fatgs socials, tel. +41 81 257 23 01, e‑mail Marcus.Caduff@dvs.gr.ch (cuntanschibel da las 08.30 fin las 10.00)


Responsabladad: Regenza

Neuer Artikel