Navigation

Inhaltsbereich

  • Erste Mitteilung
  • Neuen Beitrag einfügen
La Regenza beneventa la revisiun parziala da l'Ordinaziun federala da linguas. Plinavant ha ella surdà il Premi grischun da cultura 2022 a Not Vital ed ha concedì ina contribuziun chantunala per la halla d'unihoc planisada a Cuira.

La Regenza beneventa la promoziun da las linguas naziunalas en l'instrucziun

La Regenza ha prendì posiziun davart la revisiun parziala planisada da l'Ordinaziun davart las linguas naziunalas e la chapientscha tranter las cuminanzas linguisticas. Las disposiziuns da l'Ordinaziun da linguas èn da princip sa cumprovadas durant ils ultims 11 onns. La revisiun planisada dal Departament federal da l'intern ha ussa l'intenziun da repassar parzialmain las disposiziuns davart ils agids finanzials ch'èn en la cumpetenza da l'Uffizi federal da cultura, e quai en reguard redacziunal e material.

La promoziun da linguas, en spezial la chapientscha ed il barat tranter las cuminanzas linguisticas, ha ina gronda impurtanza per il chantun Grischun. Perquai beneventa la Regenza la revisiun parziala da l'Ordinaziun da linguas. En spezial sustegna ella la proposta d'adattar las activitads promoviblas a favur dal rumantsch. Las linguas naziunalas duain vegnir promovidas pli fitg en l'instrucziun. L'extensiun a projects correspundents en quest connex vegn beneventada expressivamain.

Sco adattaziun supplementara propona la Regenza d'integrar en l'ordinaziun revedida er la promoziun da la chapientscha e dal barat tranter las cuminanzas linguisticas en la diaspora taliana e rumantscha. La concepziun e la promoziun da projects e da mesiras duessan vegnir concretisadas en l'Ordinaziun da linguas.

Link: Documents da consultaziun dal Departament federal da l'intern

La Regenza ha prendì posiziun davart la revisiun parziala planisada da l'Ordinaziun davart las linguas naziunalas e la chapientscha tranter las cuminanzas linguisticas.

Not Vital survegn il Premi grischun da cultura 2022

La Regenza surdat a Not Vital da Sent il Premi grischun da cultura 2022. Il premi è dotà cun 30 000 francs. Uschia undrescha la Regenza in artist che ha plazzà il chantun Grischun sin la charta mundiala da l'art contemporan. Particularmain renconuscha ella sia lavur sco cunconcepider da la cuntrada culturala ed architectonica contemporana da l'Engiadina Bassa. Quella ha el influenzà decisivamain cun in parc, cun ina biblioteca, cun renovaziuns da chasas veglias e cun la renaschientscha d'in chastè ad in lieu da l'art.

Plinavant surdat la Regenza set premis da renconuschientscha e tschintg premis da promoziun da mintgamai 20 000 francs. Ils premis vegnan surdads en il rom d'ina festa che ha lieu ils 13 da matg 2022.

Glista da tut las persunas premiadas da l'onn 2022

Portrait Not Vital
©Beny Steiner

La Regenza surdat a Not Vital da Sent il Premi grischun da cultura 2022.

La halla d'unihoc planisada a Cuira daventa implant d'impurtanza chantunala

La Regenza ha integrà il «Stabiliment da sport a la Ringstrasse a Cuira, halla d'unihoc» en il catalog dal Concept per implants da sport d'impurtanza chantunala (CISIC). La finamira dal CISIC è da promover ina infrastructura da sport che satisfa als basegns en il chantun Grischun. En quest senn ha la Regenza concedì a la citad da Cuira ina contribuziun chantunala tenor il CISIC da 3,9 milliuns francs per construir il stabiliment da sport.

La citad da Cuira prevesa da construir in nov stabiliment da scola e da sport a la Ringstrasse cun custs d'investiziun da totalmain 88,8 milliuns francs. Il credit necessari è vegnì approvà dal suveran da Cuira ils 13 da zercladur 2021. Sco project parzial èsi previs da construir in stabiliment da sport cun ina halla da gimnastica tripla e cun ina halla da gimnastica simpla supplementara. Questa infrastructura na duai betg mo servir al sport da scola, mabain cunzunt er al sport chantunal d'unihoc. Tant la Federaziun grischuna d'unihoc sco er las trais uniuns da la liga naziunala A – Cuira Unihockey, Piranha Cuira ed il UHC Alligator Malans – han confermà lur grond interess e lur consentiment a quest project. Ina infrastructura moderna per il sport d'unihoc rinforza l'attractivitad da Cuira e da la Val dal Rain da Cuira. La citad da Cuira quinta cun custs da 47,1 milliuns francs per il «Stabiliment da sport a la Ringstrasse a Cuira, halla d'unihoc».

Foto Sporthalle Ringstrasse Chur
©Citad da Cuira

La Regenza ha integrà il «Stabiliment da sport a la Ringstrasse a Cuira, halla d'unihoc» en il catalog dal Concept per implants da sport d'impurtanza chantunala (CISIC). En quest senn ha la Regenza concedì a la citad da Cuira ina contribuziun chantunala tenor il CISIC da 3,9 milliuns francs per construir il stabiliment da sport.

Glisch verda per engrondir la Clinica Gut a Fläsch

La Regenza ha approvà la revisiun parziala da la planisaziun locala che la vischnanca da Fläsch aveva concludì ils 9 da december 2021. Uschia ha ella stgaffì las premissas planisatoricas per engrondir la Clinica Gut a Fläsch.

La Clinica Gut a Fläsch è vegnida averta l'onn 2017 e realisada cun duas salas d'operaziun sco er cun 27 letgs, inclusiv infrastructura sco in local da sa svegliar ed ina clinica dal di. Sin fundament da l'occupaziun e dals svilups previsibels a Fläsch ha la Clinica Gut l'intenziun d'engrondir il manaschi a Fläsch e da construir ina nova chasa da letgs.

Klinik Gut
©Bearth, Deplazes, Ladner

La Regenza ha approvà la revisiun parziala da la planisaziun locala che la vischnanca da Fläsch aveva concludì ils 9 da december 2021. Uschia ha ella stgaffì las premissas planisatoricas per engrondir la Clinica Gut a Fläsch.

Neuer Artikel
Responsabladad: Regenza